Lua tosi o Koloniko 17 - Tosi Tapu

Sosafate, sau o Suta

¹ Na sau loa Sosafate, lona vosa, o fetogi a ia.

² Na fakamakeke loa a ia ki Iselaele : na tuku loa e ia ni fa solia ki kolo tau fuli o Suta, mo ni solia leo i le fenua o Suta mo kolo o Efalaimi ala na too e Asa, lona tamana.

Saele a Sosafate i ala o Tavite

³ Na nofo loa le Eteleno mo Sosafate, talie na saele loa a ia i uluaki ala o Tavite, lona tamana, ti na leaise afa fua e ia a Paale ;

⁴ talie na afa loa e ia le Atua o lona tamana, ti na muli loa a ia ki ana fakatotonu, ti na leaise faifaitaki loa a ia ki nea ala na fai e Iselaele.

⁵ Na fakamakeke loa e le Eteleno le puleaga i lima o Sosafate, ti na fai loa e Suta katoa ni nea alofa kiate ia, koia na maua ai loa e Sosafate ni koloa mo se kololia o lasi ai.

⁶ Na tupu loa o lasi lona loto i ala o le Eteleno, ti na toe fakapuli foki e ia i Suta a fakatata mo ganea taualuga.

⁷ I le fetuu tolu o lana sau, na kakau loa e ia ni iki i ana tagata lalasi, ko Pene-Aile, mo Apetiasi, mo Sakalia, mo Netaneele mo Mikea, ke ano o ako le kakai i kolo o Suta.

⁸ Na kakau loa e ia mo latou ni kau Levi, ko Semaesa, mo Netania, mo Sepatesa, mo Asaele, mo Semilamote, mo Sonatane, mo Atonisa, mo Topisa, mo Tope-Atonisa, ti mo ni tagata faisakilifisio ko Elisama mo Solame.

⁹ Na lotou ako loa ki le kakai o Suta le tosi o le lao a le Eteleno. Na lotou ano loa i kolo fuli o Suta, ti na lotou ako loa le kakai.

¹⁰ Na vilo loa le i o le Eteleno ki puleaga fuli ala na takatakai ia a Suta, ti na leaise lotou fai loa se tau kia Sosafate.

¹¹ Na fai loa e ni kau Filisitini ni nea alofa kia Sosafate ti mo se tukusau ko se siliva ; ti na aumai foki e le kau Alape kiate ia ni kau manu, ko ovi tagata e fitu afe mo kau lelau e fitu, mo koti tagata e fitu afe mo kau lelau e fitu.

¹² Na malaga loa Sosafate o lasi ai. Na laga loa e ia i Suta ni kolo tau ti mo ni kolo ke tanaki ai a koloa.

¹³ Na fai loa e ia ni gaoi mauke i kolo o Suta, ti na maua loa e ia i Selusalemi se kau solia o ni tagata toa.

¹⁴ Ko leinei lolatou lau o mulimuli ki fale o olatou tamana : Ko Atena, le pule, mo tagata toa e tino lelau afe e tolu ;

¹⁵ i ona tafa, ko Sokanane, le pule, mo tagata toa e tino lelau lua mo le tino valu afe ;

¹⁶ i ona tafa, ko Amasia, vosa o Sikeli, leia na fakatapui e ia a ia ki le Eteleno i lona loto faitalisa, mo ni tagata toa e tino lelau lua afe.

¹⁷ Mei Pesamino : ko Eliata, tagata toa, mo tagata toa e tino lelau lua afe ala na too ia le gasau mo le paletau,

¹⁸ i ona tafa, ko Sosapate, mo tagata toa e tino lelau mo le tino valu afe.

¹⁹ Ko latou ana na tausi ki le sau i Selusalemi, kae na leaise lau latou ala na fakanofo e le sau i kolo tau fuli o Suta.