Lua tosi o Sau 22 - Tosi Tapu

Sosiasi, sau o Suta ; fau o maumau o le fale tapu

¹ Na sau loa Sosiasi i lona fetuu valu, ti na sau loa a ia i Selusalemi i fetuu e kau tolu tupu tasi. Na igoa lona tinana ko Setita, taine o Atasa, mei Potisekati.

² Na fai loa e Sosiasi le nea leia e malie ki le Eteleno, ti na saele loa a ia i le ala katoa o Tavite, lona tamana ; na leaise toe se loa a ia ki tafa.

³ I le fetuu kau agafulu tupu valu o le sau o Sosiasi, na kakau loa e le sau ki le fale o le Eteleno a Safani, le sekalaipe, vosa o Atesalia, vosa o Mesulame.

⁴ Na pati loa le sau kiate ia : Pale kia Ilekisa, le tagata faisakilifisio lasi, ti ke tanaki mai loa e ia le paaga leia na aumai ki le fale o le Eteleno, le paaga leia na tanaki e kau tagata leo o le uluaga o le fale tapu mei le kakai.

⁵ Ke tuku loa le paaga lena kia latou ala e tokaga ki le fai o gaoi o le fale o le Eteleno. Ti ke lotou totogi loa ki ai latou ala e gaoi ki le fale o le Eteleno,

⁶ le kau fai papa, mo le kau gaoi, mo kau pule gaoi, mo le totogi o le laakau mo fatu lalasi ala e aoga ki le fakafoou o le fale.

⁷ Kae e leaise afa loa kia latou pe na feaki loa lalatou fakaaoga le paaga, talie e lotou gaoi fakaagatonu.

Maua o le tosi o le lao e Ilekisa

⁸ Ti na pati loa Ilekisa, le tagata faisakilifisio lasi kia Safani, le sekalaipe : Kua kau maua le tosi o le lao i le fale o le Eteleno. Ti na soli loa e Ilekisa le tosi kia Safani, o lau loa e ia.

⁹ Ti na ano loa Safani, le sekalaipe, o fakamatala le nea lena ki le sau, o pati : Kua tanaki e au tagata fakasausau le paaga leia na maua i le fale o le Eteleno, ti kua lotou soli a ia kia latou ala e tokaga ki le fai o gaoi o le fale o le Eteleno.

¹⁰ Ti na toe pati loa Safani, le sekalaipe, ki le sau : Kua soli mai e le tagata faisakilifisio ko Ilekisa kiate au se tosi. Ti na lau loa e Safani le tosi i mua o le sau.

¹¹ I le logo loa a le sau ki folafola o le tosi o le lao, na sae loa e ia ona kofu.

¹² Ti na tuku loa e le sau le fakatotonu leinei ki le tagata faisakilifisio ko Ilekisa, mo Asikame, vosa o Safani, mo Akepole, vosa o Mikea, mo Safani, le sekalaipe, ti mo Asaia, le tagata fakasausau a le sau :

¹³ Kotou ano o afa le finegalo o le Eteleno o uiga mo au, o uiga mo le kakai ti mo Suta katoa, o tupu ko folafola o le tosi leinei kua tou aga o maua ; talie kua lasi ai le itaita o le Eteleno kia tatou, o tupu na leaise fakalogo fua otatou tamana ki folafola o le tosi leinei, ti na leaise lotou aga fua o tausi a nea fuli ala na tosi mai i ai kia tatou.

¹⁴ Na ano loa le tagata faisakilifisio ko Ilekisa, mo Asikame, mo Akepole, mo Safani, ti mo Asaia, ki le fafine polofeta ko Ulita, avaga o Salume, le vosa o Tikeva, vosa o Alase, le tagata leoleo o kofu. Na nofo a ia i Selusalemi i leia ake fetuu o le kolo.

¹⁵ I le oki o lalatou masau kiate ia, na pati loa Ulita kia latou : Ko leinei le folafola a le Eteleno, le Atua o Iselaele : Kotou pati ki le tagata leia na kakau ia mai koutou kiate au :

¹⁶ Ko leinei le folafola a le Eteleno : E kau aumai loa le malaia ki le ganea leinei mo lona kakai, o mulimuli ki folafola fuli o le tosi leia na lau e le sau o Suta.

¹⁷ Talie na lotou tiaki au ti na lotou momoli ni nea fakamanogi ki ni taulaatua, o tupu ke kau itaita ai ki gaoiaga fuli o olatou lima, e vilo loa loku itaita ki le ganea leinei, ti e leaise toe taofi loa a ia.

¹⁸ Kae e kotou pati loa ki le sau o Suta leia na kakau ia mai koutou kiate au ke kau aga o afa le finegalo o le Eteleno : Ko leinei le folafola a le Eteleno le Atua o Iselaele o uiga mo folafola ala na ke logo ki ai :

¹⁹ O tupu na lave loa le nea lena ki lou loto, o tupu na ke fakataulalo i mua o le Eteleno i lau logo ki le nea leia na kau fakasa o uiga mo le ganea leinei mo lona kakai, ala e liliu loa ko se nea fakaii ti ko se nea fakatupu malaia, talie na ke sae ou kofu ti na ke tagi i oku mua, ko au foki, na kau logo ki ai, ko le pati leinei a le Eteleno.

²⁰ Koia e kau tuku ia loa a koe ke mate i le tokamalie, e leaise tio loa ou mata ki malaia fuli ala e kau aga loa o fakavilo ki le ganea leinei. Na lotou ano loa, o fakasa ki le sau le tali a le fafine polofeta ko Ulita.