Lua tosi o Koloniko 26 - Tosi Tapu

Osiasi, sau o Suta ; lona tapuakina mo lona makeke

¹ Na too loa e le kakai katoa o Suta a Osiasi i lona fetuu kau agafulu tupu ono, o fakanofo ke sau o fetogi lona tamana ko Amatesia.

² Na toe laga loa e Osiasi a Elote, ti na toe fakaulu loa e ia a ia ki le puleaga o Suta, i le oki o le mate o le sau ko Amatesia.

³ Na sau Osiasi i lona fetuu kau agafulu tupu ono, ti na sau loa a ia i fetuu e kau lima tupu lua i Selusalemi. Na igoa lona tinana ko Sekolia, mei Selusalemi.

⁴ Na fai loa e ia le nea leia e totonu i mua o le Eteleno, ofaipe Amatesia, lona tamana.

⁵ Na fakamalotoloto loa a ia o afa le Atua i le lolotoga o le mauli o Sakalia, leia na poto i le iloa o nea ala na sa mei le Atua ; ti na fakamanuia loa a ia e le Atua i le temi leia na afa ai loa e ia le Eteleno.

⁶ Na taui loa e ia le kau Filisitini ; ti na soloi loa e ia a paa o Kate, mo paa o Sapene, mo paa o Asetoti, ti na laga loa e ia ni kolo i le fenua o Asetoti, i le lotolotoga o le kau Filisitini.

⁷ Na tokoi loa le Atua kiate ia i le tau mo le kau Filisitini, mo le kau Alape ala na nonofo i Kule-Paale, ti mo le kau Maoni.

⁸ Na fai loa e le kau Amone ni nea alofa kia Osiasi, ti na mafola loa lona logologona o kaku ki koiga o Esipito, talie na liliu loa a ia o makeke lasi ai.

⁹ Na fakatuu loa e Osiasi ni tule tau i Selusalemi, i le matapa o le tifi, mo le matapa o le vaivailiua, ti mo aluga o le agele, ti na fakamakeke loa e ia latou.

¹⁰ Na fakatuu loa e ia ni tule i le toafa, ti na kenu loa e ia ni sosoni mauke, talie na maua e ia ni kau manu lasi i vaivailiua mo le laumalie o le fenua, mo ni kau tagata gaoi kele mo gaoi vite i mauga o Kalemelo, talie na fia fai a ia ki le gaoi kele.

¹¹ Na maua e Osiasi ni kau solia ala na ano fakavaevaega ki le tau, o mulimuli ki le lau leia na fai e le sekalaipe ko Seiele ti mo le kovana ko Maasesa, ti na pule loa kia latou a Anania, ko se tasi o le kau pule a le sau.

¹² Ko le api katoa o le kau pule o fale fakatamana, mo kau tagata tau toa, ko afe e lua mo tino lelau e ono.

¹³ Na lotou lagiaki ia se solia ko tagata e tino lelau e tolu tupu fitu afe mo tino lelau e lima ala na mafai ke tokoi ki le sau o taui le fili.

¹⁴ Na soli loa e Osiasi ki le solia katoa ni paletau, mo ni tao, mo ni puloga tau, mo ni teu tau, mo ni gasau, ti mo ni makamaka.

¹⁵ Na fau loa e ia i Selusalemi ni masini na fakakaukaui e se tagata poto ke fakatuu i aluga o tule mo tifi o le paa, ke fana ki ai a gasau mo fatu lalasi. Na mafola loa lona logologona o kaku ki mamao, talie na lasi ai le tokoi kiate ia, ke liliu a ia o makeke.

Agasala mo le tautea o Sosiasi

¹⁶ Kae i le temi leia na kaku ai loa a ia o makeke, na malaga loa lona loto o tupu ai lona vilo. Na ulu loa a ia ki le fale o le Eteleno o tutu ni kaloni i le aletale o kaloni.

¹⁷ Na ulu loa i ona muli le tagata faisakilifisio ko Asalia, mo ni tagata faisakilifisio a le Eteleno e tino valu,

¹⁸ tagata loto makeke, ala na fakafesagai loa ki le sau ko Osiasi, o pati kiate ia : E leaise taga kiate koe, Osiasi, ke ke momoli ni kaloni ki le Eteleno ! E fakalogo le tuulaga lena ki le kau tagata faisakilifisio, vosa o Alone, ala na fakatapui ke momoli ia latou. Mavae mei le sagatualio, talie e ke fai ia se agasala ! Ti e leaise maliu loa le nea lena o malie kiate koe i mua o le Eteleno Atua.

¹⁹ Na itaita loa Osiasi, leia na too ia se iseso i lona lima. I le lolotoga o lona ita ki le kau tagata faisakilifisio, na mafola loa se kilia i lona lae, i mua o le kau tagata faisakilifisio, i le fale o le Eteleno, ofi ki le aletale o kaloni.

²⁰ Na tio loa le tagata faisakilifisio lasi ko Asalia mo le kau tagata faisakilifisio fuli, ti ko leinei, na maua e ia se kilia i lona lae. Na lotou ave fakatavili loa a ia ki fafo, ti ko ia totonu foki, na toe fakatavili ke ulu ki fafo, talie kua tautea a ia e le Eteleno.

²¹ Na kilia loa le sau ko Osiasi o kaku ki lona mate, ti na nofo kilia loa a ia i se fale leia na tuu kese, talie na fakamavae loa a ia mei le fale o le Eteleno. Ti na taki loa e Sotame, lona vosa, le fale o le sau, ti na lagiaki loa e ia le kakai o le fenua.

²² Ko le toe o gaoi a Osiasi, mei le kamataaga o kaku ki le fakaoki, na tosi e Esaia, vosa o Amote, le polofeta.

²³ Na mate loa Osiasi, ti na tanu fakatasi loa a ia mo ona tamana i le kele o tanuma o sau, kae na leaise tanu loa a ia i le tanuma fakasau, talie na pati : E kilia a ia. Ti na sau loa Sotame, lona vosa, o fetogi a ia.