Lua tosi o Koloniko 16 - Tosi Tapu

Sai a Asa mo Silia ; valoki a le polofeta ko Anani

¹ I le fetuu kau tolu tupu ono o le sau a Asa, na au loa Paesa, sau o Iselaele, ke taui a Suta ; ti na fakamakeke loa e ia le kolo ko Lama, o tupu ke aua na toe ulu ki fafo pe ulu ki loto le kakai o Asa, sau o Suta.

² Na too loa e Asa se siliva mo se aulo mei koloa o le fale o le Eteleno mo le fale o le sau, ti na kakau loa e ia ni tagata avelogo kia Pene-Atate, sau o Silia, leia na nofo i Tamaso.

³ Na pati feneeki loa a ia : Ke i ai se sai iate au mo koe, ofaipe le sai i loku tamana mo lou tamana. Ko leinei e fakamomoli atu kiate koe se siliva mo se aulo. Ano o motusi le sai leia na ke fai mo Paesa, sau o Iselaele, o tupu ke fakamamao a ia meiate au.

⁴ Na tali loa Pene-Atate le kole a le sau ko Asa ; na kakau loa e ia a pule o lana solia ke ano o taui a kolo o Iselaele, ti na lotou taai loa Isone, mo Tane, mo Apele-Maime, ti mo kolo fuli ala na tanaki ai a koloa o Nefetali.

⁵ I le logo loa a Paesa ki le nea lena, na tuku loa e ia le toe laga o Lama ti na taofi loa e ia ana gaoi.

⁶ Ti na ano loa le sau ko Asa mo Suta katoa, o fetuku le laakau mo le fatu, ala na fakaaoga e Paesa ki le laga o Lama, ke laga ai a Kepa mo Misipa.

⁷ I le temi lena, na ano loa Anani, le polofeta kia Asa, sau o Suta, o pati kiate ia : O tupu na ke fanaki ki le sau o Silia, kae na leaise ke fanaki ki le Eteleno, lou Atua, koia kua sola ai le solia a le sau o Silia mei ou lima.

⁸ Pe na leaise maua e le kau Etiopia mo le kau Lipia se solia makeke ? Pe na leaise lotou maua ni saliote tau mo ni tagata ekeosi mauke ai ? Kae logo ai a nea fuli ana, na tuku latou e le Eteleno ki ou lima, talie na ke fanaki kiate ia.

⁹ Talie e taka a mata o le Eteleno i le malama nei katoa, o tupu ke tokoi kia latou ala e tuku katoa olatou loto kiate ia. I le nea lena, kua ke fai pe se vale, koia i le temi nei e ke maua ia loa ni tau.

Masaki mo le mate o Asa

¹⁰ Na ita veli loa Asa ki le polofeta, ti na tuku loa e ia a ia ki le pilisoni, o tupu ko lona vesia ki folafola ana. Ti na fakavelivelii loa e Asa i le temi lena ni iki o le kakai.

¹¹ Kua tosi a gaoi a Asa, mei le kamataaga o kaku ki le fakaoki, i le tosi fakamatala ki sau o Suta mo Iselaele.

¹² I le fetuu kau tolu tupu iva o lana sau, na maua loa e Asa se masaki veli i ona vae, ti na mamae lasi ai a ia ; i le lolotoga foki o lona masaki, na leaise afa loa e ia le Eteleno, kae na ano a ia ki toketa.

¹³ Na moe loa Asa mo ona tamana, ti na mate loa a ia i le kau fa tupu tasi fetuu o lana sau ;

¹⁴ ti na tanu loa a ia i le tanuma leia na kenu e ia mo ona i le kolo o Tavite. Na fakamoe loa a ia ki se palepale leia na fakaapele ki ni nea fakamanogi mo ni kaloni kesekese na teuteui o mulimuli ki le poto o le tagata fai kaloni, ti na tutu loa kiate ia ni nea fakamanogi o lasi ai.