Lua tosi o Koloniko 9 - Tosi Tapu

Salomone mo le fafine sau o Sepa

¹ Na logo loa le fafine sau o Sepa ki le logologona o Salomone, ti na au loa a ia ki Selusalemi ke asiasii le poto o Salomone ki ni vesili faigataa. Na au a ia mo se toka api o ana kau tagata fakasausau, mo se kau kamelo leia na fetuku ia ni nea fakamanogi, mo se aulo lasi ai, ti mo ni fatu mauiga. Na ano loa le fafine sau o Sapa ki le sau ko Salomone, ti na fai loa e ia kiate ia ana vesili fuli ala na maua i lona loto.

² Na tali loa Salomone ki ana vesili fuli, ti na leaise nea fua na leaise mafai ke fakamatala e Salomone kiate ia.

³ Na tio loa le fafine sau o Sepa ki le poto o Salomone ti mo le fale leia na fakatuu e ia,

⁴ mo nea kai o lona laupapa, mo le fakanofonofo o ana kau tagata fakasausau, mo tuulaga mo teu o latou ala na tausi kiate ia, mo latou ala na tokaga ki nea kai mo nea inu mo olatou teu, ti mo lana pale i le takakega leia e pale ki le fale o le Eteleno.

⁵ Na sevaia loa a ia, o pati ki le sau : Ta e maoki ai le nea leia na kau logo ki ai i loku fenua o uiga mo lou mauiga mo lou poto !

⁶ Na leaise kau tui ki le nea leia na patii, i mua o laku au, o tio totonu oku mata. Ti ko leinei na leaise fakamatala mai kiate au le vaelua o le lasi o lou poto. E ke fakalaka mamao ake i le nea leia na kau logo ki ai.

⁷ Manuia au tagata fakasausau, a tagata fuli o lou fale sau, ala e nonofo tuumau i ou mua o logo ki lou poto !

⁸ Ke fakafetai ki le Eteleno, lou Atua, leia kua tuku ia le kalasia kiate koe ke fakanofo a koe ko le sau ki le Eteleno, lou Atua ! O tupu e alofa lou Atua ki Iselaele ti e loto a ia ke tuu a ia o lee gato, koia na fakanofo ai e ia a koe ke sau kiate ia, o tupu ke ke fakamaaui latou i le faitotonu.

⁹ Na soli loa e le fafine sau o Sepa ki le sau a tane aulo e tolu mo le vaelua, mo ni nea fakamanogi lasi ai, ti mo ni fatu mauiga. Na leaise toe lasi ake loa ni nea fakamanogi i nea fakamanogi ala na soli ki le sau ko Salomone e le fafine sau o Sepa.

¹⁰ Ko tagata fakasausau a Ilame mo tagata fakasausau a Salomone, ala na aumai ia loa se aulo mei Ofile, na toe aumai ia foki ni asi mo ni fatu mauiga.

¹¹ Na fai loa e le sau ki le asi ni kakega ki le fale o le Eteleno mo le fale o le sau, mo ni alepe mo ni lute ki le kau sua. Na leikiaise tio i mua ki ni nea fenaaki i le fenua o Suta.

¹² Na soli loa e le sau ko Salomone ki le fafine sau o Sepa a nea fuli ala na loto a ia ki ai, mo nea fuli ala na kole e ia, o lasi ake i nea ala na aumai e ia ki le sau. Ti na toe liliu loa a ia ki lona fenua mo ana tagata fakasausau.

Koloa o Salomone, mo lona mauiga

¹³ Ko le mamafa o le aulo leia na aumai kia Salomone i le fetuu taki tasi ko tane e kau lua,

¹⁴ kae na leaise lau le aulo o tukusau mei le kau fai koloa, ti mo le aulo mo le siliva leia na aumai e sau o Alapia mo kovana o le fenua.

¹⁵ Na fai loa e le sau ko Salomone ni paletau aulo lalasi e kau lelau lua, o fakaaoga loa e ia ki le paletau e tasi ni kilo aulo e ono,

¹⁶ ti mo ni iki ake paletau aulo liliki e kau lelau tolu, o fakaaoga ki le paletau e tasi ni kilo aulo e tolu ; ti na tuku loa e le sau a nea ana ki le fale o le Vaomatua o Lipane.

¹⁷ Na fai loa e le sau se ekeekeaga fakasau ki le lei, o kofu a ia ki le aulo mea.

¹⁸ Na maua e le ekeekeaga lena ni fa takakega e ono, ti mo se tekiaga vae aulo, leia na pipiki ki le ekeekeaga ; na i ai ni tekiaga lima i fetuu o le ekeekeaga ; na tutuu ni laione e lua o ofi ki tekiaga lima,

¹⁹ ti na tutuu ni laione e kau agafulu tupu lua i fa takakega e ono, o taki ono i le fetuu taki tasi. Na leikiaise fai se nea felaaki i se tasi ake puleaga.

²⁰ Na gaoi ki le aulo a ipu fuli o le sau ko Salomone, ti na gaoi ki le aulo a ipu fuli o le fale o le Vaomatua o Lipane. Na leaise gaoi se nea ki le siliva : talie na leaise lau le siliva ko se nea mauiga i le temi o Salomone.

²¹ Talie na ano ni folau a le sau ki Talesisi o fakatasi mo tagata fakasausau a Ilame ; ti na au tua tasi i fetuu e tolu mei Talesisi ni vaka kua apele i le aulo, mo le siliva, mo le lei, mo ni geli, ti mo ni manu lele.

²² Na lasi ake le mou koloa mo le poto o le sau ko Salomone i sau fuli o le kele.

²³ Na oli a sau fuli o le kele ke tio kia Salomone, o tupu ke lotou logo ki le poto leia na tuku e le Atua ki lona loto.

²⁴ Ti na lotou tasi aumai lona nea alofa, ni nea siliva, mo ni nea aulo, mo ni kofu, mo ni masafu, mo ni nea fakamanogi, mo ni osi, mo ni asino, ti na fai fenaaki i fetuu fuli.

²⁵ Na maua e Salomone ni nofoaga osi e afe fa ki osi ala na fakatuutuu ki ana saliote, ti mo kau tagata ekeosi e tino agafulu tupu lua afe ala na fakanonofo loa e ia i kolo ala na tanaki ai ana saliote ti mo Selusalemi ke ofi ki le sau.

²⁶ Na pule a ia ki sau fuli, mei le vaitafe ko le Eufalate o kaku ki le fenua o le kau Filisitini, o kaku ki le koiga o Esipito.

²⁷ Na fakaliliu loa e le sau le siliva i Selusalemi ke tatau mo fatu, ti mo le sete ke lasi pe le sikomole leia e tuu i le potu tokamalie o le fenua.

²⁸ Ti na aumai a osi a Salomone mei Esipito mo fenua fuli.

Mate o Salomone

²⁹ Ko le toe o gaoi a Salomone, mei le uluaki o kaku ki le fakamuli, pe leaise tosi a ia i le tosi a Natane, le polofeta, mo le folafola fakakikite a Akisa o Silo, ti mo folafola fakakikite a Seeto kia Selopoamo, vosa o Nepate ?

³⁰ Na sau loa Salomone i fetuu e kau fa i Selusalemi ki Iselaele katoa.

³¹ Ti na moe loa Salomone mo ona tamana, ti na tanu loa a ia i le kolo o Tavite, lona tamana. Ti na sau loa Lopoamo, lona vosa, o fetogi a ia.