Lua tosi o Sau 16 - Tosi Tapu

Akase, sau o Suta

¹ I le fetuu kau agafulu tupu fitu o le sau o Pekase, vosa o Lemalia, na sau loa Akase, vosa o Sotame, i Suta.

² Na sau Akase i lona fetuu kau lua, ti na sau loa a ia i fetuu e kau agafulu tupu ono i Selusalemi. Na leaise fai loa e Akase le nea leia e totonu ki mata o le Eteleno, lona Atua, ofaipe le agatonu o Tavite, lona tamana.

³ Na saele loa Akase i le ala o sau o Iselaele ; ti na momoli foki e ia lona vosa i le afi, o mulimuli ki aga fakalialia a atu puleaga pagani, ala na kapu e le Eteleno i mua o fanau a Iselaele.

⁴ Na momoli foki e ia ni sakilifisio mo ni nea fakamanogi i ganea taualuga, i mauga ti mo lalo o laakau sesega fuli.

⁵ Koia na pale ake ai loa Letisini, sau o Silia mo Pekase, vosa o Lemalia, sau o Iselaele, o taui Selusalemi. Na la takatakai loa Akase, kae na leaise mafai ke la malo loa iate ia.

⁶ I le temi lena, na too loa e Letisini, sau o Silia, le kolo o Elati ; na kapu loa e ia i ai le kau Sutea, ti na nonofo loa le kau Silia i ai o kaku mai ki le aso nei.

Kole o le tokoi a Asilia e Akase

⁷ Na kakau loa e Akase ni tagata avelogo kia Tikalate-Pilesele, sau o Asilia, o pati kiate ia : Ko lau tagata fakasausau au mo lou vosa ; pale mai, o saofaki au mei le lima o le sau o Silia ti mo le lima o le sau o Iselaele, ala kua tutuu ake ke taui au.

⁸ Ti na too loa e Akase le aulo mo le paaga ala na tuku i le fale o le Eteleno ti mo koloa o le fale o le sau, ti na fakamomoli loa e ia latou ko se moliga ki le sau o Asilia.

⁹ Na tali loa a ia e le sau o Asilia ; ti na pale ake loa a ia, o taui Tamaso o maua, ti na ave popula loa e ia le kakai mei ai ki Kile, ti na tamate loa e ia Letisini.

¹⁰ Na ano loa le sau ko Akase ki Tamaso ki mua o Tikalate-Pilesele, sau o Asilia. I le tio loa a Akase ki le aletale leia na tuu i Tamaso, na fakamomoli loa e ia ki le tagata faisakilifisio ko Uli le paaki o le aletale lena.

¹¹ Ti na fakatuu loa e le tagata faisakilifisio ko Uli se aletale o tatau oki mo le paaki leia na fakamomoli ake e le sau ko Akase mei Tamaso, ti na fai loa a ia e le tagata faisakilifisio ko Uli i mua o le toe liliu ake a le sau ko Akase mei Tamaso.

¹² I le kaku ake loa a le sau mei Tamaso, na tio loa a ia ki le aletale, ti na fakafeofi ake loa a ia ki ai, o pale ki ai ;

¹³ na tutu loa e ia lana failaulau mo lana moliga, ti na liligi loa e ia ana moliga vino, ti na liligi loa e ia le toto o ana sakilifisio fakafetai i aluga o le aletale.

¹⁴ Na fakamamao loa e ia mei mua o le fale tapu le aletale sila leia na tuu i mua o le Eteleno, o tupu ke aua na tuu a ia i le vasa o le aletale foou mo le fale tapu o le Eteleno ; ti na fakatuu loa e ia le aletale sila i tafa o le aletale foou, ki le potu noleto.

¹⁵ Ti na tuku loa e le sau ko Akase le fakatotonu leinei ki le tagata faisakilifisio ko Uli : Tutu i le aletale lasi le failaulau o le usu mo le failaulau o le afiafi, le failaulau a le sau mo lana moliga, mo failaulau a le kakai katoa o le fenua ti mo alatou moliga, liligi ki ai alatou moliga vino, ti liligi foki ki ai le toto o failaulau fuli mo le toto o sakilifisio fuli ; kae ki le aletale sila, e kau tokaga loa ki ai.

¹⁶ Na mulimuli katoa loa le tagata faisakilifisio ko Uli ki le nea leia na fakatotonu e le sau ko Akase.

¹⁷ Ti na maumaui loa e le sau ko Akase a fa vae o le aletale sila, kae siki loa e ia mei ai a tanakiaga vai ala na teki i aluga. Na tuku loa e ia ki lalo le tai mei aluga o pipi sila ala na amo ia, ti na tuku loa e ia le tai ki le kele faliki fatu.

¹⁸ Na fetogi loa e ia i le fale o le Eteleno, o tupu ko le sau o Asilia, le matapa o le Sapato leia na toe fakatuu, ti mo le matapa o le sau.

¹⁹ Ko le toe o gaoi a Akase mo nea fuli ala na fai e ia, pe leaise tosi a ia i le tosi fakamatala ki sau o Suta.

²⁰ Na mate loa Akase ti na tanu loa a ia mo ona tamana i le kolo o Tavite. Ti na sau loa Esekiasi, lona vosa, o fetogi a ia.