Lua tosi o Koloniko 5 - Tosi Tapu

Tuku o le aleka ki le sagatualio

¹ Ti na oki katoa loa le gaoi leia na fai e Salomone ki le fale o le Eteleno. Ti na aumai loa e ia le siliva, mo le aulo, mo nea gaoi fuli ala na fakatapui e lona tamana ko Tavite, ti na tuku loa e ia latou ki koloa o le fale o le Atua.

² Ti na fakatasii mai loa e Salomone ki Selusalemi le kau matua o Iselaele ti mo pule fuli o faasiga, a pule famili o fanau a Iselaele, ke amo mei le kolo o Tavite ko Sione, le aleka o le sai a le Eteleno.

³ Koia na fakatasi ake loa a tagata fuli o Iselaele ki le sau ki se katoaga, leia na fai loa i le fitu o masina.

⁴ I le kaku ake loa a le kau matua fuli o Iselaele, na amo loa e le kau Levi le aleka.

⁵ Na lotou amo loa le aleka, mo le falela taputapu, mo nea gaoi tapu fuli ala na tuku i loto o le falela tapu : ko le kau tagata faisakilifisio mo le kau Levi ala na amo ia loa latou.

⁶ Na tutuu loa i mua o le aleka le sau ko Salomone mo le kakai katoa o Iselaele leia na fakatasii ake kiate ia. Na lotou momoli loa ni ovi mo ni pipi ala na leaise mafai ke lau, o tupu ko le lasi ai.

⁷ Na ave loa e le kau tagata faisakilifisio le aleka o le sai a le Eteleno ki lona tukuaga, i le sagatualio o le fale tapu, i le potu taputapu, i lalo o kapakau o selupino.

⁸ Na folasi loa e selupino ola kapakau i aluga o le tukuaga o le aleka, ti na la uufi loa le aleka mo ona laakau amo.

⁹ Na fakaloloa loa a laakau amo ke feala ke tio ki ola potupotu o mamao mo le aleka mei le matapa ulu, kae na leaise mafai ke tio ki ai mei fafo. Na tuku loa i ai le aleka o kaku mai ki le aso nei.

¹⁰ Na tuku tefua i loto o le aleka a fatu e lua o le lao ala na tuku ki ai e Moisese i Olepe, i le temi leia na fai ai e le Eteleno lana sai mo fanau a Iselaele, i lalatou mavae mei Esipito.

¹¹ I le mavae loa a tagata faisakilifisio mei le potu taputapu, - talie na fakamea fuli a tagata faisakilifisio fuli ala na kau i ai, kae na leaise lotou mulimuli loa ki le fakaoloolo masani o kalasi,

¹² ti ko Levi fuli ala na sua, Asafe, mo Emane, mo Setutune, mo olatou vosa ti mo olatou fetaina, na lotou kofu loa ki olatou kofu tetea, ti na lotou tutuu loa i le potu esite o le aletale mo ni pa, mo lute, mo alepe ; ti na tutuu loa i olatou tafa a tagata faisakilifisio e tino lelau e lua ala na pupusi ia a fakatagi pupusi, -

¹³ na soko loa i le lakaga leia na kau fakatasi ai loa le kau pupusi fakatagi mo le kau sua, ke lotou leo tasi i le sua mo le fakafetai ki le Eteleno ; ti na lotou siki fakatasi ake loa olatou leo mo fakatagi pupusi, mo pa, mo la ake a nea fai musika, o sua ki le Eteleno : Talie e agamalie a ia, talie e lee gato lona manava alofa ! I le temi lena na fakaapele loa le fale ki se ao, io le fale o le Eteleno.

¹⁴ Na leaise feala loa ke toe nonofo le kau tagata faisakilifisio i loto o fai le tausi, o tupu ko le ao ; talie na fakaapele e le kololia o le Eteleno le fale o le Atua.