Lua tosi o Koloniko 20 - Tosi Tapu

Malo o Sosafate i le kau Moape, mo le kau Amone, mo le kau Etome.

¹ I le oki o le nea lena, na ano loa a vosa o Moape mo vosa o Amone, ti mo ni tagata Maoni, ke taui Sosafate.

² Na fakasa loa le nea lena kia Sosafate, o pati : Kua saele mai se kakai toka api kiate koe mei leia atu fetuu o le tai, mei Silia, ti kua lotou nonofo nei i Atesasoni-Tamale, leia ko Ene-Keti.

³ I le i o Sosafate, na loto loa a ia ke afa le Eteleno, ti na fakatotonu loa e ia ke fai se sesunio i Suta katoa.

⁴ Na fakatasi loa Suta ke kole se tokoi ki le Eteleno, ti na au loa mei kolo fuli o Suta ke afa le Eteleno.

⁵ Na tuu loa Sosafate i loto malie o le fakatasiga a Suta mo Selusalemi, i le fale o le Eteleno, i mua o le lotoa foou.

⁶ Ti na pati loa a ia : Eteleno, Atua o omatou tamana, pe leaise ko le Atua a koe o le lagi, pe e leaise ko koe leia e pule ki puleaga fuli ? Pe e leaise ko koe leia e maua ia le makeke mo le mafimafi, talie e leaise mafai ke tuu se tasi i ou mua ?

⁷ Pe leaise ko koe, ei lomatou Atua, leia na kapu ia le kakai o le fenua leinei, i mua o lou kakai ko Iselaele, ti na soli ia a ia o lee gato ki le sakoga o Apalaamo leia na alofa kiate koe ?

⁸ Na lotou nofoi a ia, ti na lotou fakatuu i ai se sagatualio ki lou suafa, o pati :

⁹ Ka soko mai loa kia tatou se malaia, pe ko le seleta, pe ko le fakamalaia, pe ko le taumasaki, pe ko le oge, kapau e motou tutuu loa i mua o le fale leinei ti mo ou mua, (talie e agai lou suafa i le fale leinei), ti kapau e motou tagi loa kiate koe i loto malie o lomatou mamae, ti e ke tali loa matou ti e ke saofaki loa matou !

¹⁰ I le lakaga nei, ko leinei a vosa o Amone mo Moape, mo latou o le mauga o Seili, ala na leaise ke fakataga ia ke ulu ki ai Iselaele i le aso na au ai a ia mei Esipito, - talie na maliu kese a ia meia latou ti na leaise maumaui e ia latou, -

¹¹ ko leinei latou kua lotou fakapale matou i le aso nei, o au ke kapu matou i lou tofiga, le fenua leia na ke soli mai kia matou.

¹² Ei lomatou Atua, pe leaise ke fakasoko ia loa au fakamaau kia latou ? Talie e leaise motou maua se makeke i mua o le kakai toka api lena kua saele mai kia matou, ti e leaise motou iloa se nea leia ke fai, kae e tio atu omatou mata kiate koe.

¹³ Na tuu Suta katoa i mua o le Eteleno, mo olatou makopuna fuli, mo olatou avaga mo olatou vosa.

¹⁴ Koia na too ai loa e le Laumalie o le Eteleno i loto malie o le fakatasiga a Sakasiele, vosa o Sakalia, vosa o Penasa, vosa o Seiele, vosa o Matania, Levi, mei vosa o Asafe.

¹⁵ Ti na pati loa Sakasiele : Kotou fakalogologo mai, Suta katoa mo le kakai o Selusalemi, ti mo koe, sau ko Sosafate ! Ko leinei le folafola a le Eteleno kia koutou : Aua na kotou tuania ti aua na kotou i ki le kakai toka api lena, talie e leaise ko koutou loa ala ka tau, kae ko le Atua.

¹⁶ I apogipogi, kotou ifo loa kia latou ; e lotou pale mai loa i le mauga o Tesite, ti e kotou maua loa latou i le potupotu o le vaivailiua, i mua o le toafa o Seluele.

¹⁷ E leaise kotou tau loa i le tau lena : Ke kotou ano fua, ke kotou tutuu i ai, ti e kotou tio loa ki le saofaki leia ka tuku atu loa e le Eteleno kia koutou. Suta mo Selusalemi, aua na kolua tuania ti aua na kolua i, i apogipogi, kotou ulu ki fafo o fakafetaulaki kia latou, ti e kau loa le Eteleno mo koutou !

¹⁸ Na punou loa Sosafate o fakatau ona mata ki le kele, ti na punou loa Suta katoa mo le kakai o Selusalemi i mua o le Eteleno, o su kiate ia.

¹⁹ Na tutuu ake loa ki aluga le kau Levi mei vosa o Keati mo vosa o Kole, o fakamalo leo lasi ki le Eteleno, le Atua o Iselaele.

Vikiviki a le kakai ; maumau o le fili

²⁰ I leia ake a aso, na lotou usuusu loa ki le toafa o Tekoa. I mua o lalatou mavae, na tuu loa Sosafate i olatou mua, o pati : Kotou fakalogo mai kiate au, Suta mo le kakai o Selusalemi ! Kotou fanaki ki le Eteleno lokoutou Atua, ti e kotou tuu makeke loa ; kotou fanaki ki ana polofeta ti e kotou manuia loa.

²¹ Ti na loto tasi loa a ia mo le kakai ke filifili loa e ia se kau sua, ala na kofu ia loa a teu taputapu ti na saele loa i mua o le solia, ke fakavikiviki ki le Eteleno, o pati : Kotou fakavikiviki ki le Eteleno talie e lee gato lona manava alofa !

²² I le temi leia na kamata ai a sua mo fakavikiviki, na fakamaveuveu loa e le Eteleno le kau solia a le kau Amone, mo le kau Moape, ti mo latou mei le mauga o Seili, ala na au ke taui a Suta. Ti na lotou lava loa.

²³ Talie na oso loa a vosa o Amone mo Moape ki le kakai o le mauga o Seili, ti na lotou tamate loa latou fuli : i le oki o lalatou tamate le kakai o Seili, na lotou fetokoiaki loa o fetamateaki loa ia latou.

²⁴ I le kaku loa a Suta ki le mauga leia na tio meiai ki le toafa, na lotou tio loa ki le ganea leia na nonofo ai le kakai, ti ko leinei, kua faliki le kele e mate ata, ti na leaise sao fua se fa toka tasi.

²⁵ Na ano loa Sosafate mo lona kakai o tae a koloa o le kau mate, ti na lotou maua loa ni koloa lasi ai, mo ni nea mauiga, ti na lotou tae loa ni koloa o lasi ake i le nea na mafai ke lotou ave. Na aso tolu lalatou tae a koloa, talie na lasi ai.

²⁶ I le fa o aso, na lotou fakatasi loa i le vaivailiua o Pelaka, ti na lotou fakavikiviki loa ki le Eteleno ; koia na lotou fakaigoa ai loa le ganea lena ko le vaivailiua o Pelaka, ti na tuu loa le igoa lena o kaku mai ki le aso nei.

²⁷ Na toe liliu loa a tagata fuli o Suta mo Selusalemi mo lolatou pule ko Sosafate i le fiafia lasi ki Selusalemi, talie na fakaapele loa latou e le Eteleno ki le fiafia o tupu ko lana saofaki latou mei olatou fili.

²⁸ Na lotou ulu loa ki Selusalemi, ki le fale o le Eteleno, ki le tagi o nea fai musika, le lute, mo le alepe, ti mo le fakatagi pupusi.

²⁹ Na mafola loa le i ki le Eteleno i puleaga fuli o la ake fenua, i le logo na taai e le Eteleno a fili o Iselaele.

³⁰ Ti na fimalie loa le puleaga o Sosafate, talie na soli loa kiate ia e lona Atua le tokamalie i ona tafatafa fuli.

Fakatoetoe o le sau o Sosafate

³¹ Na sau loa Sosafate i Suta. Na sau a ia i lona fetuu kau tolu tupu lima, ti na sau loa a ia i lolotoga o fetuu e kau lua tupu lima i Selusalemi. Na igoa lona tinana ko Asupa, taine o Silesi.

³² Na saele loa a ia i le ala o lona tamana ko Asa, ti na leaise toe maliu kese loa a ia mei ai, o fai le nea leia e totonu i mua o le Eteleno.

³³ Kae na leaise puli loa a ganea taualuga, ti na leaise pipiki makeke foki le loto o le kakai ki le Atua o olatou tamana.

³⁴ Ko le toe o gaoi a Sosafate, a uluaki mo fakaoki, kua tosi le nea lena i le tosi a Seu, vosa o Anani, leia kua fakaulu ki tosi fakamatala ki sau o Iselaele.

³⁵ I le sili o nea ana, na fakatasi loa a Sosafate, sau o Suta, mo le sau o Iselaele ko Akasia, leia na aga fakalialia.

³⁶ Na fakatasi loa a ia mo Akasia o fau ni vaka ke ano ki Talesisi, ti na la fai loa a vaka i Etesoni-Kepele.

³⁷ Koia na folafola loa a Eliesele, vosa o Totava, mei Malesa, kia Sosafate, o pati : O tupu na ke fakatasi mo Akasia, e maumaui loa e le Eteleno au gaoi. Ti na maumau loa a vaka, o leaise mafai loa ke lotou ano ki Talesisi.