Lua tosi o Koloniko 35 - Tosi Tapu

Toe fai o le Pasikate

¹ Na toe fakamanatu loa e Sosiasi le Pasikate ki le Eteleno i Selusalemi, ti na tamate loa e ia le vikitima i le aso kau agafulu tupu fa o le uluaki masina.

² Na fakatuu loa e ia le kau tagata faisakilifisio ki olatou tuulaga, ti na fakalotomakeke e ia latou ki le tausi o le fale o le Eteleno.

³ Na pati loa a ia ki le kau Levi ala na ako ia Iselaele katoa ti na fakatapui ki le Eteleno : Kotou fakatuu le aleka maokioki ki le fale leia na laga e Salomone, sau o Iselaele, vosa o Tavite ; e leaise tonu ke kotou toe amo a ia i okoutou tuauma. Kotou tausi i le lakaga nei ki le Eteleno, lokoutou Atua, ti mo lona kakai ko Iselaele.

⁴ Ke kotou nofo teuteu, o mulimuli ki okoutou fale fakatamana, mo okoutou fakavaevaega, ofaipe lona tosi e Tavite, sau o Iselaele, ti mo Salomone, lona vosa ;

⁵ kotou tasi tuu ki lona tuulaga i le sagatualio, o mulimuli ki le vaevae o fale fakatamana o koutou fetaina, a vosa o le kakai, ti mo mulimuli ki le vaevae o fale fakatamana o le kau levita.

⁶ Kotou tamate le Pasikate, kotou fakamea, ti kotou teuteui le Pasikate ki okoutou fetaina, o mulimuli totonu ki le folafola a le Eteleno leia na fakasa e Moisese.

⁷ Na soli loa e Sosiasi ki le kakai, ti mo latou fuli ala na nonofo i ai, ni akeno mo ni uviki koti e kau tolu afe, ko manu fuli ana ki le Pasikate, ti mo ni pipi e tolu afe ; ko nea fuli ana na too mei koloa o le sau.

⁸ Na fai foki e lana kau pule i le loto malie se moliga ki le kakai, mo le kau tagata faisakilifisio, ti mo le kau Levi. Na soli loa e Ilekisa, mo Sakalia, mo Seiele, pule o le fale o le Atua, ki le kau tagata faisakilifisio se moliga ki le Pasikate ko ni akeno e lua afe mo kau lelau e ono, ti mo ni pipi tagata e kau lelau e tolu.

⁹ Na soli loa e Konania, mo Semaesa, mo Netaneele, ona fetaina, mo Asapia, mo Seiele, mo Sosapate, pule o le kau Levi, ki le kau Levi o uiga mo le Pasikate ni akeno e lima afe mo ni pipi tagata e kau lelau lima.

¹⁰ Ti na teuteui loa le gaoi : na tutuu loa le kau tagata faisakilifisio mo le kau Levi i lolatou tuuaga o mulimuli ki lolatou vaevae, ti mo fakatotonu a le sau.

¹¹ Na lotou tamate loa le Pasikate ; na liligi loa e le kau tagata faisakilifisio le toto leia na aumai e le kau Levi, ti na teuteui loa e le kau Levi a vikitima.

¹² Na lotou tuku kese loa a failaulau ke soli latou ki fale fakatamana kesekese o le kakai, o tupu ke lotou momoli latou ki le Eteleno, ofaipe lona tosi i le tosi a Moisese ; ti na tatau ki pipi.

¹³ Na lotou fakamoso loa le Pasikate i le afi, o mulimuli ki le fakatotonu, ti na lotou fakamoso loa a inati taputapu i ni kulo mo ni fakapaku ; ti na lotou fakatavili loa o tufa latou ki le kakai.

¹⁴ Ti oki a ia na lotou teuteui loa le nea leia kia latou mo le kau tagata faisakilifisio, talie na visia le kau tagata faisakilifisio, vosa o Alone, o kaku ki le pouli, i le momoli o failaulau mo gako ; koia leia na teuteui ai loa e le kau Levi le nea leia kia latou mo le kau tagata faisakilifisio, vosa o Alone.

¹⁵ Na tutuu le kau sua, vosa o Asafe, i olatou tuulaga, o mulimuli ki le fakatotonu a Tavite, mo Asafe, mo Emani, mo Setutune, le polofeta a le sau, ti na tutuu le kau tuu matapa i matapa taki tasi ; na leaise lotou maliu loa mei alatou gaoi, talie na teuteu loa e olatou fetaina, le kau Levi, lalatou nea kai.

¹⁶ Na fai loa le teuteu o le tausi katoa o le Eteleno i le aso lena ke fai le Pasikate mo momoli a failaulau i aluga o le aletale o le Eteleno, o mulimuli ki le fakatotonu a le sau ko Sosiasi.

¹⁷ Na fai loa e fanau a Iselaele ala na nonofo i ai le Pasikate i le temi lena ti mo le aso o pane sala fakatupu i le lolotoga o aso e fitu.

¹⁸ Na leaise fai se Pasikate i Iselaele o tatau mo le Pasikate lena talu mei le temi o Samuele, le polofeta ; ti na leaise fai e se tasi ake a sau o Iselaele se Pasikate o tatau mo leia na fai e Sosiasi, mo le kau tagata faisakilifisio, mo le kau Levi, mo Suta katoa, mo Iselaele ala na nonofo i ai, ti mo le kakai katoa o Selusalemi.

¹⁹ Na fai le Pasikate lena i le fetuu kau agafulu tupu valu o le sau a Sosiasi.

Lavea o Sosiasi i le kau Esipito

²⁰ I le oki o nea fuli anei, i le oki o le fakafoou e Sosiasi o le fale o le Eteleno, na pale loa Neko, sau o Esipito, o taui le kolo ko Kalekemisi i le vaitafe o Eufalate. Na ano loa Sosiasi ke taui a ia ;

²¹ ti na kakau loa e Neko ni tagata avelogo ke pati kiate ia : Sau o Suta, kolea e ke au ai kiate au ? E leaise ko koe leia e kau au ki ai i le aso nei ; e kau pale ke taui se fale leia e veliveli mo au. Ti kua pati mai le Atua kiate au ke kau fakavilivili. Aua na ke fakafesagai ki le Atua, leia e kau mo au, talie na maumaui loa e ia a koe.

²² Kae na leaise maliu loa a Sosiasi mei le sau o Esipito, ti na fetogi teu loa a ia ke taui le sau ko Neko, kae na leaise fakalogo loa a ia ki masau a Neko, ala na au mei le Atua. Na soso loa a ia o taui a Neko i le vaivailiua o Mekito.

²³ Na fana loa e le kau tagata fai kalolo ki le sau ko Sosiasi, ti na pati loa le sau ki ana tagata fakasausau : Kotou ave au, talie kua kau lavea veli ai.

²⁴ Na ave loa a ia e ana tagata fakasausau mei lana saliote, o tuku ki se tasi ake saliote a ana, ti na lotou ave loa a ia ki Selusalemi. Na mate loa a ia, ti na tanu loa a ia i tanuma o ona tamana. Na tagi loa Suta katoa mo Selusalemi kia Sosiasi.

²⁵ Na fai loa e Selemia se lau mate o Sosiasi ; na masau a tagata sua fuli mo fafine sua fuli kia Sosiasi i alatou sua o kaku mai ki le aso nei, ti na lotou fakatuu loa a ia ko se agai fenua i Iselaele. Kua tosi a sua ana i tosi o tagi laulau.

²⁶ Ko le toe o gaoi a Sosiasi, ana gaoi malilie o mulimuli ki le lao a le Eteleno,

²⁷ mo ana gaoi mei le kamataaga o kaku ki le fakaoki, e tosi le nea lena i le tosi fakamatala ki sau o Iselaele mo Suta.