Lua tosi o Koloniko 25 - Tosi Tapu

Amatesia, sau o Suta

¹ Na sau Amatesia i lona fetuu kau lua tupu lima, ti na sau loa a ia i fetuu e kau lua tupu iva i Selusalemi. Na igoa lona tinana ko Soatana, mei Selusalemi.

² Na fai loa e Amatesia le nea e malie ki mata o le Eteleno, kae na leaise katoa loa lona loto ki le Atua.

³ Na soko loa i le temi na makeke ai le puleaga i ona lima, na tamate loa e ia a tagata fakasausau ala na tamate ia lona tamana, le sau.

⁴ Kae na leaise tamate loa e ia ola vosa, talie na mulimuli loa a ia ki le nea leia e tuu i le lao, i le tosi a Moisese, leia e tuku ai e le Eteleno le fakatotonu leinei : aua na tamate loa a tamana o tupu ko agasala a fanau, ti aua na tamate loa a fanau o tupu ko agasala a tamana ; kae e mate loa le tagata ki lana agasala.

Malo o Amatesia i le kau Etome

⁵ Na fakatasii loa e Amatesia a tagata fuli o Suta o tupu ke fakanofo kia latou ni pule o fale fakatamana, mo ni pule ki tino afe, ti mo ni pule ki tono lelau, i Suta katoa mo Pesamino ; na fai loa e ia le lau o lolatou api mei le fetuu kau lua o fai ki aluga, ti na maua loa e ia a kau tagata tau e tino lelau tolu afe, latou ala na mafai ke too masafu, ti na popoto i le tau ki le tao mo le paletau.

⁶ Na toe totogi foki e Amatesia i Iselaele ni kau tagata makeke mo toa e tino lelau afe ki ni fa tenalio siliva e tolu.

⁷ Na au loa se tagata a le Atua kiate ia, o pati : Ei sau, ke aua na tuku loa ke ano mo koe le solia a Iselaele, talie e leaise kau le Eteleno mo Iselaele, mo vosa fuli ana o Efalaimi.

⁸ Kapau e ke ano loa mo latou, e logo ai pe ke makeke loa i le tau, kae e tuku loa a koe e le Atua ke vilo i mua o ou fili, talie e maua e le Atua le pule ke tokoi ti ke fakavilo.

⁹ Na pati loa Amatesia ki le tagata a le Atua : Ti kolea loa ka fai ki fa tenalio paaga e kau lelau ala na kau soli ki le solia a Iselaele ? Na tali loa le tagata a le Atua : E feala ke soli atu kiate koe e le Eteleno o lasi mamao ake i le siliva lena.

¹⁰ Koia na tuku kese ai loa e Amatesia le solia leia na au kiate ia mei Efalaimi, o tupu ke toe fakaliliu latou ki olatou fale. Koia na tupu ai loa lolatou itaita lasi ki Suta, ti na lotou ano loa ki olatou fale mo se ita lasi ai.

¹¹ Na loto makeke loa Amatesia, ti na taki loa e ia lona kakai. Na ano loa a ia ki le vaivailiua o le patai, ti na tamate loa e ia ni kau tagata e tino agafulu afe o vosa o Seili.

¹² Ti na too mauli loa e vosa o Suta ni tagata e tino agafulu afe, ti na lotou ave loa latou ki le tumutumu o se utu taualuga, ti na lotou ti loa latou mei ai ki lalo, ti na lotou mamate fuli ai loa.

¹³ I le temi lena, ko le solia o Iselaele leia na toe fakaliliu e Amatesia ki olatou fale, ke aua na lotou ano ki le tau mo ia, na fai ia loa se ulu tau ki ni kolo o Suta mei Samalia o kaku ki Pete-Oloni, ti na lotou tamate loa a tagata e tino afe tolu ti na lotou kaia loa se koloa lasi ai.

Tausi taulaatua o Amatesia ; lona lava i Iselaele

¹⁴ I le toe liliu mai loa a Amatesia i le oki o le lava o le kau Etome, na aumai loa e ia ni fakatata mei vosa o Seili, ti na fakaliliu loa e ia latou ko ona atua ; na punou loa a ia i olatou mua o tutu kia latou ni nea fakamanogi.

¹⁵ Koia na sausaua loa le Eteleno kia Amatesia, ti na kakau loa e ia kia Amatesia se polofeta ke pati kiate ia : Kolea na ke toe afa ai a atua o le kakai lena, kae na leaise mafai ke lotou saofaki lolatou kakai mei lou lima ?

¹⁶ I le lolotoga masau a le polofeta, na pati loa Amatesia kiate ia : Pe na motou fakanofo a koe ko le tagata tokoi o le sau ? Ano kese ! Kolea e ke loto ai ke tamate a koe ? Ti na ano loa le polofeta, o pati : E kau iloa kua fakatotonu e le Atua ke maumaui a koe, o tupu na ke fai a nea ana ti na leaise ke fia fakalogo ki laku tokoi.

¹⁷ I le oki o lana afa tokoi, na kakau loa e Amatesia, sau o Suta, ke pati kia Soasi, vosa o Soakase, vosa o Seu, sau o Iselaele : Au ke ta felavei.

¹⁸ Ti na tali loa Soasi, sau o Iselaele, o pati kia Amatesia, sau o Suta : Na kakau e le laakau talatala o Lipane ke pati ki le sete o Lipane : Soli mai lou taine ke avaga mo loku vosa ! Kae na ano loa a manu vao o Lipane o takatakafi le laakau talatala.

¹⁹ E ke pati, na ke taai le kau Etome, ti kua malaga lou loto ki aluga o ke fakakololia kiate koe. Ke ke nofo i le aso nei i lou fenua. Kolea e ke loto ai ki se tau leia ka sikuga veli loa kiate koe mo Suta ?

²⁰ Kae na leaise fakalogo loa Amatesia, talie kua fakatuutuu e le Atua ke tuku a ia ki lima o le fili, o tupu ko lana afa a atua o Etome.

²¹ Ti na pale loa Soasi, sau o Iselaele, o tau mo Amatesia, sau o Suta, i Pete-Semesi leia e kau ki Suta.

²² Na lava loa a Suta i Iselaele, ti na lotou tasi sosola loa ki lona falela.

²³ Na too loa e Soasi, sau o Iselaele, a Amatesia, sau o Suta, vosa o Soasi, vosa o Soakase i Pete-Semesi. Na ave loa e ia a ia ki Selusalemi, ti na maumaui loa e ia a meta e kau lelau lua i le paa o Selusalemi, i le vasa o le matapa o Efalaimi mo le matapa i le tifi.

²⁴ Na too loa e Soasi le aulo mo le siliva katoa mo ipu fuli ala na tuku i le fale o le Atua, nea ala na leoleo e Opeto-Etome, ti mo koloa o le fale o le sau ; na toe too foki e ia mo ni kakai o ave popula, ti na toe liliu loa a ia ki Samalia.

²⁵ Na mauli loa Amatesia, vosa o Soasi, sau o Suta, i fetuu e kau agafulu tupu lima i le oki o le mate o Soasi, sau o Iselaele, vosa o Soakase.

²⁶ Ko le toe o gaoi a Amatesia, mei le kamataaga o kaku ki le fakaoki, pe se tosi a ia i le tosi fakamatala ki sau o Suta mo Iselaele ?

²⁷ Talu mei le titua a Amatesia ki le Eteleno, na fai loa se agatuu i Selusalemi ke tamate a ia, ti na sola loa a ia ki Lakisi ; kae na tuli loa a ia o kaku ki Lakisi, o tamate ai loa a ia.

²⁸ Na aumai loa a ia i ni osi, ti na tanu fakatasi loa a ia mo ona tamana i le kolo o Tavite.