Lua tosi o Koloniko 8 - Tosi Tapu

Kolo na laga e Salomone, mo vaka na ano ki Ofile

¹ I le sili o fetuu e kau lua ala na fakatuu ai e Salomone le fale o le Eteleno mo lona fale totonu,

² na toe laga loa e Salomone a kolo ala na soli kiate ia e Ilame ti na fakanofo loa e ia ki ai a fanau a Iselaele.

³ Na ano loa Salomone o taui le kolo ko Amati i Tesopa, ti na maua loa e ia a ia.

⁴ Na laga loa e ia le kolo ko Tatemoli i le toafa, ti mo kolo fuli ala na tanaki ai a koloa i Amate.

⁵ Na laga loa e ia a Pete-Oloni aluga mo Pete-Oloni lalo, kolo tau, ala na takatakai e ni paa, mo ni matapa, ti mo ni fakamaumau ukamea ;

⁶ mo Paalati, mo kolo fuli ala na tanaki ai ona koloa, mo kolo ala na tanaki ai ana saliote tau, mo kolo ala na fakanonofo ai ana kau osi, ti mo nea fuli ala na loto a Salomone ke fakatuu i Selusalemi, mo Lipane, ti mo le fenua katoa o lona puleaga.

⁷ Ko le kakai katoa leia na toe mei le kau Eti, mo le kau Amole, mo le kau Felesi, mo le kau Evi, mo le kau Sepusi, ala na leaise kau ki Iselaele,

⁸ mo olatou sakoga ala na toe i olatou muli i le fenua ti na leaise maumaui e fanau a Iselaele, na fakanofo loa latou e Salomone ki ni fatogia fakafenua o kaku mai ki le aso nei.

⁹ Na leaise fakaaoga fua e Salomone se tasi o fanau a Iselaele ki fatogia ana, talie ko ni tagata tau latou, mo ana kau pule, mo ana kau pule solia, mo ana kau tagata taki saliote, ti mo ana kau tagata ekeosi.

¹⁰ Ko pule ala na fakanofo e Salomone ke takitaki ia le kakai mo leoleo ia latou, na tino lelau lua mo le tino lima.

¹¹ Na avake loa e Salomone le taine o Falaone mei le kolo o Tavite ki le fale leia na fakatuu e ia ; talie na pati loa a ia : E leaise nofo loa laku avaga i le fale o Tavite, sau o Iselaele, talie e tapu a ganea ala kua ulu ki ai le aleka o le Eteleno.

¹² Ti na momoli loa e le sau ko Salomone ni failaulau ki le Eteleno i le aletale o le Eteleno, leia na fakatuu e ia i mua o le uluaga o le fale tapu.

¹³ Na momoli e ia le nea leia na fakatotonu e Moisese ki le aso taki tasi, mo sapato, mo masina foou, ti mo aso lalasi, o tua tolu i le fetuu, mo le aso lasi o pane sala fakatupu, mo le aso lasi o vasaa, ti mo le aso lasi o falela.

¹⁴ Na fakanofo loa e ia ki olatou tuulaga, o mulimuli ki le nea leia na fakatuutuu e Tavite, lona tamana, a lakaga o le kau tagata faisakilifisio o mulimuli ki alatou kavega, mo le kau Levi o mulimuli ki alatou gaoi, ala ko le sua o fakavikiviki o le Eteleno mo fai i aso taki tasi le tausi i tafa o le kau tagata faisakilifisio, ti mo le kau tuu matapa ala na vaevae ki matapa o mulimuli ki olatou lakaga ; talie na fenaaki lona fakatotonu e Tavite, tagata a le Atua.

¹⁵ Na leaise mavae kese loa mei le fakatotonu a le sau ki le kau tagata faisakilifisio, mo le kau Levi, mo koloa, mo se faasiga nea fua.

¹⁶ Na fenaaki le fakasoko o le gaoi katoa a Salomone, mei le aso leia na kamata ai o kaku ki le aso leia na fakaoki ai le fale o le Eteleno. Ti na oki loa le fale o le Eteleno.

¹⁷ Na ano loa Salomone ki Etesoni-Kepele mo Elote, i le mata tai, i le fenua o Etome.

¹⁸ Ti na kakau loa e Ilame kiate ia ana tagata fakasausau mo ni vaka, ti mo ni tagata poto i le tai. Na lotou ano loa mo tagata fakasausau a Salomone ki Ofile, ti na lotou aumai loa mei ai ni tane aulo e kau agafulu tupu tolu ki le sau ko Salomone.