Lua tosi o Koloniko 34 - Tosi Tapu

Sosiasi, sau o Suta ; le fakafoou o le fale tapu

¹ Na fetuu valu Sosiasi i le temi na sau ai loa, ti na sau loa a ia i fetuu e kau tolu tupu tasi i Selusalemi.

² Na fai loa e ia le nea leia e totonu ki mata o le Eteleno, ti na saele loa a ia i ala o Tavite, lona tamana ; na leaise toe se kese loa a ia pe ki le fetuu atamai pe ki le fetuu sema.

³ I le fetuu valu o lana sau, koi muli foki a ia, na kamata afa loa e ia le Atua o Tavite, lona tamana ; i le fetuu kau agafulu tupu lua o lana sau, na kamata fakamea loa e ia a Suta mo Selusalemi mei ganea tapu, mo taulaatua, mo fakatata laakau, ti mo fakatata ukamea.

⁴ Na solosoloi loa ki lalo i ona mua a aletale o Paale, ti na ta loa e ia ki lalo a fakatata na fakatapui ki le laa ala na tutuu i aluga o aletale ; na fatifatii loa e ia a taulaatua, mo fakatata togi mo fakatata ukamea na saka ti na laliki loa e ia latou ke efu, ti na laku loa e ia le efu ki tanuma o latou ala na momoli ia ni sakilifisio kia latou ;

⁵ ti na tutu loa e ia a ivi o le kau pelepitelo pagani i aluga o olatou aletale. Na fenaaki loa lana fakamea a Suta mo Selusalemi.

⁶ I kolo o Manase, mo Efalaimi, mo Simeone, ti mo Nefetali foki, i ganea fuli ala na ano a ia ki ai,

⁷ na maumaui e ia a aletale, na fatifatii e ia a taulaatua mo fakatata, o laliki latou ke efu, na maumaui e ia a fakatata fuli ala na fakatapui ki le laa, i le fenua katoa o Iselaele. Ti na toe liliu loa a ia ki Selusalemi.

⁸ I le fetuu kau agafulu tupu valu o lana sau, i le oki o lana fakamea le fenua mo le fale tapu, na kakau loa e ia a Safani, vosa o Atesalia, mo Maasesa, pule o le kolo, mo Soake, vosa o Soakase, le fakafofoga o le sau, ke lotou fakafoou le fale o le Eteleno, lona Atua.

⁹ Na lotou ano loa ki le tagata faisakilifisio lasi ko Ilekisa, ti na tuku loa kia latou le siliva leia na fakatapui ki le fale o le Atua, mo le siliva leia na tanaki e le kau Levi leo matapa mei le kakai o Manase mo Efalaimi, mo le kakai o Iselaele katoa, mo le kakai o Suta mo Pesamino katoa, ti mo le kakai o Selusalemi.

¹⁰ Na tuku loa a ia ki lima o latou ala na tokaga ki le fai o gaoi o le fale o le Eteleno. Ti na lotou fakaaoga loa a ia kia latou ala na gaoi ki le fakafoou o le fale o le Eteleno,

¹¹ ki le kau tagata fai papa mo le kau tagata fai sima, ki le totogi o fatu lalasi mo le laakau fuli ki pou, mo kaso, mo le faliki o le fale leia na maumaui e sau o Suta.

¹² Na fai loa e le kau tagata lena alatou gaoi i le agatonu. Na pule kia latou Sakate mo Apetiasi, Levi, mei le sakoga o Melali, ti mo Sakalia mo Mesulame, mei le sakoga o Keati ; na leoleo ki le kau tagata amo mo le kau gaoi latou fuli o le kau Levi ala na poto i le fai musika,

¹³ ti na lotou lagiaki a tagata gaoi fuli ala na fai ia a gaoi kesekese ; na i ai foki ni iki Levi na sekalaipe, mo ni iki na kovana, ti mo ni iki na tuu matapa.

Toe maua o le tosi o le lao

¹⁴ I le temi na too ai le paaga leia na aumai ki le fale o le Eteleno, na maua loa e le tagata faisakilifisio ko Ilekisa le tosi o le lao a le Eteleno leia na tuku e Moisese.

¹⁵ Koia na masau ai loa a Ilekisa kia Safani, le sekalaipe : Kua kau maua ia le tosi o le lao a le Eteleno i le fale o le Eteleno. Ti na soli loa e Ilekisa le tosi kia Safani.

¹⁶ Na ave loa e Safani le tosi ki le sau, o pati kiate ia : Kua fai e au tagata fakasausau a nea fuli ala na ke fakatotonu kia latou ;

¹⁷ kua lotou tanaki le paaga leia na aumai ki le fale o le Eteleno, ti kua lotou soli a ia ki le kau tufuga mo le kau gaoi.

¹⁸ Na toe pati foki Safani, le sekalaipe, ki le sau : Kua soli mai foki e le tagata faisakilifisio ko Ilekisa kiate au se tosi, ti na lau loa e Safani le tosi i mua o le sau.

¹⁹ I le logo loa a le sau ki folafola o le lao, na sae loa e ia ona kofu.

²⁰ Ti na tuku loa e le sau le fakatotonu leinei kia Ilekisa, mo Asikame, vosa o Safani, mo Apetone, vosa o Mikea, mo Safani, le sekalaipe, mo Asaia, tagata fakasausau a le sau :

²¹ Kotou ano o afa le finegalo o le Eteleno kiate au mo latou fuli ala na toe i Iselaele mo Suta, o uiga mo folafola o le tosi leinei na maua ; talie kua lasi ai le sausau o le Eteleno kua mafola kia tatou, o tupu na leaise tausi e otatou tamana le folafola a le Eteleno, ti na leaise lotou fai a nea fuli ala na tosi i le tosi leinei.

²² Na ano loa Ilekisa mo latou fuli ala na filifili e le sau ki le fafine polofeta ko Uleta, avaga a Salume, vosa o Tokeate, vosa o Aselo le tagata leoleo o kofu taputapu i le fale tapu. Na nofo le fafine i Selusalemi i leia ake fetuu o le kolo. I le oki o lalatou fakasa kiate ia a nea fuli,

²³ na tali loa Uleta kia latou : Ko leinei le folafola a le Atua o Iselaele : Kotou pati ki le tagata lena na kakau ia mai koutou kiate au :

²⁴ Ko leinei le folafola a le Eteleno : Ka kau fakavilo ia loa ni malaia ki le ganea leinei mo lona kakai, a malaia fuli ala e tuu i le tosi leia na lau i mua o le sau o Suta.

²⁵ Talie na lotou tiaki au kae lotou momoli ni kaloni ki ni iki ake atua, ke kau itaita ai ki gaoiaga fuli o olatou lima, kua maligi loa loku sausau ki le ganea leinei ti e leaise toe taofi loa a ia.

²⁶ Kae kotou pati loa ki le sau o Suta leia na kakau ia mai koutou ke au o afa le finegalo o le Eteleno : Ko leinei le folafola a le Eteleno, le Atua o Iselaele, o uiga mo folafola ala na ke logo ki ai.

²⁷ O tupu na lave ki lou loto a folafola ana, ti na ke fakasemala i mua o le Atua i lau logo ki folafola ana o uiga mo le ganea leinei mo lona kakai, ti na ke fakasemala i oku mua, ti na ke sae ou kofu, ti na ke tagi i oku mua, ko au foki, na kau logo, e folafola le Eteleno.

²⁸ E ke mate loa ti e tanu loa a koe i le tokamalie i tafa o ou tamana, ti e leaise tio loa ou mata ki malaia fuli ana, ala ka vilo loa ki le ganea leinei mo lona kakai. Na lotou ano loa o fakasa ki le sau le tali a Uleta, le fafine polofeta.

²⁹ Na fakatasii loa e le sau le kau matua fuli o Suta mo Selusalemi.

³⁰ Ti na pale loa Sosiasi ki le fale o le Eteleno, mo tagata fuli o Suta, mo le kakai o Selusalemi, mo le kau tagata faisakilifisio, mo le kau Levi, ti mo le kakai katoa, mei leia e lasi ki leia e ikiiki oki. Na lau loa e le sau i olatou mua a folafola fuli o le tosi o le sai, leia na maua i le fale o le Eteleno.

³¹ Na tuu loa le sau i lona tuuaga ti na fai loa e ia se sai i mua o le Eteleno, o fakapapau a ia ke mulimuli i le Eteleno ti mo tausi ana fakatotonu, mo ana pelesepeto, mo ana lao, i lona loto katoa mo lona laumalie katoa, o tupu ke fai ai a folafola o le sai, ala e tuu i le tosi.

³² Na fakaulu loa e Sosiasi ki le sai latou fuli ala na nonofo i Selusalemi mo Pesamino ; ti na fai loa e le kakai o Selusalemi o mulimuli ki le sai a le Atua, a le Atua o olatou tamana.

³³ Na fakapuli loa e Sosiasi a nea fakalialia fuli i fenua fuli ala na maua e fanau a Iselaele, ti na fakamaua loa e ia latou fuli ala na nonofo i Selusalemi ke tausi ki le Eteleno, lolatou Atua. I le lolotoga o lona mauli katoa, na leaise lotou maliu kese loa mei le Eteleno, le Atua o olatou tamana.