Lua tosi o Koloniko 4 - Tosi Tapu

Fau o le aletale sila, mo le tai sila, mo ipu o le fale tapu

¹ Na fai loa e ia se aletale sila, leia na meta kau agafulu lona loa, ti meta kau agafulu lona laulasi, ti meta lima lona taualuga.

² Na fai loa e ia le tai ki le sila na saka. Na meta lima mei leia laugutu ki leia laugutu, ti na meta lua vaelua lona taualuga, ti na meta kau agafulu tupu lima lona takai katoa.

³ Na paaki loa i lalo o laugutu o le tai, i le takatakai katoa, ni pipi tagata, ko pipi e kau lua i le meta e tasi i atu e lua. Na kule fakatasi loa a pipi ana mo le tai ke tuu ko se nea e tasi.

⁴ Na teki loa e ia le tai ki pipi sila e kau agafulu tupu lua, ala na agaaga loa a pipi e tolu ki le noleto, mo pipi e tolu ki le uesite, mo pipi e tolu ki le saute, ti mo pipi e tolu ki le esite ; na teki loa le tai i aluga, ti na maliu loa a potu muli o pipi ki loto, i lalo o le tai.

⁵ Ko le matotolu o le tai ko le alofilima e tasi, ti na gaoi loa lona laugutu ke faipe le laugutu o se ipu inu ki ni se o le lisi. Na fakaapele loa le tai ki liti e kau lelau kau lua afe.

⁶ Na fai loa e ia ni pesini e kau agafulu, ti na tuku loa e ia a pesini e lima i le fetuu atamai, ti mo pesini e lima i le fetuu sema, o tupu ke fai ki ai a fakamea : na fufulu i ai a manu o failaulau. Na fakaaoga loa le vai o le tai ki le fakamea o le kau tagata faisakilifisio.

⁷ Na fai loa e ia ni tekiaga malama aulo e kau agafulu, o mulimuli ki le paaki na fakatotonu, ti na fakatuu loa e ia latou i loto o le fale tapu, o lima i le fetuu atamai, ti lima i le fetuu sema.

⁸ Na fai loa e ia ni laupapa e kau agafulu, o tuku latou ki loto o le kogafale lasi o le fale tapu, o lima i le fetuu atamai, ti lima i le fetuu sema. Na fai loa e ia ni ipu aulo e kau lelau.

⁹ Na fai loa e ia le lotoa o kau tagata faisakilifisio, ti mo se tasi lotoa lasi mo ona matapa, ti na kofu loa e ia ki le sila a laui matapa.

¹⁰ Na fakatuu loa e ia le tai i le fetuu atamai ki le potu saute-esite.

¹¹ Na fai loa e Ulame a tanakiaga mugalafu, mo supeti, ti mo ipu. Ti na fakaoki loa e Ulame le gaoi leia na fakatotonu e Salomone kiate ia ke fai ki le fale o le Eteleno :

¹² ko pou e lua, mo puloga e lua mo teu i aluga o pou ; mo ukamea vagavaga e lua, ke kofu ai a puloga i aluga o pou ;

¹³ mo fuai kelenati e kau lelau ki ukamea vagavaga e lua ala na kofu ia a puloga o pou ;

¹⁴ mo vae e kau agafulu o le tai, mo pesini e kau agafulu i aluga o vae ;

¹⁵ mo le tai, mo pipi e kau agafulu tupu lua ala na teki i olatou aluga ;

¹⁶ mo tanakiaga mugalafu, mo supeti, ti mo suki. Na fakatotonu e le sau ko Salomone ke fai e Ulame-Api a nea gaoi fuli ana ki le sila na saka ki le fale tapu o le Eteleno.

¹⁷ Na saka mo fakafuafua e le sau a nea ana i le laumalie o le Solotane, i se kele kula, i le vasa o Sikote mo Teseleta.

¹⁸ Na fai loa e Salomone a nea gaoi fuli ana o lasi ai : talie na leaise toe afa loa le lasi o le sila leia na fakaaoga.

¹⁹ Na toe fai foki e Salomone ni iki ake a nea gaoi ki le fale o le Eteleno : le aletale aulo ; mo laupapa ala na teki ai a pane taputapu ;

²⁰ mo tekiaga malama mo olatou malama aulo, ala na tonu ke mu i mua o le sagatualio o mulimuli ki le lekula,

²¹ mo sei laakau, mo malama, mo vavai aulo, ala na gaoi ki le aulo mea ;

²² mo sele, mo ipu loloto, mo ipu liliki, mo tanakiaga malala aulo mea ; ti mo laui matapa aulo ki le matapa i loto o le fale i le uluaga o le potu taputapu, ti mo le matapa o le fale i le uluaga o le fale tapu.