Lua tosi o Koloniko 30 - Tosi Tapu

Toe fai o le Pasikate i Suta

¹ Na kakau loa e Esekiasi ni tagata avelogo i Suta katoa mo Iselaele, ti na fai foki e ia ni tosi ki Efalaimi mo Manase, ke lotou au ki le fale o le Eteleno i Selusalemi, o fai le Pasikate ki le Eteleno, le Atua o Iselaele.

² Na fakakaukau loa le sau, mo lana kau pule, ti mo le fakatasiga katoa i Selusalemi, ke fai le Pasikate i le lua o masina ;

³ talie na leaise feala ke fai a ia i lona temi totonu, o tupu na leaise fakamea le kau tagata faisakilifisio ke toka api ti na leaise fakatasi ake le kakai ki Selusalemi.

⁴ Na fimalie loa ki le nea lena le sau mo le fakatasiga katoa,

⁵ ti na lotou fakatotonu loa ke fakasa le nea lena i Iselaele katoa, mei Pele-Sepa o kaku ki Tane, ke au ki Selusalemi o fai le Pasikate ki le Eteleno, le Atua o Iselaele. Talie na leaise koi fai le aso lena talu mei fualoa ofaipe lona tuu i le tosi.

⁶ Na ano loa a tagata avelogo mo tosi a le sau mo lana kau pule i Iselaele katoa mo Suta. Ti na lotou mulimuli loa ki le fakatotonu a le sau, o lotou pati : Fanau a Iselaele, kotou toe liliu mai ki le Eteleno, le Atua o Apalaamo, mo Isaake, ti mo Iselaele, o tupu ke toe maliu mai a ia kia koutou, ga toetoega leia na sao mei lima o le sau o Asilia.

⁷ Aua na kotou faipe okoutou tamana mo okoutou fetaina, ala na agasala ki le Eteleno, le Atua o okoutou tamana, ti na tuku e ia ki le malaia ofaipe le nea leia e kotou tio ki ai.

⁸ Aua na kotou ua fefeka, ofaipe okoutou tamana ; kae kotou soli okoutou lima ki le Eteleno, kotou au ki lona sagatualio leia na fakatapui e ia o lee gato, ti kotou tausi ki le Eteleno, lokoutou Atua, o tupu ke maliu kese lona sausau lasi meia koutou.

⁹ Kapau e kotou toe liliu mai ki le Eteleno, e maua loa e okoutou fetaina mo okoutou vosa le manava alofa i tafa o latou ala na ave popula ia latou, ti e lotou toe liliu mai loa ki le fenua leinei ; talie e manava alofa le Eteleno, lokoutou Atua, ti e leaise mafuli kese loa ona mata mei a koutou, mo kapau e kotou toe liliu mai kiate ia.

¹⁰ Na ano loa le kau tagata avelogo i kolo fuli o le fenua o Efalaimi mo Manase, o kaku ki Sapulone. Kae na kakata mo gologolo kia latou.

¹¹ Kae logo ai le gologolo a le kakai, na i ai ni tagata o Asele, mo Manase, mo Sapulone ala na fakataulalo loa ti na au loa ki Selusalemi.

¹² I Suta foki na gaoi le lima o le Atua o soli kia latou se loto tasi, ke lotou fai le fakatotonu a le sau mo le kau pule, o mulimuli ki le folafola a le Eteleno.

¹³ Na fakatasi loa se kakai toka api i Selusalemi ke fai le aso o pane sala fakatupu, i le lua o masina : ko se fakatasi lasi ai.

¹⁴ Na lotou tutuu ake loa ki aluga, ti na lotou fakapuli loa a aletale ala na momoli ai a sakilifisio i Selusalemi, mo aletale ala na momoli ai a kaloni, ti na lotou laku loa latou ki le liua o Setolone.

¹⁵ Ti na lotou tamate loa a manu o le Pasikate i le aso kau agafulu tupu fa o le lua o masina. Na maua loa e le tagata faisakilifisio mo le kau Levi se luma, ti na lotou fakamea loa, ti na lotou momoli loa a failaulau i le fale o le Eteleno.

¹⁶ Na lotou too olatou tuulaga masani, o mulimuli ki le lao a Moisese, tagata a le Atua, ti na liligi e le kau tagata faisakilifisio le toto, leia na lotou tali mei le lima o le kau Levi.

¹⁷ O tupu na i ai se toka api i fakatasiga leia na leaise fakamea, koia na tuku ai loa ki le kau Levi ke lotou tamate a vikitima o le Pasikate kia latou fuli ala na leaise mea, o tupu ke fakatapui latou ki le Eteleno.

¹⁸ Talie ko se kakai toka api, ia latou o Efalaimi, mo Manase, mo Isakale, ti mo Sapulone, na leaise fakamea, ti na lotou kai loa le Pasikate kae na leaise lotou mulimuli ki le nea leia e tuu i le tosi. Kae na faikole loa Esekiasi kia latou, o pati : Ke alofa le Eteleno, leia e agamalie,

¹⁹ o fakamolemole kia latou fuli ala na afa ia le Eteleno, le Atua o olatou tamana, i lolatou loto katoa logo ai na leaise lotou fai le fakamea taputapu !

²⁰ Na tali loa e le Eteleno le kole a Esekiasi, ti na fakamolemole loa a ia ki le kakai.

²¹ Koia na fai ai loa e fanau a Iselaele ala na nonofo i Selusalemi le aso o pane sala fakatupu, i aso e fitu, mo se fiafia lasi ; ti na fai le kau Levi mo le kau tagata faisakilifisio i aso taki tasi a sua fakavikiviki ki le Eteleno mo alatou nea fai musika, o leo lasi kiate ia.

²² Na masau loa a Esekiasi ki loto o le kau Levi fuli, ala na fakasa ia se atamai lasi ki le tausi o le Eteleno. Na lotou kai loa a vikitima i aso e fitu, o lotou momoli ni sakilifisio fakafetai, ti mo fakavikiviki ki le Eteleno, le Atua o olatou tamana.

²³ Na loto tasi loa le fakatasiga katoa ke toe fai ni iki a aso e fitu. Ti na lotou toe fakafiafia loa i aso ana e fitu ;

²⁴ talie na soli e Esekiasi, sau o Suta, ki le fakatasiga ni pipi tagata e afe mo ni ovi fafine e fitu afe, ti na soli e le kau pule ni pipi tagata e afe mo ni ovi fafine e kau agafulu afe, ti na fakamea ni kau tagata faisakilifisio toka api ai.

²⁵ Ti na fiafia loa le fakatasiga katoa o Suta, mo le kau tagata faisakilifisio, mo le kau Levi, mo le kakai katoa leia na au mei Iselaele, mo le kau matapule leia na au mei le fenua o Iselaele pe na nonofo i Suta.

²⁶ Na soko i Selusalemi ni fakafiafia lalasi ai ; talu mei le temi o Salomone, sau o Iselaele, vosa o Tavite, na leaise soko se nea o tatau mo le nea lena i Selusalemi.

²⁷ Na tutuu ake loa le kau tagata faisakilifisio mo le kau Levi o tapuaki ki le kakai ; ti na logo loa ki olatou leo, ti na kaku loa lalatou faikole ki le lagi, ki le nofoaga taputapu o le Eteleno.