Lua tosi o Koloniko 36 - Tosi Tapu

Soakase, Sosakimi, Sosakini, sau o Suta

¹ Na too loa e le kakai o le fenua a Soakase, vosa o Sosiasi, o fakanofo ke sau o fetogi lona tamana i Selusalemi.

² Na sau Soakase i lona fetuu kau lua tupu tolu, ti na sau loa a ia i masina e tolu i Selusalemi.

³ Na fakaifo loa a ia e le sau o Esipito i Selusalemi, ti na teki loa e ia ki le fenua se tua ko fa tenalio paaga e kau lelau mo le fa tenalio aulo e tasi.

⁴ Ti na fakanofo loa e le sau o Esipito ke sau i Suta mo Selusalemi a Eliakimi, taina o Soakase ; ti na fetogi loa e ia lona igoa ki leia o Sosakimi. Na too loa e Neko lona taina ko Soakase, o ave a ia ki Esipito.

⁵ Na sau Sosakimi i lona fetuu kau lua tupu lima, ti na sau loa a ia i fetuu e kau agafulu tupu tasi i Selusalemi. Na fai loa e Sosakimi le nea leia e veli ki mata o le Eteleno, lona Atua.

⁶ Na pale loa Nepukatenesale, sau o Papilone, o taui a ia, ti na sai loa e ia a ia ki ni tini sila o ave ki Papilone.

⁷ Na ave loa e Nepukatenesale ki Papilone a nea gaoi o le fale o le Eteleno, ti na tuku loa e ia latou ki lona fale sau i Papilone.

⁸ Ko le toe o gaoi a Sosakimi, ana aga fakalialia na fai, mo nea na mafai ke tosi o uiga mo ia, e tosi le nea lena i le tosi fakamatala ki sau o Iselaele mo Suta. Ti na sau loa Sosakini, lona vosa, o fetogi a ia.

⁹ Na sau Sosakini i lona fetuu valu, ti na sau loa a ia i masina e tolu mo aso e kau agafulu i Selusalemi. Na fai loa e ia le nea leia e veli ki mata o le Eteleno.

¹⁰ I leia ake fetuu, na ave loa a ia e le sau ko Nepukatenesale ki Papilone mo nea gaoi mauiga o le fale tapu o le Eteleno. Ti na fakanofo loa e ia ke sau i Suta mo Selusalemi a Setesiasi, taina o Sosakini.

Setesiasi, sau o Suta ; maumaui o Selusalemi ; ave popula ki Papilone

¹¹ Na sau loa Setesiasi i lona fetuu kau lua tupu tasi, ti na sau loa a ia i fetuu e kau agafulu tupu tasi i Selusalemi.

¹² Na fai loa e ia le nea leia e veli ki mata o le Eteleno, lona Atua ; na leaise fakasemala a ia i mua o le polofeta ko Selemia, leia na masau kiate ia mei le Eteleno.

¹³ Na agatuu foki a ia ki le sau ko Nepukatenesale, leia na fakamaua ia a ia ke fakapapau i le suafa o le Atua ; ti na fakafefeka loa e ia lona ua mo lona loto, o leaise toe liliu a ia ki le Eteleno, le Atua o Iselaele.

¹⁴ Na toe liuga foki e le kau pule fuli o le kau tagata faisakilifisio mo le kakai alatou agatuu, o fakatatau ki aga fakalialia fuli a atu puleaga ; ti na lotou fakakelekele loa le fale o le Eteleno, leia na fakatapui e ia i Selusalemi.

¹⁵ Na tuku loa e le Eteleno, le Atua o olatou tamana, ki ana polofeta le kavega ke valoki latou koi tautonu, talie na loto a ia ke saofaki lona kakai mo lona nofoaga totonu.

¹⁶ Kae na lotou gologolo loa ki tagata fakasausau a le Atua, o leaise lotou tokaga ki ana folafola, kae lotou fakavelivelii loa ana polofeta, o kaku ki le temi leia na leaise toe maua ai loa se faitoo o le sausaua a le Eteleno ki lona kakai.

¹⁷ Koia na aumai ai loa e le Eteleno kia latou le sau o le kau Kaletea, ti na tamate loa e ia ki le seleta o lotou kau tupulaga i le fale o lolatou sagatualio ; na leaise fakasao fua e ia se tama pe ko se taine, se tagata atuatu pe ko se matua sina ; na tuku loa e ia a nea fuli ki ona lima.

¹⁸ Na ave loa e Nepukatenesale ki Papilone a nea gaoi fuli o le fale tapu o le Atua, a nea lalasi mo nea liliki, mo koloa o le fale o le Eteleno, ti mo koloa o le sau mo ana kau pule.

¹⁹ Na lotou tutu loa le fale o le Atua, na lotou maumaui loa a paa o Selusalemi, na lotou tuku loa ki le afi a nea fuli o ona fale sau mo maumaui loa a nea mauiga fuli.

²⁰ Na ave loa e Nepukatenesale o fakapopula i Papilone latou fuli ala na sao i le seleta ; ti na lotou popula loa kiate ia, kiate ia mo ona vosa, o kaku ki le pule a le puleaga o Pelesi,

²¹ o tupu ke fakasoko le folafola a le Eteleno leia na fakasa e le polofeta ko Selemia ; E tiaki loa le fenua i fetuu e kau fitu, o kaku ki le oki o lona temi malolo, ke fetogi ai a fetuu malolo ala na leaise taupau.

Fakatotonu a Silusi

²² I le uluaki fetuu o Silusi, sau o Pelesi, o tupu ke fakasoko le folafola a le Eteleno leia na fakasa e le gutu o Selemia, na fafagu loa e le Eteleno le laumalie o Silusi, sau o Pelesi, leia na fakatotonu ia loa ke fai i lona puleaga katoa le lagiaki leinei ki le masau gutu mo ni tosi :

²³ Ko leinei le masau a Silusi, sau o Pelesi : Kua soli mai kiate au e le Eteleno, le Atua o le lagi, a puleaga fuli o le kele, ti kua fakatotonu mai e ia kiate au ke fakatuu se fale kiate ia i Selusalemi i Suta. Ko ai leia ia koutou e kau ki lona kakai ? Ke nofo mo ia le Eteleno, lona Atua, ti ke pale a ia !