Lua tosi o Koloniko 28 - Tosi Tapu

Akase, sau o Suta ; lona tausi taulaatua mo lona maumaui

¹ Na sau Akase i lona fetuu kau lua tupu tasi, ti na sau loa a ia i fetuu e kau agafulu tupu ono i Selusalemi. Na leaise fai loa e ia le nea leia e totonu ki mata o le Eteleno, ofaipe Tavite, lona tamana.

² Na saele loa a ia i ala o sau o Iselaele ; ti na fai foki e ia ni fakatata ki le ukamea saka kia latou ala na tausi kia Paale,

³ ti na tutu loa e ia ni kaloni i le vaivailiua o vosa o Inome, ti na momoli loa e ia ona vosa i le afi o fakatatau ki tausi fakalialia a puleaga ala na kapu e le Eteleno i mua o fanau a Iselaele.

⁴ Na momoli e ia ni sakilifisio mo ni kaloni i ganea taualuga, mo tumutumu o mauga, ti mo lalo o laakau sesega fuli.

⁵ Na tuku loa a ia e le Eteleno, lona Atua, ki lima o le sau o Silia ; ti na taai loa a ia e le kau Silia, ti na lotou ave popula loa se toka api ki Tamaso. Na toe tuku foki a ia ki lima o le sau o Iselaele, leia na taai fakavelivelii ia a ia.

⁶ Na tamate loa e Pekase, vosa o Lemalia, i le aso e tasi i Suta ni tagata e tino lelau tino lua afe, tagata toa fuli, o tupu na lotou tiaki le Eteleno, le Atua o olatou tamana.

⁷ Na tamate loa e Sikeli, tagata tau mei Efalaimi, a Maasesa, vosa o le sau, mo Aselikame, pule o le fale sau, ti mo Elekana, leia na olo ki le sau.

⁸ Na ave popula loa e fanau o Iselaele i olatou fetaina ni tino lelau e lua afe, tagata mo fafine, tamaliki mo taineliki, ti na lotou too loa ia latou se koloa lasi, o ave ki Samalia.

⁹ Na nofo i ai se polofeta a le Eteleno, na igoa ko Oteto. Na ano loa a ia o fakafetaulaki ki le solia leia na toe liliu mai ki Samalia, ti na pati loa a ia kia latou : Ko le sausau o le Eteleno, le Atua o okoutou tamana, ki Suta, leia na tuku atu ai e ia latou ki okoutou lima, ti kua kotou tamate fakaveliveli latou i le lasi o lokoutou ita leia kua pale o kaku ki le lagi.

¹⁰ Ti e kotou manatu i le lakaga nei ke fai a fanau o Suta ko akoutou tagata mo fafine fakasausau ! Kae ko koutou, pe leaise kotou agasala foki ki le Eteleno, lokoutou Atua ?

¹¹ Koia ke kotou fakalogo mai ai kiate au, ti kotou tuku le kau popula lena na kotou fai i okoutou ; talie e nofo mo koutou le sausau lasi o le Eteleno.

¹² Na tutuu ake loa ni iki i vosa o pule o vosa o Efalaimi, ko Asalia, vosa o Sokanane, mo Pelekia, vosa o Mesilemote, mo Esekiasi, vosa o Salume, ti mo Amasa, vosa o Atelai, o taofi latou ala na toe liliu mei le tau,

¹³ ti na lotou pati loa kia latou : Aua na kotou fakaulu loa le kau tagata popula lena i leinei ; talie e kotou loto ke kotou toe fakalasi atou agasala mo atou agaveli ke toe asilisili veli le sausau o le Eteleno kia tatou. Ko leinei kua tou agasala lasi, ti kua nofo le sausau o le Eteleno mo Iselaele.

¹⁴ Na tiaki loa e le kau solia le kau popula mo koloa i mua o pule mo le fakatasiga.

¹⁵ Ti na tutuu ake loa ki aluga le kau tagata lena kua tosi olatou igoa, o too le kau popula ; ti na lotou fakaaoga loa le koloa o le tau o fakalava ai latou ala na telefua ; ti na lotou soli loa kia latou ni nea lava mo ni taka, ti na lotou fagai loa latou mo fakainu, ti na lotou faitoo loa latou, ti na lotou fakaeke loa latou fuli ala na gaegae ki ni asino, ti na lotou taki loa latou ki Seliko, le kolo o palemie, ki olatou fetaina. Ti na lotou toe liliu loa ki Samalia.

¹⁶ I le temi lena, na kakau loa e le sau ko Akase ke kole se tokoi ki sau o Asilia.

¹⁷ Na toe au foki le kau Etome o taai a Suta, ti na lotou ave loa ni kau popula.

¹⁸ Na fai loa e le kau Filisitini se ulu tau ki kolo i le laumalie mo le potu saute o Suta ; na lotou too loa Pete-Semesi, mo Asaloni, mo Keteloti, mo Soko mo kolo ala na fakalogo ki ai, mo Timena mo kolo ala na fakalogo ki ai, mo Kimeso mo kolo ala na fakalogo ki ai, ti na lotou nonofo loa i ai.

¹⁹ Talie na fakataulaloi loa e le Eteleno a Suta, o tupu ko Akase, sau o Iselaele, leia na fakamaveuveu ia a Suta, ti na fai ia ni agasala ki le Eteleno.

²⁰ Na au loa Tilekate-Pilenesele, sau o Asilia, o taui a Akase, ti na fakamamae loa e ia a ia, kae na leaise tokoi a ia kiate ia.

²¹ Talie na too loa e Akase o ave a koloa fuli o le fale o le Eteleno, mo le fale o le sau, mo fale o le kau pule, ke fai ai ni nea alofa ki le sau o Asilia ; kae na leaise tokoi fua a ia kiate ia.

²² I le lolotoga o lana nofo i le mamae, na soko atu e ia lana agasala ki le Eteleno, a ia, le sau ko Akase.

²³ Na fai loa e ia ni sakilifisio ki atua o Tamaso, ala na tautea ia a ia, o pati loa a ia : Talie e tokoi a atua o sau o Silia kia latou, e kau fai loa ni sakilifisio kia latou ke lotou tokoi mai kiate au. Kae ko le tupuaga loa lena o lona malaia, o ona mo Iselaele katoa.

²⁴ Na tanaki loa e Akase a nea gaoi fuli o le fale o le Atua, ti na maumaui loa e ia latou fuli. Na tapono loa e ia a matapa o le fale o le Eteleno, kae na fai loa e ia ni aletale i magai ala fuli o Selusalemi,

²⁵ ti na fakatuu loa e ia ni ganea taualuga i kolo fuli o Suta ke momoli ai ni kaloni ki ni iki ake atua kese. Na fakatupu loa e ia le sausau o le Eteleno, le Atua o ona tamana.

²⁶ Ko le toe o gaoi a Akase, mo ona ala fuli, mei le kamataaga ki le fakaoki, e tosi i le tosi fakamatala ki sau o Suta mo Iselaele.

²⁷ Na moe loa Akase mo ona tamana, ti na tanu loa a ia i le kolo o Selusalemi, talie na leaise tuku loa a ia ki tanuma o sau o Iselaele. Ti na sau loa Esekiasi, lona vosa, o fetogi a ia.