Lua tosi o Sau 15 - Tosi Tapu

Asalia (Osiasi), sau o Suta

¹ I le kau lua tupu fitu fetuu o le sau o Selopoamo i Iselaele, na sau loa Asalia, vosa o Amatesia i Suta.

² Na fetuu kau agafulu tupu ono a ia i le temi leia na sau ai a ia, ti na sau a ia i fetuu e kau lima tupu lua i Selusalemi. Na igoa lona tinana ko Sekolia mei Selusalemi.

³ Na fai e Asalia le nea leia e totonu i mua o le Eteleno, ofaipe Amatesia lona tamana.

⁴ Kae na leaise puli loa a ganea taualuga ; na soko atu loa e le kakai lalatou momoli ni sakilifisio mo ni nea fakamanogi i ganea ana.

⁵ Na tautea loa e le Eteleno le sau, ti na kilia loa a ia mei le aso lena o kaku ki lona mate, ti na nofo a ia i se fale leia na tuu kese. Ti na pule loa Sotame, vosa o le sau ki le fale, ti na fakamaaui e ia le kakai o le fenua.

⁶ Ko la ake gaoi a Asalia, mo nea fuli ala na fai e ia, pe leaise tuu a ia i le tosi fakamatala ki sau o Suta ?

⁷ Na mate loa Asalia ti na tanu loa a ia mo ona tamana i le kolo o Tavite. Ti na sau loa Sotame, lona vosa, o fetogi a ia.

Ko Sakalia, sau o Iselaele

⁸ I le fetuu kau tolu tupu valu o le sau o Asalia, sau o Suta, na sau loa Sakalia, vosa o Selopoamo, i Samalia ki Iselaele. Na sau loa a ia i masina e ono.

⁹ Na fai loa e Sakalia le nea leia e veli ki mata o le Eteleno, ofaipe e ona tamana ; na leaise tiaki loa e ia a agasala a Selopoamo, vosa o Nepate, leia na fakaagasalai ia Iselaele.

¹⁰ Na fono loa Salume, vosa o Sapesi, ke tamate a ia, ti na taai loa e ia a ia i mua o le kakai, o mate ai loa ; ti na sau loa a ia, o fetogi Sakalia.

¹¹ Ko le toe o gaoi a Sakalia, pe se tosi i le tosi fakamatala ki sau o Iselaele ?

¹² Koia na soko ia loa le nea leia na fakasa fakatomua e le Eteleno kia Seu, o pati : E ekeeke loa ou vosa i le ekeekeaga fakasau o Iselaele, o kaku ki le fa o tautupu.

Salume, Menaemi, Salume, sau o Iselaele

¹³ Na sau loa Salume, vosa o Sapesi, i le fetuu kau tolu tupu iva o le sau o Osiasi i Suta. Na sau loa a ia i le masina e tasi i Samalia.

¹⁴ Na pale ake loa a Menaemi, vosa o Kati, mei Tilesa ki Samalia, o tamate a Salume, vosa o Sapesi i Samalia ; ti na sau loa a Menaemi, o fetogi a ia.

¹⁵ Ko le toe o gaoi a Salume, mo le tukipo leia na kauakii e ia, pe leaise tosi a ia i le tosi fakamatala ki sau o Iselaele ?

¹⁶ Ti na taai loa e Menaemi le kolo ko Tifesake, mo le kakai katoa leia na nofo i ai, mo lona fenua katoa mei Tilesa ki Tifesake ; na taai loa e ia o tupu na leaise fakamavaa e ia ona matapa, ti na fakapaisi loa e ia a manava o fafine fuli na tinanae.

¹⁷ I le fetuu kau tolu tupu iva o le sau o Asalia i Suta, na sau loa Menaemi, vosa o Kati i Iselaele. Na sau loa a ia i fetuu e kau agafulu i Samalia.

¹⁸ Na fai loa e ia le nea leia e veli ki mata o le Eteleno ; i le temi katoa o lona mauli, na leaise tiaki loa e ia a agasala a Selopoamo, vosa o Nepate, leia na fakaagasalai ia Iselaele.

¹⁹ Na au loa a Pulu, sau o Asilia, ki le fenua ; ti na soli loa e Menaemi kia Pulu a tane paaga e kau tolu, o tupu ke tokoi ake a ia ki le fakamakeke o lona puleaga i ona lima.

²⁰ Na tae loa e Menaemi le paaga lena ia latou fuli o Iselaele ala na mou koloa, ke soli a ia ki le sau o Asilia ; na fakamaua e ia ke soli e le tagata taki toka tasi ni fa sikele paaga e kau lima. Na toe liliu loa le sau o Asilia, ti na leaise nofo loa a ia i le fenua.

²¹ Ko le toe o gaoi a Menaemi, a nea fuli ala na fai e ia, pe leaise tosi i le tosi fakamatala ki sau o Iselaele.

²² Na mate loa Menaemi. Ti na sau loa Pekasia, lona vosa, o fetogi a ia.

²³ I le fetuu kau lima o le sau o Asalia i Suta, na sau loa Pekasia, vosa o Menaemi, ki Iselaele, i Samalia. Na sau loa a ia i fetuu e lua.

²⁴ Na fai loa e Pekasia le nea leia e veli ki mata o le Eteleno ; na leaise tiaki loa e ia a agasala a Selopoamo, vosa o Nepate, leia na fakaagasalai ia Iselaele.

²⁵ Na fono loa Pekase, vosa o Lemalia, lana pule solia, ke tamate a ia ; ti na tamate loa a ia e Pekase i Samalia i le potu tapu o le fale o le sau, felaaki mo Alekopi ti mo Alia ; na ano a ia mo se kau tagata e tino lima i vosa o le kau Kalaate. Na tamate loa e ia Pekasia, kae sau loa a ia, o fetogi a ia.

²⁶ Ko le toe o gaoi a Pekasia, a nea fuli ala na fai e ia, pe leaise tosi a ia i le tosi fakamatala ki sau o Iselaele ?

²⁷ I le fetuu kau lima tupu lua o le sau o Asalia i Suta, na sau loa Pekase, vosa o Lemalia, i Samalia ki Iselaele. Na sau loa a ia i fetuu e kau lua.

²⁸ Na fai loa e Pekase le nea leia e veli ki mata o le Eteleno ; na leaise tiaki loa e ia a agasala a Selopoamo, vosa o Nepate, leia na fakaagasalai ia Iselaele.

²⁹ I le temi o Pekase, sau o Iselaele, na au loa Tikalate-Pilesele, sau o Asilia, o too Isone, mo Apele-Pete-Maaka, mo Sanoake, mo Ketesi, mo Atesoa, mo Kalaate, mo fenua o Kalilea, mo le fenua katoa o Nefetali, ti na ave popula loa e ia ona kakai ki Asilia.

³⁰ Na fai loa e Ose, vosa o Ela, se fono ke tamate Pekase, vosa o Lemalia. Na taai loa e ia Pekase o mate ; ti na sau loa a ia, o fetogi a ia, i le kau lua fetuu o le sau o Sotame, vosa o Osiasi.

³¹ Ko le toe o gaoi a Pekase mo nea fuli ala na fai e ia, pe leaise tosi a ia i le tosi fakamatala ki sau o Iselaele ?

Sotame, sau o Suta

³² I le fetuu lua o le sau o Pekase, vosa o Lemalia, sau o Iselaele, na sau loa Sotame, vosa o Osiasi, i Suta.

³³ Na sau a ia i lona fetuu kau lua tupu lima, ti na sau loa a ia i fetuu e kau agafulu tupu ono i Selusalemi. Na igoa lona tinana ko Selusa, taine o Satoke.

³⁴ Na fai loa e Sotame le nea leia e totonu i mata o le Eteleno ; na gaoi katoa a ia pe le gaoi a Osiasi, lona tamana.

³⁵ Kae na leaise puli loa a ganea taualuga ; na soko atu e le kakai le momoli o ni sakilifisio mo ni nea fakamanogi i ganea ana. Na fau loa e Sotame le matapa aluga o le fale o le Eteleno.

³⁶ Ko le toe o gaoi a Sotame mo nea fuli ala na fai e ia, pe leaise tosi a ia i le tosi fakamatala ki sau o Suta ?

³⁷ I le temi lena, na kamata kakau mai loa e le Eteleno ki Suta a Letisini, sau o Silia, mo Pekase, vosa o Lemalia.

³⁸ Na mate loa Sotame, ti na tanu loa a ia mo ona tamana i le kolo o Tavite, lona tamana. Ti na sau loa Akase, lona vosa, o fetogi a ia.