Lua tosi o Koloniko 24 - Tosi Tapu

Fau o maumau o le fale tapu e Soasi

¹ Na sau Soasi i lona fetuu fitu, ti na sau loa a ia i fetuu e kau fa i Selusalemi. Na igoa lona tinana ko Tesipa, mei Peele-Sepa.

² Na fai loa e Soasi le nea leia e malie ki mata o le Eteleno i le lolotoga o le mauli katoa o le tagata faisakilifisio ko Seosata.

³ Na too loa e Seosata ni avaga e lua kia Soasi. Ti na fakatupu loa e Soasi ni vosa mo ni taineliki.

⁴ I le oki o le nea lena, na maua loa e Soasi le manatu ke fakafoou le fale o le Eteleno.

⁵ Na tanaki loa e ia le kau tagata faisakilifisio mo le kau Levi, o pati kia latou : Kotou ano i kolo o Suta, ti kotou tanaki loa i Iselaele katoa se paaga, i le fetuu taki tasi, ke fakafoou ai le fale o lokoutou Atua ; ti ke kotou fai fakavavevave a ia. Kae na leaise fakavavevave loa le kau Levi.

⁶ Na kalagai loa e le sau a Seosata, le tagata faisakilifisio lasi, o pati kiate ia : Kolea na leaise ke tokaga ai ke aumai e le kau Levi mei Suta mo Selusalemi le tukusau leia na fakatotonu e Moisese, tagata fakasausau a le Eteleno, ti na teki ki le fakatasiga a Iselaele o uiga mo le falela o le fakamaoki ?

⁷ Talie na maumaui e le fafine aga fakalialia ko Atalia mo ona tama le fale o le Atua, ti na lotou fakaaoga kia Paale a nea taputapu fuli o le fale o le Eteleno.

⁸ Koia na fakatotonu loa e le sau ke fai se fa pusa, ti ke tuku a ia i le matapa o le fale o le Eteleno, i fafo.

⁹ Ti na fakasasa loa i Suta mo Selusalemi ke aumai ki le Eteleno le tukusau leia na fakatotonu e Moisese, tagata fakasausau a le Eteleno, ki Iselaele i le toafa.

¹⁰ Na fiafia loa le kau pule fuli mo le kakai katoa i le nea lena, ti na aumai loa o velo ki le fa pusa le tukusau katoa leia na tonu ke totogi.

¹¹ I le temi leia na tio ai loa le kau Levi kua lasi le paaga i le fa pusa, ti kua tonu ke tuku a ia ki kovana a le sau, na au loa le sekalaipe a le sau ti mo le kovana a le tagata faisakilifisio lasi, o too le paaga kae la toe tuku le fa pusa ki lona tuuaga ; na la fai fenaaki i le aso taki tasi, ti na la tanaki loa se paaga lasi ai.

¹² Na soli loa a ia e le sau mo Seosata kia latou ala na tokaga ki le fai o gaoi o le fale o le Eteleno, ti na totogi ki ai ni tagata tafatu, mo ni tagata fai papa ke fakafoou ia le fale o le Eteleno, ti mo ni tagata popoto i gaoi o le ukamea mo le sila ke fakafoou ia le fale o le Eteleno.

¹³ Koia na gaoi ai loa le kau tagata gaoi, ti na ano malie loa a gaoi o le fakafoou o le fale i olatou lima ; na lotou fakafoou loa le fale o le Eteleno ki lona agaaga totonu, ti na lotou toe fakamakeke foki a ia.

¹⁴ I le oki o le gaoi, na lotou ave loa ki le sau mo Seosata le toe o le paaga ; ti na fai loa ki ai ni ipu ki le fale o le Eteleno : ni nea ki le tausi mo failaulau, io, ni ipu mo ni pesini aulo mo siliva. Ti na momoli tuumau loa, i le mauli katoa o Seosata, ni failaulau i le fale o le Eteleno.

¹⁵ Kae na fakaau loa o matua a Seosata, ti na mate loa a ia i lona fetuu kau lelau kau tolu.

¹⁶ Na tanu loa a ia i le kolo o Tavite o fakatasi mo sau, talie na fai e ia le nea e malie i Iselaele, ki le Atua mo lona fale.

Tausi taulaatua mo mauli galo o Soasi ; lona tautea mo lona mate

¹⁷ I le oki o le mate o Seosata, na au loa le kau pule o Suta o punou i mua o le sau ko Soasi. Ti na fakalogo loa le sau kia latou.

¹⁸ Ti na lotou tiaki loa le fale o le Eteleno, le Atua o olatou tamana, kae lotou tausi loa ki Asetalate mo taulaatua. Na vilo loa le sausau o le Eteleno ki Suta mo Selusalemi, o tupu ko agasala ana.

¹⁹ Na kakau loa e le Eteleno kia latou ni polofeta ke toe aumai latou kiate ia, kae na leaise lotou fakalogo loa ki valoki ala na lotou fai kia latou.

²⁰ Na ifo loa le Laumalie o le Atua kia Sakalia, vosa o le tagata faisakilifisio ko Seosata, ti na ano loa a ia ki mua o le kakai, o pati kia latou : Ko leinei le folafola a le Atua : Kolea e kotou maumaui ai a folafola a le Eteleno ? E leaise kotou manuia loa ; o tupu na kotou tiaki le Eteleno, kua tiaki loa e ia koutou.

²¹ Ti na fono loa e le kakai ke tamate a ia, ti na lotou tuki fatui loa a ia o mulimuli ki le fakatotonu a le sau, i le lotoa o le fale o le Eteleno.

²² Na leaise manatui loa e le sau ko Soasi le agamalie kiate ia o Seosata, tamana o Sakalia, kae na tamate loa e ia le vosa o Seosata. Na pati loa Sakalia i lona mate : Ke tio le Eteleno, ti ke totogi e ia !

²³ I le sili o le fetuu katoa, na pale ake loa le solia a le kau Silia ke taui Soasi, ti na lotou au loa ki Suta mo Selusalemi. Na lotou tamate loa le kau pule fuli o le kakai, ti na lotou fetuku loa ki le sau o Tamaso a koloa fuli o le tau.

²⁴ Na lavaki fua le solia a le kau Silia ; kae logo ai lolatou lavaki, na tuku loa e le Eteleno ki olatou lima se solia toka api ai, o tupu na lotou tiaki le Eteleno, le Atua o olatou tamana. Ti na fakasoko loa e le kau Silia le fakamaaui a le Atua kia Soasi.

²⁵ I lalatou toe fakamamao loa iate ia, kae tuku loa Soasi i ni mamae lasi, na fono loa ana tagata fakasausau ke tamate a ia o tupu ko le toto o vosa o le tagata faisakilifisio ko Seosata ; na lotou tamate loa a ia i lona palepale, ti na mate ai loa a ia. Na tanu loa a Soasi i le kolo o Tavite, kae na leaise tanu loa a ia i tanuma o sau.

²⁶ Ko nei latou ala na fonoaki ia lona mate : Ko Sapate, tama o Simeate ko se fafine Amoni, mo Sosapate, tama o Simelite ko se fafine Moape.

²⁷ O uiga mo ona vosa, mo folafola fakakikite o uiga mo ia, ti mo gaoi ala na fai ke fakafoou ai le fale o le Eteleno, e tosi le nea lena i le tosi fakamatala ki sau. Na sau loa Amatesia, lona vosa, o fetogi a ia.