Lua tosi o Sau 18 - Tosi Tapu

Esekiasi, sau o Suta

¹ I le fetuu tolu o le sau o Ose, vosa o Ela, i Iselaele, na sau loa Esekiasi, vosa o Akase, i Suta.

² Na sau loa a ia i lona fetuu kau lua tupu lima, ti na sau a ia i fetuu e kau lua tupu iva i Selusalemi. Na igoa lona tinana ko Api, taine o Sakalia.

³ Na fai loa e ia le nea leia e malie ki mata o le Eteleno, ofaipe le fai katoa a Tavite, lona tamana.

⁴ Na fakapuli loa e ia a ganea taualuga, ti na maumaui loa e ia a fakatata, ti na sele loa e ia ki lalo a pou tapu, ti na momoi loa e ia le gata sila leia na fai e Moisese, o tupu na tutu e fanau o Iselaele ni nea fakamanogi i ona mua o kaku mai ki le aso lena.

⁵ Na tuku loa e Esekiasi lana fanaki ki le Eteleno, le Atua o Iselaele ; ti na leaise maua loa se sau na toe tatau mo ia i sau fuli o Suta i ona mua mo ona muli.

⁶ Na pipiki a ia ki le Eteleno, ti na leaise maliu kese loa a ia mei le Eteleno, ti na tausi e ia a fakatotonu ala na tuku e le Eteleno kia Moisese.

⁷ Ti na nofo loa le Eteleno mo Esekiasi, leia na manuia i ana gaoi fuli. Na tiaki e ia le sau o Asilia, o leaise toe popula a ia kiate ia.

⁸ Na tamate loa e ia le kau Filisitini o kaku ki Kasa, ti na maumaui loa e ia lolatou fenua mei ona tule leo o kaku ki kolo tau.

⁹ I le fetuu fa o le sau o Esekiasi, leia ko le fetuu fitu o le sau a Ose, vosa o Ela, i Iselaele, na pale ake loa Salemanasale, sau o Asilia, o taui Samalia ti na takatakai loa e ia a ia.

¹⁰ Na too loa e Salemanasale a Samalia i le sili o fetuu e tolu, i le fetuu ono o le sau o Esekiasi, leia ko le fetuu iva o le sau o Ose i Iselaele. Koia na too ai loa Samalia.

¹¹ Na ave fakapopula loa e le sau o Asilia a Iselaele ki Asilia, ti na fakanonofo loa e ia latou i Salaki, i le fenua o Kosani leia e tafe ai le liua ko Sapole, i kolo o le kau Mete,

¹² o tupu na leaise lotou fakalogo ki le leo o le Eteleno, lolatou Atua, ti na lotou maumaui lana sai, na leaise lotou fakalogo mo tausi ki nea fuli ala na fakatotonu e Moisese, le tagata fakasausau a le Eteleno.

Ulu o Sanekelipe ki Suta

¹³ I le fetuu kau agafulu tupu fa o le sau o Esekiasi, na pale ake loa Saselipe, sau o Asilia, ke taui kolo tau fuli o Suta, ti na too loa latou e ia.

¹⁴ Na kakau loa e Esekiasi, sau o Suta, ke pati ki le sau o Asilia i Lakisi : Kua kau fai se sala ! Ke ke fakamamao atu iate au. Ko le nea leia e ke fakasa mai loa kiate au, e kau fai loa a ia. Ti na fakatotonu loa e le sau o Asilia kia Esekiasi, sau o Suta, ni fa tenalio paaga e kau lelau tolu mo ni fa tenalio aulo e kau tolu.

¹⁵ Ti na soli loa e Esekiasi le paaga katoa leia na tuku i le fale o le Eteleno ti mo koloa o le fale o le sau.

¹⁶ Ko le temi a ia na too ai loa e Esekiasi, sau o Suta, ke ave ki le sau o Asilia, a laui aulo ala na aofi ai e ia a matapa mo kau matapa o le fale tapu o le Eteleno.

¹⁷ Na kakau loa e le sau o Asilia mei Lakisi ki Selusalemi, ki le sau ko Esekiasi, a Taletane, mo Lape-Salise ti mo Lapesake mo se solia makeke ai. Na lotou pale loa o kaku ki Selusalemi. I lalatou kaku ki ai, na lotou tutuu loa i tafa o le aleso leia e taki ia le vai ki le fa tane aluga, i le ala ki le faisaga o le tagata fai fo.

¹⁸ Na lotou kalagai loa le sau ; ti na ulu mai loa ki fafo kia latou Eliakimi, vosa o Ilekisa, pule o le fale o le sau mo Sepena, le sekalaipe, mo Soake, vosa o Asafe, le tagata fakafofoga a le sau.

¹⁹ Na pati loa Lapesake kia latou : Kotou pati kia Esekiasi : Ko leinei le masau a le sau lasi, le sau o Asilia : Kolea le makeke lena kua ke fanaki ki ai ?

²⁰ Na ke pati : E tonu ke maua ki le tau le fakapotopoto mo le makeke. Kae ko masau laulaunoa ana. Ko ai leia kua ke tuku ki ai lau fanaki, ke ke agatuu ai kiate au ?

²¹ Ko leinei, na ke tuku lau fanaki ki Esipito, na ke too ke tokoi atu kiate koe le fa u fati lena, leia e puui ia le lima o se tasi fua e fanaki ki ai : Ko le anoaga lena o Falaone, sau o Esipito, kia latou fuli ala e fanaki kiate ia.

²² E lagi kotou pati mai loa : Ko le Eteleno, lomatou Atua, leia e motou fanaki ki ai. Pe leaise ko ia leia na fakapuli e Esekiasi ona ganea taualuga mo ona aletale, o pati ki Suta mo Selusalemi : E kotou punou loa i mua o le aletale leinei i Selusalemi ?

²³ I le lakaga nei, fai se fakatuutuu mo loku pule, le sau o Asilia, ti e kau soli atu loa kiate koe a kau osi e afe lua, mo kapau e ke maua ia loa ni kau tagata ekeosi ke eke ki ai.

²⁴ E fefeaki loa lau fakafoki se pule fua e tasi i tagata fakasausau a loku pule ? E ke fanaki ki Esipito ki saliote mo kau tagata ekeosi.

²⁵ Ko le tasi a nea : Pe se ko le finegalo leinei o le Eteleno ke kau pale mai o taui le ganea leinei ? Na pati mai le Eteleno kiate au : Pale o taui le fenua lena, ti ke maumaui a ia.

²⁶ Na pati loa Eliakimi, vosa o Ilekisa, mo Sepena ti mo Soake, kia Lapesake : Ke ke masau fakaalamea mai ki au tagata fakasausau, talie e motou matala loa ki ai ; kae aua se ke masau fakasutea mai kia matou, ke logo ki ai le kakai leia e tutuu i le paa.

²⁷ Na tali loa Lapesake kia latou : Pe na kakau mai au e loku pule o fakasa a masau anei ki lou pule mo koe ? Pe na leaise kakau mai au ke fakasa a masau anei ki tagata ana e nonofo i le paa o kai olatou faikauga mo inu olatou livai mo koutou ?

²⁸ Ti na toe soso ake loa Lapesake, o kalaga leo lasi i le masau fakasutea, o pati : Kotou fakalogo mai ki le masau a le sau lasi, le sau o Asilia !

²⁹ Ko leinei le masau a le sau : Ke aua na kakaai koutou e Esekiasi, talie e leaise mafai loa ke saofaki e ia koutou mei loku lima.

³⁰ Ke aua na taki koutou e Esekiasi ke tuku lakoutou fanaki ki le Eteleno, o pati : E saofaki loa tatou e le Eteleno, ti e leaise tuku loa le kolo leinei ki lima o le sau o Asilia.

³¹ Aua na kotou fakalogo kia Esekiasi : talie ko leinei le masau a le sau o Asilia : Kotou fai se fakamalie kiate au ki se nea alofa, ti kotou ulu mai ki fafo kiate au, ti e kotou tasi kai loa lana vite mo lana fiki, ti e kotou tasi inu loa le vai o lona sosoni,

³² o kaku ki laku toe liliu mai, o ave loa koutou ki se fenua leia e tatau mo lokoutou fenua, ki se fenua o le fulumeto mo le vino, se fenua o le pane mo le vite, se fenua o lolo mo le meli, ti e kotou mauli loa, ti e leaise kotou mamate loa. Koia, aua na kotou fakalogo kia Esekiasi ; talie e mafai ke fakasesei e ia koutou, o pati : E saofaki loa tatou e le Eteleno.

³³ Pe na tasi saofaki loa e atua o atu puleaga lona fenua mei lima o le sau o Asilia ?

³⁴ Kofea atua o Amati mo Alepati ? Kofea atua o Sefalevaimi, mo Ena, ti mo Iva ? Pe na lotou saofaki Samalia mei loku lima ?

³⁵ I atua fuli o fenua ana, ko ai ma latou ala na saofaki ia olatou fenua mei loku lima, ke saofaki loa e le Eteleno a Selusalemi mei loku lima ?

³⁶ Na fakalologo le kakai, ti na leaise lotou tali se nea ; talie na tuku e le sau le fakatotonu leinei : Aua na kotou tali loa kiate ia.

³⁷ Ti na au loa kia Esekiasi a Eliakimi, vosa o Ilekisa, pule o le fale o le sau, mo Sepena, le sekalaipe, mo Soake, vosa o Asafe, le tagata fakafofoga o le sau, mo olatou teu kua sae, o fakamatala kiate ia a masau a Lapesake.