Lua tosi o Koloniko 22 - Tosi Tapu

Akasia, sau o Suta ; lana tausi taulaatua mo lona mate

¹ Na fakanofo loa e le kakai o Selusalemi a Akasia, le vosa mulimuli o Solame, ke sau o fetogi a ia ; talie na tamate e le solia leia na au mo le kau Alape latou fuli ala na mua. Koia na sau loa a Akasia, vosa o Solame, sau o Suta.

² Na fetuu kau fa tupu lua Akasia i le temi leia na sau ai, ti na sau loa a ia i le fetuu e tasi i Selusalemi. Na igoa lona tinana ko Atalia, taine o Omeli.

³ Na saele loa a ia i le ala o le fale o Akapo, o tupu na soli e lona tinana kiate ia ni tokoi veveli.

⁴ Na fai loa e ia le nea leia e veli ki mata o le Eteleno, ofaipe le fale o Akapo, leia na maua loa e ia mei ai ni tagata tokoi i le oki o le mate o lona tamana ki lona malaia.

⁵ Na muli loa a ia ki alatou tokoi, o ano loa a ia mo Solame, vosa o Akapo, sau o Iselaele, ke taui Asaele, sau o Silia, i Lamoti i Kalaate. Ti na lavea loa Solame i le kau Silia.

⁶ Na toe liliu loa Solame mei ai ki Siseleele ke faitoo ona lavea ala na fai e le kau Silia i le tau i Lama, i le temi na taui ai e ia Asaele, sau o Silia. Na ifo loa Asalia, vosa o Solame, sau o Suta, o fakatele kia Solame, vosa o Akapo, i Siseleele, i lona masaki.

⁷ Ko le finegalo lena o le Atua ke ifo Akasia o fakatele kia Solame, talie ke mate ai. I le kaku loa a Akasia ki Siseleele, na ano loa a ia mo Solame o fakafetaulaki kia Seu, vosa o Nimesi, leia na fakanofo e le Eteleno ko le sau o tupu ke tamate le fale o Akapo ke puli.

⁸ I le lolotoga fai e Seu le fakamaaui a le Atua ki le fale o Akapo, na maua loa e ia a pule o Suta mo vosa o fetaina o Akasia, ala na tausi kia Akasia, ti na tamate loa e ia latou.

⁹ Na afa loa e ia Akasia, ti na tapo loa a ia i Samalia, leia na mumuni ai. Na aumai loa a ia kia Seu, ti na tamate loa a ia. Ti na lotou tanu loa a ia, talie na lotou pati : Ko le vosa o Sosafate, leia na afa ia le Eteleno i lona loto katoa. Ti na leaise toe loa se fa toka tasi i le fale o Akasia ke feala ke sau.

Atalia, sau o Suta

¹⁰ I le tio loa a Atalia, tinana o Akasia, kua mate lona tama, na tuu loa a ia o tamate le sakoga sau fuli o le fale o Suta.

¹¹ Kae na too loa e Sokapeta, taine o le sau, a Soasi, vosa o Akasia, o sola mamao mei vosa o le sau, i le temi leia na tamate ai latou : na tuku loa e ia a ia mo lona fafine taupau ki le kogafale o palepale. Koia na fufu ai loa a ia e Sokapeta, taine o le sau ko Solame, avaga o le tagata faisakilifisio ko Seosata, tuagaane o Akasia, mei le lima o Atalia, ti na leaise mate ai loa a ia.

¹² Na nofo loa Soasi mo laua, o mumuni i le fale o le Atua i fetuu e ono. Ti na sau loa Atalia i le fenua.