Lua tosi o Koloniko 21 - Tosi Tapu

Solame, sau o Suta : lona tautea

¹ Na moe loa Sosafate mo ona tamana, ti na tanu loa a ia mo ona tamana i le kolo o Tavite. Ti na sau loa Solame, lona vosa, o fetogi a ia.

² Na maua e Solame ni fetaina, vosa o Sosafate : ko Asalia, mo Seiele, mo Sakalia, mo Asalia, mo Misaele, mo Sefatia, ko vosa fuli latou o Sosafate, sau o Suta.

³ Na fai e lolatou tamana kia latou ni nea alofa lasi ai, ko ni siliva, mo ni aulo, mo ni nea mauiga, mo ni kolo tau i Suta ; kae na tuku loa e ia le puleaga kia Solame, talie ko le uluaki a ia.

⁴ I le soko a Solame ki le puleaga o lona tamana, na liliu loa a ia o makeke, ti na tamate loa e ia ona fetaina fuli ti mo ni iki o le kau pule o Iselaele.

⁵ Na sau Solame i lona fetuu kau tolu tupu lua, ti na sau loa a ia i fetuu e valu i Selusalemi.

⁶ Na saele loa a ia i le ala o sau o Iselaele, ofaipe le fale o Akapo, talie na avaga a ia mo le taine o Akapo, ti na fai loa e ia le nea leia e veli ki mata o le Eteleno.

⁷ Kae na leaise loto loa le Eteleno ke maumaui le famili o Tavite, o tupu ko le sai leia na fai e ia mo Tavite ti mo le fakapapau leia na fai e ia kiate ia ke soli tuumau se malama kiate ia mo ona vosa.

⁸ I le sau o Solame, na agatuu loa Etome ki le pule a Suta, ti na fakanofo loa e ia se sau kiate ia.

⁹ Na ano loa Solame mo ana pule solia mo ana saliote tau fuli ; na tuu ake loa a ia i le pouli, o taai le kau Etome ala na takatakai ia a ia mo pule o saliote.

¹⁰ Na talu mei ai le agatuu a Etome ki le pule a Suta o kaku mai ki le aso nei. Na toe agatuu foki Lipena i le temi lena ki le pule a Suta, o tupu na tiaki e Suta le Eteleno, le Atua o ona tamana.

¹¹ Na toe fai foki e Solame ni ganea taualuga i mauga o Suta ; na toe eke fakamakeke foki e ia le kakai o Selusalemi ke fai feauaki ki taulaatua, ti na fakasesei loa e ia a Suta.

Fakasa e Elia o le tautea o Solame

¹² Na aumai loa kiate ia se tosi mei le polofeta ko Elia, o pati i ai : Ko leinei le folafola a le Eteleno, le Atua o Tavite, lou tamana : O tupu na leaise ke saele i ala o Sosafate, lou tamana, ti mo ala o Asa, sau o Suta,

¹³ kae na ke saele i le ala o sau o Iselaele, o tupu na ke taki le kakai o Suta mo le kakai o Selusalemi ke fai feauaki ki taulaatua, ofaipe le nea leia na fai e le famili o Akapo ki Iselaele, o tupu na ke tamate ou fetaina, ala na malilie ake iate koe, le fale totonu o lou tamana,

¹⁴ ko leinei, e taai loa e le Eteleno lou kakai ki se tautea lasi, mo ou vosa, mo au avaga, ti mo au nea fuli ;

¹⁵ ti ko koe, e taai loa e ia a koe ki se masaki veli, ki se masaki manava, leia e asilisili loa i aso fuli o kaku ki le mapaa loa o ou tootooga ki tafa i le lasi o le mamae.

¹⁶ Ti na lagai ake loa e le Eteleno le kau Filisitini mo le kau Alape ala na nonofo i tafatafa o le kau Etiopia ke taui Solame.

¹⁷ Na lotou pale loa ke taui a Suta, ti na lotou ulu loa ki le fenua, ti na lotou too loa a koloa fuli ala na tuku i le fale o le sau, ti na lotou ave loa ona vosa mo ana avaga, o toe fai kiate ia a Soakase, lona vosa mulimuli.

¹⁸ I le oki o nea fuli ana, na taai loa a ia e le Eteleno ki se masaki manava leia na leaise mafai ke faitoo ;

¹⁹ na asilisili veli loa a ia i aso taki tasi, kae i le fakaoki o le lua o fetuu, na mapaa loa tootooga o Solame ki tafa i le lasi o lona mamae. Na mate loa Solame i le lasi o lona mamae ; ti na leaise tutu loa e lona kakai ni kaloni kiate ia, ofaipe lana fai ki ona tamana.

²⁰ Na sau a ia i lona fetuu kau tolu tupu lua, ti na sau loa a ia i fetuu e valu i Selusalemi. Na ano loa Solame ti na leaise tasi na mamae kiate ia, ti na tanu loa a ia i le kolo o Tavite, kae leai i tanuma o sau.