Lua tosi o Koloniko 18 - Tosi Tapu

Fakatasi a Sosafate mo Akapo o tau ki le kau Silia

¹ Na maua loa e Sosafate ni koloa mo se kololia o lasi ai, ti na fakatasi loa a ia mo Akapo, sau o Iselaele, o tupu ko se avaga.

² I le sili o ni fetuu, na ifo loa a ia kia Akapo i Samalia ; ti na tamate loa e Akapo ni ovi mo ni pipi o lasi ai, ke tali ai a ia mo le kakai leia na ifo mo ia, ti na kole loa e ia kia Sosafate ke pale mo ia ki Lamoti i Kalaate.

³ Na pati loa Akapo, sau o Iselaele, kia Sosafate, sau o Suta : Pe ke loto ke ke au mo au ki Lamoti i Kalaate ? Na tali loa Sosafate kiate ia : Ko au mo koe, ko loku kakai mo lou kakai, e tou ano loa o taui le kolo lena.

⁴ Ti na pati loa Sosafate ki le sau o Iselaele : E kau kole atu kiate koe, ke ke afa i le lakaga nei le finegalo o le Eteleno.

⁵ Na fakatasii loa e le sau o Iselaele le kau polofeta, ala na tino lelau fa, ti na pati loa a ia kia latou : Pe tou pale loa o taui Lamoti i Kalaate, pe tonu ke kau fakafiti ki ai ? Ti na tali loa le kau polofeta : Pale, ti e tuku loa a ia e le Atua ki lima o le sau.

⁶ Kae na pati loa Sosafate : Pe leaise toe i leinei se polofeta a le Eteleno, leia ke tou afa ki ai le folafola a le Eteleno ?

⁷ Na tali loa le sau o Iselaele kia Sosafate : Koi toe se tagata leia ke tou afa ki ai le folafola a le Eteleno ; kae e kau vesia kiate ia, talie e leaise fakasa e ia se nea malie, e fakasa fai e ia a nea veveli : ko Mikea, vosa o Simela. Ti na tali loa Sosafate : Ke aua se masau felaaki le sau !

⁸ Koia na kalagai loa e le sau o Iselaele se enuke, o pati kiate ia : Ano o afa mai ke vave a Mikea, vosa o Simela.

⁹ Ko le sau o Iselaele mo Sosafate, sau o Suta, na la tasi ekeeke i ola ekeekeaga fakasau, ti kua la teu ki ola kofu fakasau ; na la nonofo i le lotoa i le uluaga o le matapa o Samalia. Ti na fai kikite le kau polofeta fuli i ola mua.

¹⁰ Na fai loa e Setesiasi, vosa o Kenaana, ni ona tala ukamea, o pati : Ko leinei le folafola a le Eteleno : Ki tala anei, e ke taai loa le kau Silia o kaku ki lolatou maumaui.

¹¹ Ti na kikite loa le kau polofeta fuli, o pati : Pale ki Lamoti i Kalaate ! e ke manuia loa, talie e tuku loa a ia e le Eteleno ki lima o le sau.

¹² Ko le tagata avelogo leia na ano o afa mai Mikea na pati loa kiate ia o feneeki : Ko leinei, kua tonu tasi fuli le kau polofeta o kikite se nea malie ki le sau ; koia ke tatau ai lau masau mo latou fuli ! fakasa se nea malie !

¹³ Na tali loa Mikea : E mauli le Eteleno, e kau fakasa loa le nea leia e fakasa mai loa e loku Atua kiate au.

¹⁴ I le kaku loa a Mikea ki le sau, na pati loa le sau kiate ia : Mikea, pe tonu ke tou ano o taui Lamoti i Kalaate, pe tonu ke kau fakafiti ki ai ? Na tali loa a ia : Kotou pale ! E kotou manuia loa, ti e tuku atu loa latou ki okoutou lima.

¹⁵ Kae na pati loa le sau kiate ia : E tonu ke tua fia loa laku kolekole atu kiate koe ke ke fakasa mai le maoki mei le Eteleno ?

¹⁶ Na tali loa Mikea : E kau tio ki Iselaele katoa e mavetevete i mauga, ofaipe ni ovi ala e leaise maua ia se tagata tausi ovi ; ti na pati loa le Eteleno : Ko le kakai lena, e leaise lotou maua ia se pule, ke lotou tasi toe liliu i le tokamalie ki lona fale !

¹⁷ Na pati loa le sau o Iselaele kia Sosafate : Pe na leaise kau pati atu kiate koe ? E leaise kikite e ia se nea malie kiate au, e kikite ata e ia le veli.

¹⁸ Ti na pati loa Mikea : Koia ke tou fakalogo ai ki le folafola a le Eteleno ! Na kau tio ki le Eteleno e eke i lona ekeekeaga fakasau, ti ko le solia katoa o le lagi e tutuu i lona fetuu atamai mo lona fetuu sema.

¹⁹ Ti na pati loa le Eteleno : Ko ai loa ka fakasalai ia Akapo, sau o Iselaele, o tupu ke pale a ia ki Lamoti i Kalaate, ti ke mate a ia i ai ? Ti na lotou tali loa o feneeki le tasi, ti felaaki le tasi.

²⁰ Ti na au loa se laumalie ki mua o le Eteleno, o pati : Ko au, e kau fakasalai loa a ia.

²¹ Na pati loa le Eteleno kiate ia : ki lea ? Na tali loa a ia : E kau ano loa ti e kau liliu loa ko se laumalie loi i gutu o lana kau polofeta katoa. Na pati loa le Eteleno : E ke fakasalai loa a ia, ti e ke malo loa ; ano ti ke fai fenaaki.

²² Ti ko leinei, kua tuku e le Eteleno se laumalie loi ki gutu o lau kau polofeta ala e nonofo i leinei. Ti kua fakasa e le Eteleno se nea veli kiate koe.

²³ Ti na fakafeofi ake loa kiate ia Setesiasi, vosa o Kenaana, o paai le kalaafau o Mikea, o pati kiate ia : Ko le ala fea leia na ulu atu ai le laumalie o le Eteleno iate au, o masau kiate koe ?

²⁴ Na tali loa Mikea : E ke tio loa kiate ia i le aso leia e ke ulu ai loa o mumuni i le kogafale fakaoki o lou fale.

²⁵ Na pati loa le sau o Iselaele : Kotou ave le tagata lena kia Amone, pule o le kolo, ti mo Soasi, vosa o le sau.

²⁶ E kotou pati loa : Ko leinei le masau a le sau : Kolua tuku le tagata leinei ki le pilisoni, ti kolua fagai a ia ki le pane mo le vai o le mamae, o kaku ki laku toe liliu mai i le tokamalie.

²⁷ Ti na pati loa Mikea : Kapau e ke toe liliu mauli mai loa i le tokamalie, ti na leaise masau le Eteleno iate au. Na toe pati loa a ia : Koutou fuli, ei kakai, kua kotou logo !

Lava mo le mate o Akapo

²⁸ Ti na pale loa le sau o Iselaele mo Sosafate, sau o Suta, ki Lamoti i Kalaate.

²⁹ Na pati loa le sau o Iselaele kia Sosafate : E kau loto ke kau teu fakapulipuli ki le tau, kae ko koe, ke ke tui ou teu fakasau. Ti na teu fakapulipuli loa le sau o Iselaele, o ano ki le tau.

³⁰ Na tuku loa e le sau o Silia le fakatotonu leinei ki pule o ana saliote : Ke aua na kotou taui loa se tasi e ikiiki pe ko se tasi e lasi, kae ke kotou taui fai le sau o Iselaele.

³¹ I le tio loa a pule o saliote kia Sosafate, na lotou pati loa : Ko le sau a ia o Iselaele ! Ti na lotou takatakai loa a ia ke taui. Na fai loa e Sosafate se kalaga, ti na tokoi loa le Eteleno kiate ia, ti na fakamamao loa latou e le Atua meiate ia.

³² I le tio loa a pule o saliote e leaise ko le sau o Iselaele, na lotou fakamamao loa meiate ia.

³³ Ti na kaloloi fakafuanoa loa e se tagata lana gasau, ti na tau loa le gasau ki le sau o Iselaele i le sokoga o lona teu tau. Na pati loa le sau ki leia na taki ia lana saliote : Maliu, o tupu ke ke ave kese au mei le tau, talie kua kau lavea.

³⁴ Na liliu loa le tau o makeke ai i le aso lena. Ti pikiia loa le sau o Iselaele i loto o lana saliote, i mua o le kau Silia, o kaku ki le afiafi, ti na mate loa a ia i le vilo o le laa.