Lua tosi o Koloniko 31 - Tosi Tapu

Toe fakatuu o gaoi a le kau faisakilifisio mo le kau Levi

¹ I le oki o nea fuli ana, ko latou fuli o Iselaele, ala na nofo i ai, na ano loa ki kolo o Suta, ti na lotou maumaui loa a fakatata mo taulaatua, ti na lotou maumaui loa a ganea taualuga fuli mo aletale i Suta katoa mo Pesamino, mo Efalaimi, ti mo Manase. Ti na tasi toe liliu loa a fanau fuli o Iselaele ki lona kolo, mo lona fale.

² Na toe fakatuu loa e Esekiasi a lakaga o le kau tagata faisakilifisio mo le kau Levi o mulimuli ki olatou vaevae ti mo alatou gaoi taki toka tasi, le kau tagata faisakilifisio mo le kau Levi, ki failaulau mo sakilifisio fakafetai, ki le tausi, ki sua mo fakavikiviki, i matapa o le sagatualio o le Eteleno.

³ Na soli loa e le sau se potu o lona koloa ki failaulau, ki failaulau o le usu mo le afiafi, ti mo failaulau o aso sapato, mo masina foou ti mo aso lalasi, ofaipe lona tuu i le lao a le Eteleno.

⁴ Ti na pati loa a ia ki le kakai, mo Selusalemi, ke soli le vaega o le kau tagata faisakilifisio mo le kau Levi, o tupu ke lotou tausi agatonu le lao a le Eteleno.

⁵ I le mafola o le logologo lena i le kakai, na soli loa e fanau a Iselaele a uluaki fua o le fulumeto, mo le vino, mo le lolo, mo le meli ti mo fua fuli o faisaga, o lasi ai ; na lotou aumai foki o lasi le vaega kau agafulu o nea fuli.

⁶ Na toe tatau foki mo fanau a Suta mo Iselaele ala na nonofo i kolo o Suta, na lotou soli loa le vaega kau agafulu o alatou kau manu lalasi mo kau manu liliki, ti mo le vaega kau agafulu o nea taputapu ala na fakatapui ki le Eteleno, lolatou Atua, ti na tanaki loa latou i ni tuuga mauke ai.

⁷ Na kamata loa le tanaki fakatuuga o koloa i le tolu o masina, ti na fakaoki loa i le fitu o masina.

⁸ Na au loa Esekiasi mo le kau pule o tio ki fakatuuga, ti na lotou fakamalo loa ki le Eteleno mo lona kakai ko Iselaele.

⁹ Na fakavesilii loa e Esekiasi le kau tagata faisakilifisio mo le kau Levi ki tuuga nea alofa ana.

¹⁰ Koia na tali ai loa le tagata faisakilifisio ko Asalia, mei le fale o Satoke, kiate ia : Talu mei le aso na kamata aumai ai a moliga ki le fale o le Eteleno, na motou kai, na motou makona, ti na toe lasi foki, talie kua tapuaki e le Eteleno lona kakai ; ti ko leinei le lasi o nea ala na toe.

¹¹ Na fakatotonu loa e Esekiasi ke teuteui ni kogafale i le fale o le Eteleno ; ti na teuteui loa latou.

¹² Na aumai totonu loa ki ai a moliga, mo le vaega kau agafulu, mo nea taputapu. Na pule loa ki ai le Levi ko Konania, ti na tokoi kiate ia lona taina ko Simeli.

¹³ Ko Seiele, mo Asasia, mo Nakate, mo Asaele, mo Selimote, mo Sosapate, mo Eliele, mo Sisemakia, mo Makate, ti mo Penasa na gaoi o fakalogo kia Konania mo lona taina ko Simei, o mulimuli ki le fakatotonu a le sau ko Esekiasi, ti mo Asalia, pule o le fale o le Atua.

¹⁴ Ko le Levi ko Kole, vosa o Simena, tagata leo matapa o le potu esite, na pule ki nea alofa ala na soli fakaalofa ki le Atua, ti na tufa ia a moliga maokioki mo moliga maokioki lasi.

¹⁵ Na nonofo loa i kolo fakapelepitelo a Eteni, mo Misamine, mo Sosue, mo Semaesa, mo Amalia, mo Sekania, ti na lotou fakalogo kia Kole ki le tufa fakaagatonu o nea kai ki olatou fetaina, lalasi mo liliki, o mulimuli ki olatou vaevae :

¹⁶ ki tagata fuli na tosi mei le fetuu tolu o fai ki aluga ; kia latou fuli ala na ulu i aso taki tasi ki le fale o le Eteleno ke fai alatou tausi o mulimuli ki olatou tuulaga ti mo olatou kalasi ;

¹⁷ ki tagata faisakilifisio ala na tosi o mulimuli ki olatou fale fakatamana, ki le kau Levi mei le fetuu kau lua o fai ki aluga, o mulimuli ki alatou gaoi mo olatou kalasi ;

¹⁸ kia latou fuli o le kakai ala na tosi mo olotou makopuna, mo alatou avaga, mo olatou vosa, mo olatou taineliki, talie na lotou gaoi fakaagatonu ki le tausi o le sagatualio.

¹⁹ O uiga mo vosa o Alone, a tagata faisakilifisio, ala na nonofo i kolo vao, ti mo tafatafa o olotou kolo, na i ai i kolo taki tasi ni tagata na filifili i olatou igoa ke tufa ia ni vaega nea kai ki le kau tagata faisakilifisio fuli ti mo le kau Levi fuli na tosi.

²⁰ Ko lena le nea leia na fai loa e Esekiasi i Suta katoa ; na fai loa e ia le nea leia e malie, le nea leia e totonu, le nea leia e maoki, i mua o le Eteleno, lona Atua.

²¹ Na gaoi loa a ia i lona loto katoa, ti na manuia loa a ia i nea fuli ala na fai e ia, i lana aga o afa lona Atua o uiga mo le tausi o le fale o le Atua, mo le lao, ti mo fakatotonu.