Lua tosi o Sau 13 - Tosi Tapu

Soakase, sau o Iselaele

¹ I le fetuu kau lua tupu tolu o le sau o Soasi, vosa o Akasia, i Suta, na sau loa Soakase, vosa o Seu, i Samalia ki Iselaele. Na sau a ia i fetuu e kau agafulu tupu fitu.

² Na fai loa e Soakase le nea leia e veli ki mata o le Eteleno ; na fai loa e ia a agasala ala na fai e Selopoamo, vosa o Nepate, leia na fakaagasalai ia Iselaele, ti na leaise maliu a ia mei ai.

³ Na vilo loa le sausau o le Eteleno ki Iselaele, ti na tuku loa e ia latou ki lima o Asaele, sau o Silia, ti mo lima o Pene-Atate, vosa o Asaele, i le temi katoa na mauli ai a sau ana.

⁴ Na tagi loa Soakase ki le Eteleno. Ti na tali loa e le Eteleno lana kole, talie na tio a ia ki le fakapopulai o Iselaele e le sau o Silia,

⁵ ti na soli loa e le Eteleno se fakamauli ki Iselaele. Na sao ai loa a fanau o Iselaele mei lima o le kau Silia, ti na lotou nonofo loa i olatou falela ofaipe mua.

⁶ Kae na leaise lotou tiaki loa a agasala o le fale o Selopoamo, leia na fakaagasalai ia Iselaele ; ti na lotou toe muli loa i ai ; ti na tuu foki le fakatata o Asetalate i Samalia.

⁷ Na fakamauli loa e le Eteleno ni kau tagata ekeosi e tino lima i le kakai katoa o Soakase, mo saliote e kau agafulu ti mo ni kau tagata solia lalo e tino agafulu afe ; talie na tamate loa latou e le sau o Silia, ti na fakaliliu e ia latou ofaipe le efu leia e takatakafi ki vae.

Mate o Soakase ; Sau o Soasi i Iselaele

⁸ Ko le toe o gaoi a Soakase, a nea fuli ala na fai e ia ti mo ana gaoi lalasi, pe leaise tosi a nea fuli ana i le tosi fakamatala ki sau o Iselaele.

⁹ Ti na mate loa Soakase ti na tanu loa a ia mo ona tamana i Samalia. Ti na sau loa Soasi, lona vosa, o fetogi a ia.

¹⁰ I le fetuu kau tolu tupu fitu o le sau o Soasi i Suta, na sau loa Soasi, vosa o Soakase i Samalia ki Iselaele. Na sau a ia i fetuu e kau agafulu tupu ono.

¹¹ Na fai loa e Soasi le nea leia e veli ki mata o le Eteleno ; na leaise tiaki loa e ia a agasala a Selopoamo, vosa o Nepate, leia na fakaagasalai ia Iselaele, kae na muli a ia ia latou ofaipe Selopoamo.

¹² Ko le toe o gaoi a Soasi mo nea fuli ala na fai e ia, ana gaoi lalasi ti mo le tau leia na fai e ia kia Amatesia, sau o Suta, pe leaise tosi a nea ana i le tosi fakamatala ki sau o Iselaele ?

¹³ Na mate loa Soasi. Ti na sau loa Selopoamo, o fetogi a ia. Na tanu loa Soasi i Samalia mo sau o Iselaele.

Tui ikiiki o Soasi ; mate o Eliseo

¹⁴ Na maua loa Eliseo e le masaki leia na mate ai ; na ifo loa Soasi, sau o Iselaele, o tagi ki ona mata, o pati : Loku tamana ! loku tamana ! Saliote o Iselaele mo lana kau solia ekeosi !

¹⁵ Na pati loa Eliseo kiate ia : Too se kalolo mo ni gasau. Ti na too loa e le sau se kalolo mo ni gasau.

¹⁶ Ti na pati loa Eliseo ki le sau o Iselaele : Fa lou lima ki le kalolo. I le fa loa a le sau ki le kalolo, na teki loa e Eliseo ona lima ki lima o le sau,

¹⁷ o pati : Fakamavaa le katupa ki le potu esite, ti na fakamavaa loa e ia le katupa. Na pati loa Eliseo : Kaloloi. Ti na kaloloi loa e ia. Na pati loa Eliseo : Ko se gasau lena o le fakamauli a le Eteleno, ko se gasau o le fakamauli mei le kau Silia ; e ke malo loa i le kau Silia i Afeke, e ke tamate loa latou.

¹⁸ Na toe pati loa Eliseo : Too a gasau. Ti na too loa e ia a gasau. Na pati loa a Eliseo ki le sau o Iselaele : Taai a gasau ki le kele. Ti na taai loa e ia o tua tolu, ti na tuku loa e ia.

¹⁹ Na ita loa le tagata a le Atua kiate ia, o pati : Na tonu ke ke taai o tua lima pe tua ono ; ti e ke taui loa le kau Silia o kaku ki lolatou maumaui ; i le lakaga nei, e ke malo loa o tua tolu fai ia latou.

²⁰ Na mate loa Eliseo, ti na tanu loa a ia. I leia ake fetuu, na ulu loa ni fa solia Moape ki le fenua.

²¹ Ti na soko loa i le temi leia na tanu ai se mate, ko leinei, na tio loa ki se kau solia o le solia a Moape, ti na ti loa le mate ki le tanuma o Eliseo. Na ano loa le mate o lave ki ivi o Eliseo, ti na toe mauli loa a ia, o tuu ki aluga i ona vae.

²² Na fakamakeke Iselaele e Asaele, sau o Silia, i le mauli katoa o Soakase.

²³ Kae na manava alofa loa le Eteleno kia latou, ti na tio loa ona mata kia latou o tupu ko lana sai mo Apalaamo, mo Isaake, mo Sakopo, na leaise loto loa a ia ke maumaui latou, ti na leaise tiaki loa e ia latou o kaku mai ki le aso nei.

²⁴ Na mate loa Asaele, sau o Silia, ti na sau loa Pene-Atate, lona vosa, o fetogi a ia.

²⁵ Na toe too loa e Soasi, vosa o Soakase, mei lima o Pene-Atate, vosa o Asaele, a kolo ala na too e Asaele mei lima o Soakase, lona tamana, i le tau. Na malo tua tolu Soasi ia Pene-Atate, ti na toe maua loa e ia a kolo o Iselaele.