Lua tosi o Koloniko 2 - Tosi Tapu

Teuteu ki le laga o le fale tapu

¹ Na fakatotonu loa e Salomone ke laga se fale ki le suafa o le Eteleno, ti mo se fale sau kiate ia.

² Na lau loa e Salomone ni tagata e tino fitu afe ke amo ia a kavega, mo tagata e tino valu afe ke ta ia a fatu i le mauga, ti mo ni tagata e tino afe tolu mo tino lelau ono ke leoleo kia latou.

³ Na kakau loa e Salomone ke pati kia Ilame, le sau o Tile : Ke ke fai mai kiate au ofaipe lau fai kia Tavite, loku tamana, leia na ke aumai ki ai ni sete ke fau ai lona fale nofo.

⁴ Ko leinei, e kau laga ia se fale ki le suafa o le Eteleno, loku Atua, se fale ke fakatapu kiate ia, ke tutu ai le kaloni fakamanogi i ona mua, ke tuku tuumau ai a pane tapu, ti ke momoli ai a failaulau o le usu, mo le afiafi, mo sapato, mo masina foou, ti mo aso lalasi o le Eteleno, lomatou Atua, o mulimuli ki se lao lee gato ki Iselaele.

⁵ Ko le fale leia e kau fakatuu e tonu ke lasi, talie e lasi ake lomatou Atua i atua fuli.

⁶ Kae ko ai leia e mafai ia le laga o se fale kiate ia ? Talie ko leinei e leaise mafai ke o a ia i le laulasi katoa o le lagi. Ti ko ai au ke laga ia se fale kiate ia ? E kau laga fua se fale ke tutu ai ni nea fakamanogi i ona mua.

⁷ Koia ke ke kakau mai ai kiate au se tagata leia e poto i gaoiaga fuli o le aulo, mo le siliva, mo le sila, mo le ukamea, mo kie kula malama, mo kie kula fakapouli, mo kie usi, ti e toe poto foki i le togi o nea fakateuteu, o tupu ke gaoi fakatasi a ia mo kau tagata popoto ala e nonofo mo au i leinei, i Suta mo Selusalemi, latou ala na filifili e Tavite, loku tamana.

⁸ Ke ke toe aumai foki kiate au mei Lipane ni sete, mo ni sipele, ti mo ni asi ; talie e kau iloa e popoto au tagata fakasausau i le sele o laakau o Lipane. Ko leinei, e gaoi fakatasi loa aku tagata fakasausau mo au tagata fakasausau.

⁹ Ke ke sapena mai kiate au se laakau ke lasi ai, talie e lasi loa ti e fulumalie loa le fale leia ka kau aga o fakatuu.

¹⁰ E kau soli loa ki au tagata fakasausau ala e sele ia loa le laakau ni fua fulumeto e kau lua afe, mo ni fua fulumeto olese e kau lua afe, mo ni fua vino e kau lua afe, mo ni fua lolo e kau lua afe.

¹¹ Na tali loa Ilame, sau o Tile, kia Salomone i se tosi leia na fakamomoli e ia kia Salomone : Kua fakanofo a koe e le Eteleno ke sau ki lona kakai, o tupu ko lona alofa kiate ia.

¹² Na toe pati foki Ilame : Ke fakafetai ki le Eteleno, le Atua o Iselaele, leia na fakatupu ia le lagi mo le kele, i lana soli ki le sau ko Tavite se vosa poto, mo fakapotopoto, ti mo atamai, leia ka fakatuu ia loa se fale ki le Eteleno ti mo se fale sau kiate ia !

¹³ Koia e kau kakau atu ai loa kiate koe se tagata poto mo fakakaukau,

¹⁴ ko Ulame Api, leia e tinana ki se fafine mei taineliki o Tane, ti e tamana ki se tagata mei Tile. E poto a ia i gaoiaga fuli o le aulo, mo le siliva, mo le sila, mo le ukamea, mo le fatu, mo le laakau, mo kie lanu viole, mo lanu usi, mo kie tetea, ti mo gaoiaga fakateuteu kesekese fuli. E gaoi loa a ia mo tagata popoto a loku aliki ko Tavite, lou tamana.

¹⁵ I le lakaga nei, ke aumai e loku aliki ki ana tagata fakasausau le fulumeto, mo le olese, mo le lolo, ti mo le vino, ala na masau a ia ki ai.

¹⁶ Ti ko matou, e motou sele loa le laakau mei Lipane, le laakau fuli leia e aoga kiate koe ; e motou saisai loa le laakau o fakatele atu a ia i le tai o kaku ki Safo, ti e ke fakakaku loa a ia ki Selusalemi.

¹⁷ Na tae loa e Salomone a tagata matapule fuli ala na nonofo i le fenua o Iselaele, ti na kau i le lau o Iselaele e Tavite, lona tamana. Na maua loa ko le tino lelau tino lima tupu tolu afe mo tino lelau e ono.

¹⁸ Ti na vaei loa e ia le tino fitu afe ki le amo, ti mo le tino valu afe ki le ta o fatu i le mauga, ti mo tino afe e tolu mo tino lelau e ono ke leoleo mo lagiaki ia le gaoi a le kakai.