Lua tosi o Koloniko 33 - Tosi Tapu

Manase, sau o Suta ; lona tausi taulaatua fakavale

¹ Na sau Manase i lona fetuu kau agafulu tupu lua, ti na sau loa a ia i fetuu e kau lima tupu lima i Selusalemi.

² Na fai loa e ia le nea leia e veli ki mata o le Eteleno, o mulimuli ki aga fakalialia a puleaga ala na kapu e le Eteleno i mua o fanau a Iselaele.

³ Na toe laga loa e ia a ganea taualuga, ala na maumaui e lona tamana ko Esekiasi ; na fakatuu loa e ia ni aletale kia Paale, ti na fai loa e ia ni fakatata o Asetalate, ti na atolasio loa a ia ki le kau tau o le lagi.

⁴ Na fakatuu loa e ia ni aletale i le fale o le Eteleno, logo ai na pati le Eteleno : Ko Selusalemi leia e agai ai loa loku suafa o lee gato.

⁵ Na fakatuu loa e ia ni aletale ki le kau tau fuli o le lagi i loto o lotoa e lua o le fale o le Eteleno.

⁶ Na momoli loa e ia ona vosa i le afi, i le vaivailiua o vosa o Inome ; na tioi loa e ia a ao mo gata ke iloa ai le nea e tonu ke fai ; na fai nea fakatemonio loa a ia, na fakanofo loa e ia ni kakai ala na felogoi mo le kau mate ti na kikite e ia le temi ka au. Na toe asilisili fai loa e ia a nea ala e veveli ki mata o le Eteleno, ke tupu ai le sausau a le Eteleno.

⁷ Na fakatuu loa e ia le fakatata leia na ta e ia ki le fale o le Atua, le fale leia na pati ki ai le Atua kia Tavite mo Salomone, lona vosa : Kua kau filifili le fale leinei mo Selusalemi i nofoaga fuli o Iselaele ke agai ai loku suafa o lee gato.

⁸ E leaise kau toe siki loa Iselaele mei le fenua leia na kau soli ki okoutou tamana, kae ke lotou fai fua aku folafola, mo nea fuli ala na kau fakatotonu kia latou, o mulimuli ki le lao katoa, mo pelesepeto, mo fakamaau ala na tuku e Moisese.

⁹ Kae o tupu ko Manase, na sese loa Suta mo le kakai o Selusalemi, o fai le nea leia e veli o lasi ake foki i puleaga ala na maumaui e le Eteleno i mua o fanau a Iselaele.

¹⁰ Na folafola loa le Eteleno kia Manase mo lona kakai, kae na leaise lotou tokaga loa.

¹¹ Koia na kakau ai loa e le Eteleno kia latou a pule solia a le sau o Asilia, ala na too ia loa Manase o tuku ki ukamea, o fakapiki ni ukamea ki lona gutu mo saisai a ia ki ni tini o ave ki Papilone.

¹² I lana nofo loa i le mamae, na tagi loa a ia ki le Eteleno, lona Atua, ti na fakasemala lasi loa a ia i mua o le Atua o ona tamana.

¹³ Na fai loa e ia ni kole kiate ia ; ti na fakamaluu loa e le Eteleno lona loto, o tali ana kole, ti mo toe aumai loa a ia ki Selusalemi ki lona puleaga. Ti na iloa loa e Manase ko le Eteleno toka tasi e Atua.

¹⁴ I le oki o nea ana, na laga loa e ia i tafa o le kolo o Tavite, i le potu uesite, i le fetuu o Kioni, i le vaivailiua, se paa taualuga, leia na ano o kaku ki le matapa o ika, ti na takatakai ia le mauga ; na toe tuku foki e ia ni pule solia ki kolo tau fuli o Suta.

¹⁵ Na fakapuli loa e ia mei le fale o le Eteleno a taulaatua mo le fakatata leia na ta e ia, ti na maumaui loa e ia a aletale fuli ala na fau e ia i le mauga o le fale o le Eteleno mo Selusalemi ; ti na laku loa e ia latou ki le tua kolo.

¹⁶ Na toe fakatuu loa e ia le aletale o le Eteleno, ti na toe momoli loa e ia i ai ni sakilifisio fakakomunio mo ni sakilifisio fakafetai, ti na fakatotonu loa e ia ki Suta ke tausi ki le Eteleno, le Atua o Iselaele.

¹⁷ Na koi fai e le kakai ni sakilifisio i ganea taualuga, kae kua lotou fai ata loa ki le Eteleno, lolatou Atua.

¹⁸ Ko le toe o gaoi a Manase, lana faikole ki lona Atua, mo folafola a le kau polofeta ala na masau kiate ia i le suafa o le Eteleno, le Atua o Iselaele, e tosi le nea lena i le tosi gaoi a sau o Iselaele.

¹⁹ Ko lana faikole mo le tali a le Atua kiate ia, ana agasala, mo ana agasala ti mo ana agatuu, mo ganea ala na laga ai loa e ia ni ganea taualuga ti na fakatuu ai loa e ia ni taulaatua mo ni fakatata togi i mua o lana fakasemala, e tosi le nea lena i le tosi a Osai.

²⁰ Na moe loa Manase mo ona tamana, ti na tanu loa a ia i lona fale. Ti na sau loa Amone, lona vosa, o fetogi a ia.

Amone, sau o Suta

²¹ Na sau Amone i lona fetuu kau lua tupu lua, ti na sau loa a ia i fetuu e lua i Selusalemi.

²² Na fai loa e ia le nea leia e veli ki mata o le Eteleno, ofaipe Manase, lona tamana ; na momoli loa e ia ni sakilifisio ki fakatata togi fuli ala na fai e Manase, lona tamana, ti na tausi loa a ia kia latou ;

²³ ti na leaise fakasemala fua a ia i mua o le Eteleno ofaipe le fakasemala a Manase, lona tamana, talie na toe asilisili ake lana agasala.

²⁴ Na fono loa ana tagata fakasausau ke tamate a ia, ti na lotou tamate loa a ia i lona fale.

²⁵ Kae na tamate loa e le kakai o le fenua latou fuli ala na fonoaki ke tamate le sau ko Amone ; ti na fakanofo loa e le kakai o le fenua a Sosiasi, lona vosa, ke sau o fetogi a ia.