Lua tosi o Sau 24 - Tosi Tapu

Uluaki ave popula

¹ I le sau o Sosakimi, na ano loa le sau o Papilone ko Nepukatenesale o tau. Na popula loa Sosakimi kiate ia i fetuu e tolu ; kae na agatuu loa a ia ki le sau o Papilone.

² Koia na kakau ai loa e le Eteleno kia Sosakimi ni fa solia Kaletea, mo ni fa solia Silia, mo ni fa solia Moape, mo ni fa solia o vosa o Amone, ke au o taui Sosakimi ; na kakau mai latou e le Eteleno ke au o maumaui a Suta, o mulimuli ki le folafola leia na fakasa e le Eteleno i ana tagata fakasausau le kau polofeta.

³ Na soko loa le nea lena i le fakatotonu a le Eteleno, leia na loto ke too a Suta mei ona mua, o tupu ko agasala fuli ala na fai e Manase,

⁴ ti mo le toto leia na liligi noa e Manase, ti mo tukipo ala na fakaapele e ia ki ai a Selusalemi. Koia na leaise loto ai le Eteleno ke fakamolemole kia latou.

⁵ Ko le toe o gaoi a Sosakimi, a nea fuli ala na fai e ia, pe leaise tosi a ia i le tosi fakamatala ki sau o Suta ?

⁶ Na mate loa Sosakimi. Ti na sau loa Sosakini, lona vosa, o fetogi a ia.

⁷ Na leaise toe mavae loa le sau o Esipito mei lona fenua, talie na too loa e le sau o Papilone a nea fuli a le sau o Esipito, mei le liua o Esipito o kaku ki le vaitafe o Eufalate.

Sosakimi, sau o Suta ; le ave popula

⁸ Na sau loa Sosakini i lona fetuu kau agafulu tupu valu, ti na sau a ia i masina e tolu i Selusalemi. Na igoa lona tinana ko Neuseta, taine o Elenatane, mei Selusalemi.

⁹ Na fai loa e Sosakini le nea leia e veli ki mata o le Eteleno, o mulimuli katoa ki nea veveli ala na fai e lona tamana.

¹⁰ I le temi lena, na pale ake loa a kau tagata fakasausau a Nepukatenesale, sau o Papilone, o taui Selusalemi, ti na lotou takatakai loa le kolo.

¹¹ Na ulu loa Nepukatenesale, sau o Papilone, ki le kolo i le lolotoga takatakai a ia e ana kau tagata fakasausau.

¹² Ti na ano loa Sosakini, sau o Suta, ki le sau o Papilone, mo lona tinana, mo ana tagata fakasausau, mo ana kau tagata pule, ti mo ana kau enuke. Ti na fakapilisoni loa a ia e le sau o Papilone i le fetuu valu o lana sau.

¹³ Na too loa e ia a koloa fuli o le fale o le Eteleno mo koloa o le fale o le sau ; ti na maumaui loa e ia a nea aulo fuli na fai e Salomone, sau o Iselaele, ki le fale tapu o le Eteleno, o mulimuli ki le nea leia na fakasa e le Eteleno.

¹⁴ Na ave popula loa e ia Selusalemi katoa, mo kau pule fuli, ti mo kau tagata toa fuli, ko lolatou api ko le tino agafulu afe, mo le kau fai papa fuli ti mo le kau fai matapa fuli : na toe loa le kakai mativa o le fenua.

¹⁵ Na ave loa e Nepukatenesale a Sosakini ki Papilone ; ti na ave popula loa e ia mei Selusalemi ki Papilone le tinana o le sau, mo avaga o le sau, mo ana enuke, mo le kau lalasi o le fenua,

¹⁶ mo tagata tau e tino fitu afe, ti mo tagata fai papa mo tagata fai matapa e tino afe, ti mo tagata toa fuli mo aoga ki le tau. Na ave popula loa latou e le sau o Papilone ki Papilone.

¹⁷ Ti na fakanofo loa e le sau o Papilone a Matania ke sau o fetogi Sosakini, lona tuatinana, ti na fetogi loa e ia lona igoa ki leia o Setesiasi.

Setesiasi, sau fakamuli o Suta

¹⁸ Na sau Setesiasi i lona fetuu kau lua tupu tasi, ti na sau loa a ia i fetuu e kau agafulu tupu tasi i Selusalemi. Na igoa lona tinana ko Amutale, taine o Selemia, mei Lipena.

¹⁹ Na fai loa e ia le nea leia e veli ki mata o le Eteleno, o mulimuli katoa ki nea veveli ala na fai e Sosakimi.

²⁰ Ti na soko loa le nea lena o tupu ko le sausau o le Eteleno ki Selusalemi mo Suta, ala na loto a ia ke tiaki mei ona mata. Ti na fai loa e Setesiasi se agatuu ki le sau o Papilone.