Lua tosi o Sau 17 - Tosi Tapu

Ose, sau fakamuli o Iselaele

¹ I le fetuu kau agafulu tupu lua o le sau o Akase, sau o Suta, na sau loa Ose, vosa o Ela i Samalia ki Iselaele. Na sau loa a ia i fetuu e iva.

² Na fai loa e Ose le nea leia e veli ki mata o le Eteleno, kae na leaise tatau oki loa mo sau o Iselaele ala na mua iate ia.

Ave popula o Iselaele ki Asilia

³ Na pale ake loa Salemanasale, sau o Asilia, o taui a ia ; ti na popula loa Ose kiate ia, o totogi loa se tukusau ki le sau o Asilia.

⁴ Kae na iloa loa e le sau o Asilia se agatuu kiate ia i le fale o Ose, ti na kakau loa e ia ni tagata avelogo ki le sau o Esipito ko So, leia na leaise koi soli ia le tukusau i le fetuu ki le sau o Asilia. Na sai loa e le sau o Asilia a Ose ki ni tini, o tuku ki le pilisoni.

⁵ Ti na ano loa le sau o Asilia o foli i le fenua katoa, ti na pale loa a ia o taui Samalia, o takatakai a ia i fetuu e tolu.

⁶ I le fetuu iva o le sau o Ose, na too loa e le sau o Asilia a Samalia, ti na ave popula loa e ia Iselaele ki Asilia. Na fakanonofo loa e ia latou i Salaki, mo le fenua o Kosani leia e tafe ai le liua ko Sapole, ti mo kolo o le kau Mete.

Tupuaga o le ave popula o Iselaele

⁷ Na soko loa le nea lena o tupu na agasala aifai a fanau a Iselaele ki le Eteleno, lolatou Atua, leia na fakamavae ia latou mei le fenua o Esipito, mei le lima o Falaone, sau o Esipito, ti toe tupu na lotou tausi ki ni atua kese.

⁸ Na lotou muli loa i agai fenua a puleaga ala na kapu e le Eteleno i mua o fanau a Iselaele, ti mo agai fenua ala na fakatupu e sau o Iselaele.

⁹ Na fai fakafufu loa e fanau a Iselaele ki le Eteleno, lolatou Atua, ni nea ala e leaise malie. Na lotou fakatuu loa kia latou ni ganea taualuga i olatou kolo fuli, mei tule leo o kaku ki kolo tau.

¹⁰ Na lotou fakatuu loa kia latou ni fakatata mo ni taulaatua i mauga liliki fuli ti mo lalo o laakau sesega fuli.

¹¹ Na lotou tutu loa i ganea ana ni nea fakamanogi, o tatau mo puleaga ala na kapu e le Eteleno i olatou mua, ti na lotou fai loa ni nea veveli, ke lotou fakatupu ai le ita o le Eteleno.

¹² Na lotou tausi ki taulaatua ala na pati ki ai le Eteleno : E leaise kotou fai loa le nea lena.

¹³ Na valoki loa e le Eteleno a Iselaele mo Suta ki ana polofeta fuli mo le kau kikite katoa, o pati kia latou : Kotou tafoki mai mei okoutou ala veveli, ti ke kotou tausi aku fakatotonu mo aku lao, o mulimuli katoa ki le lao leia na kau fakatotonu ki okoutou tamana ti na kau soli atu kia koutou i aku tagata fakasausau, le kau polofeta.

¹⁴ Kae na leaise lotou fakalogo fua, ti na lotou fakafefeka loa olatou ua ofaipe olatou tamana, ala na leaise tui ki le Eteleno, lolatou Atua.

¹⁵ Na lotou tiaki loa ana lao, mo le sai leia na fai e ia mo olatou tamana, ti mo valoki ala na fai e ia kia latou. Na lotou ano loa i muli o ni nea noa ti na lotou liliu loa ko ni nea noa, ti mo muli o atu puleaga ala na nonofo i olatou tafatafa, ala na tapui e le Eteleno kia latou ke fakatatau ki ai.

¹⁶ Na lotou tiaki loa a fakatotonu fuli a le Eteleno, lolatou Atua, ti na lotou fai loa kia latou ni pipi e lua ki le ukamea na saka, ti na lotou fau loa ni fakatata o Asetalate, ti na lotou atolasio loa ki le kau tau katoa o le lagi, ti na lotou tausi loa kia Paale.

¹⁷ Na lotou momoli loa i le afi olatou vosa mo olatou taineliki, ti na lotou fai loa a nea fakakikite mo nea fakatemonio, ti na lotou fakatau loa latou ke fai le nea leia e veli ki mata o le Eteleno, o tupu ke ita ai.

¹⁸ Koia na ita lasi ai le Eteleno ki Iselaele, o fakamamao a ia mei ona mata. Na toe loa le faasiga o Suta toka tasi.

¹⁹ Ti na leaise taupau foki e Suta totonu a folafola a le Eteleno, lona Atua, kae na lotou mulimuli ki agai fenua ala na fakatuu e Iselaele.

²⁰ Na tiaki loa e le Eteleno le lanu katoa o Iselaele ; ti na fakamamae e ia latou, ti na tuku e ia latou ki lima o le kau maumau, ti na fakaoki loa e ia ki le kapu o latou ke mamao mei ona mua.

²¹ Talie na mavae Iselaele mei le fale o Tavite, ti na lotou fakanofo ke sau Selopoamo, vosa o Nepate, leia na fakamaliu ia latou mei le Eteleno, ti na fakaagasalai ia a Iselaele ki se agasala lasi.

²² Na fai loa e fanau a Iselaele a agasala fuli ala na fai e Selopoamo ; na leaise lotou tafoki loa mei ai,

²³ o kaku ki le kapu e le Eteleno o Iselaele ke mamao mei ona mua, ofaipe lana fakasa fakatomua i ana tagata fakasausau fuli le kau polofeta. Ti na ave popula loa Iselaele ki Asilia, o mamao mo lona fenua, ti na nofo loa a ia i ai o kaku mai ki le aso leinei.

Ave o le kau Samalitana ki Iselaele

²⁴ Na aumai loa e le sau o Asilia ni kakai mei Papilone, mo Kuta, mo Ava, mo Amate, mo Sefalevaimi, ti na fakanonofo loa e ia latou i kolo o Samalia, o fetogi ai fanau a Iselaele. Na lotou maua loa Samalia, ti na lotou nonofo loa i ona kolo.

²⁵ I le kamataaga o lalatou nofo i ai, na leaise lotou i fua ki le Eteleno, ti na kakau mai loa e le Eteleno kia latou ni laione ala na tamate ia latou.

²⁶ Na pati loa ki le sau o Asilia : E leaise iloa e puleaga ala na ke aumai ke nonofo i kolo o Samalia le tausi ki le Atua o le fenua, koia leia na kakau mai e ia kia latou ni laione ala na tamate ia latou, talie e leaise lotou iloa le tausi ki le Atua o le fenua.

²⁷ Na tuku loa e le sau o Asilia le fakatotonu leinei : Kotou ave ki ai se tasi o le kau pelepitelo leia na kotou aumai fakapopula mei ai ; ke ano a ia o nofo i ai, ti ke ako e ia kia latou le tausi ki le Atua o le fenua.

²⁸ Na au loa se tasi o le kau pelepitelo leia na aumai fakapopula mei Samalia o nofo i Petele, ti na ako loa e ia kia latou le fakaapaapa ki le Eteleno.

²⁹ Kae na tasi fai loa e atu puleaga lona atua i kolo ala na lotou nonofo ai, ti na lotou fakatuu latou i fale o ganea taualuga ala na fakatuu e le kakai afea o Samalia.

³⁰ Na fai loa e le kakai o Papilone se fakatata o Sukoti-Penote, ti na fai loa e le kakai o Kuti le fakatata o Nelekale, ti na fai loa e le kakai o Amati le fakatata o Asima,

³¹ ti na fai loa e le kakai o Ava le fakatata o Nipesasi mo Taletake ; na tutu loa e le kakai o Sefalevaimi alatou fanau kia Atelameleke mo Anameleke, atua o Sefalevaimi.

³² Na lotou toe tausi foki ki le Eteleno, ti na lotou toe fakatupu ia ni kau pelepitelo o ganea taualuga ala na too i le kakai katoa ; na momoli e kau pelepitelo ana kia latou ni sakilifisio i fale o ganea taualuga.

³³ Koia na lotou tausi ai ki le Eteleno, ti na lotou toe tausi foki ki olatou atua o mulimuli ki agai fenua o puleaga ala na aumai latou mei ai.

³⁴ I le aso nei, koi lotou muli aifai ki alatou agai fenua masani : e leaise lotou i fua ki le Eteleno, ti e leaise lotou muli fua ki alatou lao mo alatou fakatuutuu, ti toe tatau ki le lao mo fakatotonu ala na tuku e le Eteleno ki fanau a Sakopo leia na fakaigoa loa e ia ko Iselaele.

³⁵ Na fai e le Eteleno se sai mo latou, ti na tuku e ia kia latou le fakatotonu leinei : E leaise kotou i loa ki ni iki ake atua ; e leaise kotou punou loa i olatou mua, e leaise kotou tausi loa kia latou, ti e leaise kotou momoli loa kia latou ni sakilifisio.

³⁶ Kae e kotou i loa ki le Eteleno, leia na fakamavae ia koutou mei le fenua o Esipito ki lona makeke lasi ti mo lona lima falo ; ko ia leia e tonu ke kotou atolasio ki ai, ti ko ia leia e kotou momoli loa ki ai ni sakilifisio.

³⁷ E kotou tausi loa ti e kotou fai tuumau loa a pelesepeto, mo fakatotonu, mo le lao ti mo folafola, ala na tosi e ia kia koutou, ti e leaise kotou i loa ki ni iki ake atua.

³⁸ E leaise kotou galoi loa le sai leia na kau fai mo koutou, ti e leaise kotou i loa ki ni iki ake atua.

³⁹ Kae e kotou tausi loa ki le Eteleno, lokoutou Atua ; ti e saofaki loa e ia koutou mei le lima o okoutou fili fuli.

⁴⁰ Kae na leaise lotou fakalogo fua, o lotou muli i alatou aga masani.

⁴¹ Na i a puleaga ana ki le Eteleno mo tausi ki olatou fakatata ; ti na fai e alatou fanau mo fanau o alatou fanau o kaku mai ki le aso leinei a nea ala na fai e olatou tamana.