Lua tosi o Sau 14 - Tosi Tapu

Amatesia, sau o Suta

¹ I le fetuu lua o le sau o Soasi, sau o Iselaele, vosa o Soakase, na sau loa Amatesia, vosa o Soasi, i Suta.

² Na sau Amatesia i lona fetuu kau lua tupu lima, ti na sau loa a ia i fetuu e kau lua tupu iva i Selusalemi. Na igoa lona tinana ko Soatana, mei Selusalemi.

³ Na fai loa e Amatesia le nea leia na totonu ki mata o le Eteleno, kae na leaise tatau mo Tavite, lona tamana ; na fai katoa loa e ia a nea ala na fai e Soasi, lona tamana.

⁴ Kae na leaise puli loa a ganea taualuga ; na soko atu e le kakai lalatou momoli ni sakilifisio mo ni nea fakamanogi i ganea ana.

⁵ I le temi na makeke ai le puleaga i ona lima, na tamate loa e Amatesia ana tagata fakasausau ala na tamate ia le sau, lona tamana.

⁶ Kae na leaise tamate loa e ia a vosa o tagata tukipo ana, o mulimuli ki le nea leia e tosi i le tosi o le lao a Moisese, leia kua fakasa ai e le Eteleno le fakatotonu leinei : E leaise tamate loa a tamana o tupu ko fanau, ti e leaise tamate loa a fanau o tupu ko tamana ; kae e tamate loa le tagata taki toka tasi ki lana agasala.

⁷ Na tamate loa e ia a tagata Etome e tino agafulu afe, i le vaivailiua o le patai ; i le tau, na too loa e ia le kolo ko Sela, ti na fakaigoa loa e ia ko Soketeele, igoa na taupau loa e ia o kaku mai ki le aso nei.

⁸ Ti na kakau loa e Amatesia ni tagata avelogo kia Soasi, vosa o Soakase, vosa o Seu, sau o Iselaele, o pati kiate ia : Au, ke ta tau !

⁹ Ti na kakau loa e Soasi, sau o Iselaele, ke pati kia Amatesia, sau o Suta : Na kakau loa e le vao talatala o Lipane ke pati ki le sete o Lipane : Soli mai lou taine ke avaga mo loku vosa ! Ti na nake loa a manu fekai ala na nofo i Lipane, o takatakafi le vao talatala.

¹⁰ Na ke tamate le kau Etome, ti kua malaga lou loto ki aluga. Fakafiafia ki lou malo, ti ke nofo i lou fenua. Kolea e ke oso ai ki se nea fakatupu tutamaki, leia e aumai ia loa le malaia kiate koe mo Suta ?

¹¹ Kae na leaise fakalogo loa Amatesia ki le nea lena. Ti na pale mai loa a Soasi, sau o Iselaele ; ti na la fesoko loa, a ia mo Amatesia, sau o Suta, i Pete-Semesi, leia e kau ki Suta.

¹² Na lava loa Suta i Iselaele, ti na tasi sola loa le tagata ki lona falela.

¹³ Na too loa e Soasi, sau o Iselaele, i Pete-Semesi, a Amatesia, sau o Suta, vosa o Soasi, vosa o Akasia. Na au loa Soasi ki Selusalemi, o fai se fa pu leia na meta kau lelau lua lona loa i le paa o Selusalemi, mei le matapa o Efalaimi o kaku ki le matapa i le tifi.

¹⁴ Na too loa e Soasi le aulo, mo le paaga fuli, mo ipu fuli ala na tuku i le fale o le Eteleno, ti mo koloa o le fale o le sau ; na toe too foki e ia se kau popula, ti na toe liliu loa a ia ki Samalia.

¹⁵ Ko le toe o gaoi fuli a Soasi, a nea ala na fai e ia, ana gaoi lalasi ti mo lana tau mo Amatesia, sau o Suta, pe leaise tosi a ia i le tosi fakamatala ki sau o Iselaele ?

¹⁶ Na mate loa Soasi ti na tanu loa a ia mo ona tamana i Samalia. Ti na sau loa Selopoamo, lona vosa, o fetogi a ia.

Asalia, sau o Suta

¹⁷ Na mauli loa Amatesia, sau o Suta, vosa o Soasi, i fetuu e kau agafulu tupu lima i le oki o le mate o Soasi, vosa o Soakase, sau o Iselaele.

¹⁸ Ko le toe o gaoi a Amatesia, pe leaise tosi a ia i le tosi fakamatala ki sau o Suta ?

¹⁹ Na fono loa i Selusalemi ke tamate a ia, ti na sola loa a ia ki Lakisi ; kae na tuli loa a ia i Lakisi, o tamate.

²⁰ Na ave loa a ia i ni osi, ti na tanu loa a ia i Selusalemi mo ona tamana, i le kolo o Tavite.

²¹ Ti na too loa e le kakai katoa o Suta a Asalia, leia na fetuu kau agafulu tupu ono, o fakanofo ke sau, o fetogi lona tamana ko Amatesia.

²² Na toe laga loa e Asalia le kolo ko Elati, o toe fakaulu loa a ia ki Suta, i le oki o le mate o lona tamana.

Selopoamo II, sau o Iselaele

²³ I le fetuu kau agafulu tupu lima o le sau o Amatesia, vosa o Soasi, i Suta, na sau loa a Selopoamo, vosa o Soasi, i Samalia ki Iselaele. Na sau loa a ia i fetuu e kau fa tupu tasi.

²⁴ Na fai loa e Selopoamo le nea leia e veli ki mata o le Eteleno ; na leaise tiaki loa e ia a agasala a Selopoamo, vosa o Nepate, leia na fakaagasalai ia Iselaele.

²⁵ Na toe fai loa e Selopoamo a koiga o Iselaele, mei le uluaga i Amati o kaku ki le Tai Mate i le laumalie, o mulimuli ki le folafola leia na fakasa e le Eteleno, le Atua o Iselaele, i le gutu o lana tagata fakasausau ko Sonasi, le polofeta, vosa o Amitai, mei Kate-Efele.

²⁶ Talie na tio loa le Eteleno kua lasi ai le mamae o Iselaele ti mo lolatou popula, kae e leaise tasi fua na au o saofaki latou.

²⁷ Kae na leaise loto le Eteleno ke soloi le igoa o Iselaele i lalo o le lagi, ti na saofaki loa e ia latou i le lima o Selopoamo, vosa o Soasi.

²⁸ Ko le toe o gaoi a Selopoamo, a nea fuli ala na fai e ia, ana gaoi lalasi i le tau, lana aumai Tamaso mo Amati ala na fakalogo kia Suta, ke fakalogo ki Iselaele, pe leaise tosi a ia i le tosi fakamatala ki sau o Iselaele ?

²⁹ Na mate loa Selopoamo, ti na tanu loa a ia mo sau o Iselaele. Ti na sau loa Sakalia, lona vosa, o fetogi a ia.