Lua tosi o Koloniko 19 - Tosi Tapu

Valoki a Seu kia Sosafate

¹ Na toe liliu loa i le tokamalie a Sosafate, sau o Suta, ki lona fale i Selusalemi.

² Ti na ano loa Seu, vosa o Anani, le polofeta, o fakafetaulaki kiate ia. Ti na pati loa a ia ki le sau ko Sosafate : Pe totonu kiate koe ke ke tokoi ki le tagata agaveli ? Pe ke alofa kia latou ala e vesia ki le Eteleno ? Koia kua ita ai le Eteleno kiate koe.

³ Kae na maua e ia iate koe ni nea malilie, talie na ke fakapuli i le fenua a taulaatua, ti na ke afa le Atua i lou loto katoa.

Fakafoou o le fakamaau e Sosafate

⁴ Na nofo loa Sosafate i Selusalemi. Ti na toe fai loa e ia se fakatele ki le kakai, mei Pele-Sepa o kaku ki Efalaimi, ti na toe aumai loa e ia latou ki le Eteleno, le Atua o olatou tamana.

⁵ Na fakanofo loa e ia ni tui fakamaau i kolo tau fuli o Suta, i kolo taki tasi.

⁶ Ti na pati loa a ia ki le kau tui fakamaau : Ke kotou tokaga ki le nea e kotou fai loa, talie e leaise kotou fakamaaui le kakai i le igoa o ni tagata, kae e kotou fakamaaui i le suafa o le Eteleno, leia e ofi loa ia koutou mo ka kotou fai loa a fakamaau.

⁷ I le lakaga nei, ke nofo ia koutou le i ki le Eteleno, ti ke kotou tokaga ki lakoutou gaoi, talie e leaise maua i le Eteleno, lotatou Atua, se agaveli, mo se filifili mata ki tagata, ti mo se tali o ni nea alofa.

⁸ I lana toe liliu loa ki Selusalemi, na toe fakanofo foki e Sosafate i ai, ki fakamaau a le Eteleno mo visi, ni kau Levi, mo ni tagata faisakilifisio, ti mo ni kau pule o fale fakatamana o Iselaele.

⁹ Ti ko nei a fakatotonu ala na tuku loa e ia kia latou : E kotou gaoi loa i le i ki le Eteleno, mo le agatonu, ti mo le loto saosaoa.

¹⁰ I visi fuli ala e avatu loa kia koutou e okoutou fetaina i kolo ala e lotou nonofo ai, o uiga mo se tukipo, mo se lao, mo se fakatotonu, mo ni pelesepeto, mo ni fakatuutuu, ke kotou fakamalamai loa latou, o tupu ke aua na lotou agasala loa ki le Eteleno, ti ke aua na vilo loa lona sausau kia koutou mo okoutou fetaina. E kotou fai fenaaki loa, ti e leaise kotou faisala loa.

¹¹ Ti ko leinei, e kotou nofo loa mo Amalia, le tagata faisakilifisio lasi, ke pule kia koutou, o uiga mo nea fuli a le Eteleno, ti mo Sepatesa, vosa o Isemaele, pule o le fale o Suta, ke tokaga loa ki nea fuli a le sau, ti e kotou maua le kau Levi ke tui fakamaau i okoutou mua. Kotou fakamakeke ti kotou gaoi, ti ke kau loa le Eteleno mo leia e fai ia loa le nea e malie !