Lua tosi o Sau 21 - Tosi Tapu

Manase, sau o Suta

¹ Na sau Manase i lona fetuu kau agafulu tupu lua, ti na sau loa a ia i fetuu e kau lima tupu lima i Selusalemi. Na igoa lona tinana ko Efesipa.

² Na fai loa e ia le nea leia e veli ki mata o le Eteleno, o mulimuli ki aga fakalialia a puleaga ala na kapu e le Eteleno i mua o fanau a Iselaele.

³ Na toe fakatuu loa e ia a ganea taualuga, ala na maumaui e Esekiasi, lona tamana ; na fakatuu loa e ia ni aletale kia Paale, ti na fai loa e ia se fakatata o Asetalate, ofaipe le fai e Akapo, sau o Iselaele, ti na atolasio loa a ia ki le kau tau katoa o le lagi mo tausi ki ai.

⁴ Na fakatuu loa e ia ni aletale i le fale tapu o le Eteleno, logo ai le pati a le Eteleno : Ko Selusalemi leia e kau agai ai loa.

⁵ Na fakatuu loa e ia ni aletale ki le kau tau o le lagi i malae e lua o le fale tapu o le Eteleno.

⁶ Na momoli loa e ia lona vosa i le afi ; na sivi loa e ia a ao mo gata ke iloa ai a nea ka soko, ti na fakanofo loa e ia ni kakai ala e masau ki laumalie o kau mate ti e kikite ia a nea ala ka soko. Na asilisili fai loa e ia le nea leia e veli ki mata o le Eteleno, ke fakatupu ai lona ita.

⁷ Na tuku loa e ia le fakatata o Asetalate, leia na fai e ia, ki loto o le fale leia na pati ki ai le Eteleno kia Tavite mo Salomone, lona vosa : Ko le fale leinei, leia e tuu i Selusalemi, leia na kau filifili i faasiga fuli o Iselaele, ti e kau loto ke fakasa ai loku suafa o lee gato.

⁸ E leaise kau toe tuku loa ke ano saele a vae o Iselaele, o mamao mo le fenua leia na kau soli ki ona tamana, kae ke lotou tokaga fua o tausi a nea fuli ala na kau fakatotonu kia latou, ti mo le lao katoa leia na tuku kia latou e laku tagata fakasausau ko Moisese.

⁹ Kae na leaise lotou fakalogo loa ; ti na fakasesei latou e Manase ke lotou fai le nea leia e veli ake i puleaga ala na maumaui e le Eteleno i mua o fanau a Iselaele.

¹⁰ Koia na masau ai loa le Eteleno i ana tagata fakasausau le kau polofeta, o pati :

¹¹ O tupu na fai e Manase, sau o Suta, a aga fakalialia ana, ti tupu na veli oki ake a nea ala na fai e ia i nea fuli ala na fai e le kau Amole i ona mua, talie na fakaagasalai foki e ia a Suta ki ona taulaatua,

¹² ko leinei le nea leia e fakasa loa e le Eteleno, le Atua o Iselaele : E kau aumai loa ki Selusalemi mo Suta ni malaia ala e fakasevaia loa a taliga o leia e logo loa ki ai.

¹³ E kau maumaui loa Selusalemi ofaipe laku maumaui Samalia mo le famili o Akapo ; e kau fufulu loa Selusalemi ofaipe se pa leia e fufulu, ti e fakapulou i le oki o lona fufulu.

¹⁴ E kau tiaki loa le toetoega o loku tofiga, ti e kau tuku loa latou ki lima o olatou fili ; ti e lotou liliu loa ko le koloa tau mo le nea kai o olatou fili fuli,

¹⁵ o tupu na lotou fai le nea leia e veli ki oku mata, ti na lotou fakatupu ia loku itaita, mei le aso leia na mavae ai olatou tamana mei Esipito o kaku mai ki le aso nei.

¹⁶ Na liligi foki e Manase le toto mea o lasi ai, o kaku ki le fakaapele o Selusalemi mei leia a potu ki leia a potu, kae kese fai a agasala fuli ala na fai e ia ti na fakaagasalai ai e ia a Suta, o fai le nea leia e veli ki mata o le Eteleno.

¹⁷ Ko le toe o gaoi a Manase, a nea fuli ala na fai e ia ti mo agasala ala na fai e ia, pe leaise tosi a ia i le tosi fakamatala ki sau o Suta ?

¹⁸ Na moe loa Manase mo ona tamana, ti na tanu loa a ia i le oloto o lona fale, i le oloto o Usa. Ti na sau loa Amone, lona vosa, o fetogi a ia.

Amone, sau o Suta

¹⁹ Na sau loa Amone i lona fetuu kau lua tupu lua, ti na sau a ia i fetuu e lua i Selusalemi. Na igoa lona tinana ko Mesulemete, taine o Alute, mei Sotepa.

²⁰ Na fai loa e Amone le nea leia e veli ki mata o le Eteleno, ofaipe nea ala na fai e Manase, lona tamana ;

²¹ na saele loa a ia i le ala katoa leia na saele ai lona tamana, ti na tausi loa a ia ki taulaatua ala na tausi ki ai lona tamana, ti na tulolo loa a ia i olatou mua ;

²² na tiaki loa e ia le Eteleno, le Atua o ona tamana, ti na leaise saele loa a ia i le ala o le Eteleno.

²³ Na fono loa a tagata fakasausau a Amone ke tamate a ia, ti na lotou tamate loa le sau i lona fale.

²⁴ Kae na tamate loa e le kakai o le fenua latou fuli ala na fonoaki ia le mate o le sau. Ti na fakanofo loa e le kakai o le fenua a Sosiasi, lona vosa, ke sau o fetogi a ia.

²⁵ Ko le toe o gaoi a Amone, a nea ala na fai e ia, pe leaise tosi a ia i le tosi fakamatala ki sau o Suta ?

²⁶ Na tanu loa a ia i lona tanuma, i le oloto o Usa. Ti na sau loa Sosiasi, lona vosa, o fetogi a ia.