Lua tosi o Koloniko 32 - Tosi Tapu

Ulu a Sanekelipe ki Suta ; Maumaui o lana solia e le Eteleno

¹ I le oki o nea ana mo gaoi ana, ala na fakasa ia le agatonu a Esekiasi ki le Atua, na sa loa Sanekelipe, sau o Asilia, leia na ulu loa ki Suta, ti na takatakai ia loa a kolo tau o Suta, mo le manatu ke too latou.

² I le tio loa a Esekiasi kua au Sanekelipe ke taui Selusalemi,

³ na fono loa a ia mo lana kau pule ti mo lana kau tagata toa, o tupu ke tapono a vai ala na tuu i le tua kolo ; ti na lotou tonu tasi loa mo ia.

⁴ Na fakatasi loa se kakai toka api, ti na lotou tanu loa a matapuna vai fuli mo le liua leia e tafe i le fenua. Na lotou pati : Kolea e maua ai loa e le sau o Asilia mo lana solia se vai lasi i le aso leia e lotou tau mai ai ki leinei ?

⁵ Na loto makeke loa Esekiasi ; na toe fau loa e ia le paa leia na maumau, ti na toe siki ake loa e ia a ia ke taualuga o kaku ki tule leo, na toe fai loa e ia mo le tasi ake paa ki tafa, na fakamakeke loa e ia a Milo i le kolo o Tavite, ti na teuteui loa e ia ni masafu mo ni paletau o lasi ai.

⁶ Na tuku loa e ia ni pule solia ki le kakai, ti na fakatasii loa e ia latou ki le lotoa i le matapa o le kolo. Na masau loa a ia ki olatou loto, o pati :

⁷ Kotou fakamakeke ti kotou loto makeke ! Aua na kotou tuania ia fua se nea ti aua na kotou i fua ki le sau o Asilia mo lana solia toka api leia e nofo mo ia ; talie e lasi ake le makeke ia tatou i leia ia latou.

⁸ E nofo mo ia se lima fakakanofi, kae e nofo mo tatou le Eteleno, lotatou Atua, leia e tokoi mai loa kia tatou ti e tau loa kia tatou. Na fimalie loa le kakai i masau a Esekiasi, sau o Suta.

⁹ I le oki o le nea lena, na kakau loa e Sanekelipe, sau o Asilia, ana tagata fakasausau ki Selusalemi, kae na nofo loa a ia i mua o Lakisi mo lana solia makeke katoa ; na kakau loa e ia latou kia Esekiasi, sau o Suta, mo latou fuli o Suta ala na nonofo i Selusalemi, ke pati kia latou :

¹⁰ Ko leinei le masau a Sanekelipe, sau o Asilia : Ko ai leia e kotou fanaki ki ai, ke kotou nonofo ai i Selusalemi i le mamae ?

¹¹ Pe leaise fakavalevale Esekiasi kia koutou ke tuku koutou ke mamate i le fia kai mo le fia inu, o pati : E saofaki loa tatou e le Eteleno, lotatou Atua mei le lima o le sau o Asilia ?

¹² Pe leaise ko ia, Esekiasi, leia na fakapuli ia a ganea taualuga mo aletale o le Eteleno, ti na tuku ia le fakatotonu ki Suta mo Selusalemi : Ke kotou punou loa i mua o le aletale e tasi, ti ke kotou momoli loa i ai a nea fakamanogi ?

¹³ Pe leaise kotou iloa le nea leia na motou fai, e au mo oku tamana, ki kakai fuli o la ake fenua ? Pe na feala ke saofaki e atua o puleaga ana olatou fenua mei loku lima ?

¹⁴ I atua fuli o puleaga ana ala na maumaui e oku tamana, ko le atua fea leia na mafai ke saofaki ia lona kakai mei loku lima, ke mafai ai e lokoutou Atua lokoutou saofaki ?

¹⁵ Ke aua na kakaai koutou e Esekiasi, ti ke aua na fakasese koutou e ia ; aua na kotou fanaki kiate ia ! Talie e leaise atua, pe ko se puleaga, pe ko se fenua, na mafai ke saofaki ia lona kakai mei loku lima, mo le lima o oku tamana : Ko ai ake loa lokoutou Atua, ke saofaki ia koutou mei loku lima !

¹⁶ Na toe masau veli loa a tagata fakasausau a Sanekelipe ki le Eteleno Atua, ti mo Esekiasi, lana tagata fakasausau.

¹⁷ Ti na ave loa e ia se tosi lauveli ki le Eteleno, le Atua o Iselaele, o pati i ai : Na leaise mafai e atua o puleaga o la ake fenua ke saofaki ia olatou kakai mei loku lima, ti e tatau, e leaise saofaki ia loa e le Atua o Esekiasi lona kakai mei loku lima.

¹⁸ Na masau taukalaga a tagata fakasausau a Sanekelipe i le pati fakasutea, o tupu ke i ai mo lulu ai le kakai o Selusalemi leia na nonofo i aluga o le paa takatakai o le kolo, ti ke mafai ai ke lotou too le kolo.

¹⁹ Na lotou masau loa ki le Atua o Selusalemi ofaipe ni atua o kakai o le kele, gaoiaga o lima o tagata.

²⁰ Na faikole loa le sau ko Esekiasi mo le polofeta ko Esaia, vosa o Amote, ki le nea lena, ti na la tagi loa ki le lagi.

²¹ Koia na kakau ai loa e le Eteleno se aselo ke tamate ia i le nofolaga tau o le sau o Asilia le kau tagata makeke fuli, mo le kau taki tau, ti mo le kau pule tau. Ti na toe liliu loa le sau o Asilia ki lona fenua mo se luma lasi ai. Na ulu loa a ia ki le fale o lona atua, ti na tamate loa a ia i ai ki le seleta e ona vosa totonu ala na au mei ona tootooga.

²² Koia na saofaki ai loa e le Eteleno a Esekiasi mo le kakai o Selusalemi mei le lima o Sanekelipe, sau o Asilia, ti mo le lima o kakai fuli, ti na puipui loa e ia latou kia latou fuli ala na takatakai ia latou.

²³ Na aumai loa e se kakai toka api ni moliga ki le Eteleno ki Selusalemi, ti mo ni nea alofa mauiga kia Esekiasi, sau o Suta, leia na kamata siki ake loa mei ai ki aluga i mua o puleaga fuli.

Masaki mo le fakamauli o Esekiasi

²⁴ I le temi lena na masaki loa Esekiasi, o teiteiki ke mate. Na faikole loa a ia ki le Eteleno ; ti na folafola loa le Eteleno kiate ia, ti na tuku loa e ia se fakamailoga kiate ia.

²⁵ Kae na leaise tali loa Esekiasi ki le alofa na tali e ia, talie na malaga loa lona loto ki aluga ; ti na nofo loa le sausau o le Eteleno mo ia, mo Suta, ti mo Selusalemi.

²⁶ Koia, mei loto malie o lona fia nealasi, na fakasemala loa Esekiasi mo le kakai o Selusalemi, ti na leaise vilo loa le sausau o le Eteleno kia latou i le lolotoga o le mauli o Esekiasi.

²⁷ Na maua loa e Esekiasi ni koloa lasi mo le kololia. Na fai loa e ia kiate ia ni fale ke tanaki ai le siliva, mo le aulo, mo fatu mauiga, mo nea fakamanogi, mo paletau, ti mo nea fuli ala na feala ke oli ki ai ;

²⁸ ni fale koloa ke tanaki ai le fulumeto, mo le vino, mo le lolo, mo ni fagaiaga manu ki manu kesekese, ti mo ni lotoa ki kau manu.

²⁹ Na laga loa e ia ni kolo, ti na maua loa e ia o lasi ai ni kau manu lalasi mo ni kau manu liliki ; talie na soli loa e le Atua kiate ia ni koloa lasi ai.

³⁰ Ko Esekiasi foki leia na tapono ia le matapuna vai o Kioni, kae taki loa e ia le vai ki le potu uesite o le kolo o Tavite. Na manuia loa Esekiasi i ana gaoi fuli na fai.

³¹ Kae i le temi leia na kakau mai ai loa e le kau pule o Papilone ni tagata avelogo kiate ia ke afa logo o uiga mo le fakamailoga leia na soko i lona fenua, na tiaki loa a ia e le Atua ke asiasii ai a ia, o tupu ke iloa ai a nea fuli ala e maua i lona loto.

³² Ko le toe o gaoi a Esekiasi, ana gaoi malilie, e tosi le nea lena i le tosi a le polofeta ko Esaia, vosa o Amote, ti mo le tosi fakamatala ki sau o Suta mo Iselaele.

³³ Na moe loa Esekiasi mo ona tamana, ti na tanu loa a ia i le ganea taualuga oki o tanuma o vosa o Tavite ; Na fai loa e Suta katoa mo le kakai o Selusalemi ni fakaapaapa kiate ia i lona mate. Ti na sau loa Manase, lona vosa, o fetogi a ia.