Lua tosi o Koloniko 23 - Tosi Tapu

Soasi, sau o Suta ia Seosata

¹ I le fitu o fetuu, na loto makeke loa Seosata ti na fai loa e ia se sai mo pule o tino lelau ko Asalia, vosa o Selokame, mo Isemaele, vosa o Sokanane, mo Asalia, vosa o Opeto, mo Maasesa, vosa o Atasa, ti mo Elisapate, vosa o Sikeli.

² Na lotou ano loa i Suta katoa, ti na lotou tanaki loa le kau Levi mei kolo fuli o Suta, ti mo le kau pule o famili o Iselaele ; ti na lotou au loa ki Selusalemi.

³ Na fai loa e le fakatasiga katoa se sai mo le sau i le fale o le Atua. Ti na pati loa Seosata kia latou : Ko leinei, e sau loa le vosa o le sau, ofaipe lona fakasa e le Eteleno o uiga mo vosa o Tavite.

⁴ Ko leinei le nea leia e kotou fai loa. Ko le tolu vaega o koutou leia e gaoi i le aso o le sapato, tagata faisakilifisio mo Levi, e fai ia loa le leoleo o mua matapa,

⁵ e tuu loa se tasi vaega tolu i le fale o le sau, ti ko leia ake vaega tolu i le matapa o Sesote. E nofo loa le kakai katoa i loto o lotoa o le fale o le Eteleno.

⁶ Ke aua na ulu loa se tasi ki le fale o le Eteleno, gato fai ki le kau tagata faisakilifisio mo le kau Levi ala e gaoi : e lotou ulu loa ki loto, talie kua fakatapui latou. Kae ke fai loa e le kakai katoa le leoleo o le Eteleno.

⁷ E takatakai loa e le kau Levi le sau i ona fetuu fuli, o tasi too ana masafu i ona lima, ti e tamate loa leia e ulu loa ki le fale : e kotou tutuu loa i tafa o le sau, mo ka ulu loa a ai ki loto ti mo ka ulu loa a ia ki fafo.

⁸ Na mulimuli loa le kau Levi mo Suta katoa ki fakatotonu ala na tuku e le tagata faisakilifisio ko Seosata kia latou. Na lotou tasi too loa lana kakai, latou ala na ulu o gaoi, mo latou ala kua oki lalatou gaoi i le aso o le sapato ; talie na leaise tuku noa e le tagata faisakilifisio ko Seosata se vaega.

⁹ Na tuku loa e le tagata faisakilifisio ko Seosata ki pule o tino lelau a tao mo paletau, lalasi mo liliki, ala na tuku i le fale o le Eteleno mei le temi o le sau ko Tavite.

¹⁰ Na fakatotonu loa e le tagata faisakilifisio ko Seosata ke takatakai le sau, o fakatuutuu loa e ia le kakai katoa mo alatou masafu i olatou lima, mei le fetuu atamai ki le fetuu sema o le fale, o ofi ki le aletale mo le fale.

¹¹ Na fakasaele mai loa le vosa o le sau, ti na teki loa ki lona fa ulu le pala fakasau ti na fakatoo loa kiate ia le tosi o le sai, ti na fakanofo loa a ia ko le sau. Ti na pani loa e Seosata mo ona vosa le sau ki le lolo, o pati : Ke mauli le sau !

Tamate o Atalia

¹² Na logo loa Atalia ki le logoa a le kakai leia na makape mo kalaga ki le sau, ti na au loa a ia ki le kakai i le fale o le Eteleno.

¹³ Na tio loa a ia. Ti ko leinei, kua tuu le sau i lona tuuaga i le uluaga ; ti na ofi ki le sau le kau pule mo fakatagi pupusi ; ti na fiafia le kakai katoa o le fenua, o pupusi fakatagi, ti na taki e le kau sua mo le kau fai musika a sua fakavikiviki. Na sae loa e Atalia ona kofu, o pati : Kaka ! Kaka !

¹⁴ Koia na fakafeofi ake ai loa e le tagata faisakilifisio ko Seosata le kau pule o tino lelau, o pati kia latou : Kotou ave a ia ki fafo, ti ke tamate ki le seleta leia e muli loa iate ia. Talie na pati le tagata faisakilifisio : Aua na kotou tamate a ia i loto o le fale o le Eteleno.

¹⁵ Na fakamavaa loa le ala kiate ia, ti na ano loa a ia ki le fale o le sau i le uluaga o le matapa o osi ; ko le ganea loa lena na lotou tamate ai loa a ia.

Seosata, nea gaoi a le Atua ki le fakaala o le kakai

¹⁶ Na fai loa e Seosata, mo le kakai katoa, ti mo le sau, se sai, o tupu ko le kakai latou a le Eteleno.

¹⁷ Na ulu loa le kakai katoa ki le fale o Paale, o maumaui a ia ; na lotou laliki loa ona aletale mo ona fakatata, ti na lotou tamate loa Matane, pelepitelo a Paale, i mua o aletale.

¹⁸ Na toe tuku loa e Seosata a gaoi o le fale o le Eteleno ki lima o le kau tagata faisakilifisio, mo le kau Levi, ala na fakavaevae e Tavite i le fale o le Eteleno, o tupu ke lotou momoli a failaulau ki le Eteleno, ofaipe lona tosi i le lao a Moisese, i loto malie o ni fakafiafia mo ni sua, o mulimuli ki fakatotonu a Tavite.

¹⁹ Na fakanofo loa e ia a tagata leo ki matapa o le fale o le Eteleno, o tupu ke aua na ulu ki loto se tasi leia e kelekele.

²⁰ Na too loa e ia a pule o tino lelau, mo tagata mauiga, mo tagata takitaki o le kakai, ti mo le kakai katoa o le fenua, ti na lotou taki loa le sau mei le fale tapu o le Eteleno ki le fale o le sau, i le matapa lasi. Ti na lotou fakaeke loa le sau ki le ekeekeaga fakasau.

²¹ Na fakafiafia loa le kakai katoa o le fenua, ti na fimalie loa le kolo. Na tamate loa Atalia ki le seleta.