Lua tosi o Koloniko 29 - Tosi Tapu

Esekiasi, sau o Suta ; fakamea o le fale tapu

¹ Na sau Esekiasi i lona fetuu kau lua tupu lima, ti na sau loa a ia i fetuu e kau lua tupu iva i Selusalemi. Na igoa lona tinana ko Apisa, taine o Sakalia.

² Na fai loa e Esekiasi le nea leia e totonu ki mata o le Eteleno, o mulimuli ki le nea katoa leia na fai e Tavite, lona tamana.

³ I le uluaki fetuu o lana sau, i le uluaki masina, na fakamavaa loa e Esekiasi a matapa o le fale o le Eteleno, ti na toe fakafoou loa e ia latou.

⁴ Na aumai loa e ia le kau tagata faisakilifisio mo le kau Levi, ti na tanaki loa e ia i le lotoa o le potu esite,

⁵ ti na pati loa a ia kia latou : Kotou fakalogo mai kiate au, kau Levi ! I le aso nei ke kotou fakamea koutou, ke kotou fakamea le fale o le Eteleno, le Atua o okoutou tamana, ti ke kotou tuku ki fafo o le sagatualio le nea leia e kelekele.

⁶ Talie na agasala otatou tamana, na lotou fai le nea leia e veli ki mata o le Eteleno, lotatou Atua, na lotou tiaki a ia, na lotou tafoki olatou mata mei le tapenakulo o le Eteleno, ti na lotou titua ki ai.

⁷ Na lotou tapono foki a matapa o le fale tapu mo tamate ona malama, ti na leaise lotou momoli se kaloni pe ko se failaulau ki le Atua o Iselaele i le sagatualio.

⁸ Koia na itaita ai le Eteleno ki Suta mo Selusalemi, ti na tuku ai e ia latou ki le maveuveu, mo le mamae, ti mo le luma, ofaipe le nea leia kua kotou tio mata ki ai.

⁹ Ti ko leinei, kua mamate otou tamana i le seleta, ti kua ave popula otou vosa mo otou taineliki, o tupu ko le nea lena.

¹⁰ Koia kua kau manatu ai ke fai se sai mo le Eteleno, o tupu ke maliu ai lona sausau lasi ia tatou.

¹¹ I le aso nei, ei oku vosa, ke kotou tuku la le fakaagaaganoa, talie kua filifili koutou e le Eteleno ke kotou tausi i ona mua, ke kotou liliu ko ana tagata fakasausau, ti ke kotou momoli kiate ia ni kaloni.

¹² Ti na tutuu ake loa le kau Levi ki aluga : Ko Makate, vosa o Amasai, mo Soele, vosa o Asalia, mei le sakoga o Keati ; mei le sakoga o Melali ko Kise, vosa o Apeti, mo Asalia, vosa o Sealeleele ; mei le sakoga o Kelesomi ko Soake, vosa o Sima, mo Eteni, vosa o Soake ;

¹³ mei le sakoga o Elisafani, ko Simeli mo Seiele ; mei le sakoga o Asafe ko Sakalia mo Matania ;

¹⁴ mei le sakoga o Emani ko Seiele mo Simei ; mei le sakoga o Setutune ko Semaesa mo Usiele.

¹⁵ Na lotou fakatasii loa olatou fetaina, ti na lotou fakamea loa, ti na lotou au loa ke fakamea le fale o le Eteleno, o mulimuli ki le fakatotonu a le sau, o tupu ko folafola a le Eteleno.

¹⁶ Na ulu loa le kau tagata faisakilifisio ki loto o le fale o le Eteleno ke fakamea a ia ; na lotou fetuku loa ki fafo a nea kelekele fuli ala na lotou maua i le fale o le Eteleno, ti na lotou tanaki loa latou i le lotoa o le fale o le Eteleno, ti na fetuku loa latou e le kau Levi ki le liua o Setolone.

¹⁷ Na lotou kamata loa le fakamea i le uluaki aso o le uluaki masina ; i le valu o aso o le masina, na lotou ulu loa ki le kogafale ulu o le fale o le Eteleno, ti na lotou fakamea loa le fale o le Eteleno i aso e valu ; i le aso kau agafulu tupu ono o le uluaki masina, na lotou fakaoki loa.

¹⁸ Na lotou ano loa ki le sau ko Esekiasi, o pati kiate ia : Kua motou fakamea le fale katoa o le Eteleno, mo le aletale o failaulau mo ona nea gaoi fuli, ti mo le laupapa o pane taputapu mo ona nea gaoi fuli.

¹⁹ Na motou toe fakafoou foki mo fakamea a nea gaoi fuli ala na fakakelekele e le sau ko Akase i lana sau, i ana agasala : kua tuku latou i mua o le aletale o le Eteleno.

Toe fakatuu o le atolasio i le fale tapu

²⁰ Na tuu ake loa le sau koi usuusu, o fakatasii a pule o le kolo, ti na pale loa a ia ki le fale o le Eteleno.

²¹ Na lotou momoli loa ni pipi tagata e fitu, mo ni ovi tagata e fitu, mo ni akeno e fitu, mo ni koti e fitu, ko se sakilifisio fakamea o le puleaga, mo le sagatualio, ti mo Suta. Na fakatotonu loa e le sau ki le kau tagata faisakilifisio, vosa o Alone, ke momoli a sakilifisio i le aletale o le Eteleno.

²² Na tamate loa e le kau tagata faisakilifisio a pipi, ti na lotou too loa le toto o liligi ki le aletale ; na lotou tamate loa a ovi, ti na lotou liligi loa le toto ki aluga o le aletale ; na lotou tamate loa a akeno, ti na lotou liligi loa le toto i aluga o le aletale.

²³ Ti na aumai loa a koti tagata o le fakamolemole o agasala ki mua o le sau mo mua o le fakatasiga, ala na teki loa olatou lima kia latou.

²⁴ Na tamate loa latou e le kau tagata faisakilifisio ti na lotou liligi loa le toto ki le vae o le aletale ke fakamolemole ai a agasala a Iselaele katoa ; talie na fakatotonu e le sau ke fai le failaulau mo sakilifisio fakamolemole o agasala ki Iselaele katoa.

²⁵ Na fakanofo loa e ia le kau Levi i le fale o le Eteleno mo ni sapale, mo ni lute, mo ni alepe, o mulimuli ki le fakatotonu a Tavite, mo Kate, le polofeta a le sau, ti mo Natane, le polofeta ; talie ko se fakatotonu a le Eteleno, leia na tuku e ana polofeta.

²⁶ Na tutuu loa le kau Levi mo nea fai musika a Tavite, ti na tutuu loa le kau tagata faisakilifisio mo alatou fakatagi pupusi.

²⁷ Na fakatotonu loa e Esekiasi ke momoli a failaulau i le aletale ; i le temi leia na kamata tutu ai loa le failaulau, na toe kamata ai foki a sua ki le Eteleno, ki le tagi o fakatagi pupusi mo nea fai musika a Tavite, sau o Iselaele.

²⁸ Na punou loa le fakatasiga katoa ki le kele, na sua loa le katiko, ti na pupusi loa a fakatagi pupusi, o kaku ki le oki o le failaulau.

²⁹ I le oki loa o le failaulau, na tutuli loa le sau mo latou fuli ala na nonofo mo ia, o punou ki le kele.

³⁰ Ti na pati loa le sau ko Esekiasi mo pule ki le kau Levi ke sua mo fakafetai ki le Eteleno ki folafola a Tavite mo le polofeta ko Asafe ; ti na lotou sua fakafetai loa i le fiafia, ti na lotou punou loa ki le kele, o atolasio ki le Eteleno.

³¹ Ti na masau loa Esekiasi ki le kakai, o pati : I le aso nei kua kotou fakatapui ai koutou ki le Eteleno, kotou fakafeofi mai, kotou aumai ni vikitima ti kotou momoli ni sakilifisio fakafetai ki le fale o le Eteleno. Ti na aumai loa e le fakatasiga ni vikitima, ti na lotou momoli loa ni sakilifisio fakafetai, ti ko latou fuli ala na loto malie na momoli ia loa ni failaulau.

³² Ko le lasi o failaulau ala na momoli e le fakatasiga : ko pipi tagata e kau fitu, mo ovi tagata e kau lelau, mo akeno e kau lelau lua ; na lotou momoli loa a vikitima fuli ana ki le Eteleno.

³³ Ti na toe fakatapui foki mo pipi tagata e kau lelau ono ti mo ovi fafine e tolu afe.

³⁴ Kae na toka teiki le kau tagata faisakilifisio, ti na leaise mafai ke lotou foke a manu fuli ; koia na tokoi loa kia latou olatou fetaina, le kau Levi, o kaku ki le oki o le gaoi, o kaku foki ki le oki o le fakamea o le toega o le kau tagata faisakilifisio, talie na lasi ake le loto o le kau Levi ke fakamea i le kau tagata faisakilifisio.

³⁵ Ti na lasi ai foki a failaulau, mo gako o sakilifisio fakafetai, ti mo lipasio o failaulau. Koia na toe fakatuu ai loa le tausi o le fale o le Eteleno.

³⁶ Na fiafia loa a Esekiasi mo le kakai katoa, o tupu na teuteui e le Atua lona kakai, talie na soko fakapunamauli le nea lena.