Lua tosi o Koloniko 15 - Tosi Tapu

Valoki a le polofeta ko Asalia kia Asa

¹ Na ifo loa le Laumalie o le Atua kia Asalia, vosa o Opeto,

² ti na ano loa Asalia ki mua o Asa, o pati kiate ia : Kotou fakalogo mai, ei Asa, mo Suta, ti mo Pesamino katoa ! E nofo le Eteleno mo koutou mo ka e kotou nofo mo ia ; kapau e kotou afa a ia, e kotou maua loa a ia ; kae kapau e kotou tiaki a ia, e tiaki loa e ia koutou.

³ Kua fualoa ai le nofo a Iselaele o mamao mo le Atua maoki, ti na leaise tagata faisakilifisio ke ako ia latou, ti na leaise lao.

⁴ Kae i le temi o lolatou mamae na lotou toe liliu ki le Eteleno, le Atua o Iselaele, ti na lotou afa a ia, ti na lotou maua a ia.

⁵ I temi ana, na leaise maua se fimalie e leia e ulu ki fafo mo leia e ulu ki loto, talie na i ai ni maveuveu lalasi i le kakai o le fenua ;

⁶ na fetauaki a kakai, mo kolo, talie na fakamamae latou e le Atua ki ni malaia kesekese.

⁷ Koia ke kotou fakamakeke, ti ke aua na kotou tuku ke gaegae okoutou lima, talie e i ai loa se totogi ki akoutou gaoi.

Fakamea o Suta e Asa i taulaatua

⁸ I le logo a le sau ki folafola ana, ti mo le folafola fakakikite a Oteto, le polofeta, na fakamakeke loa Asa, ti na fakapuli loa e ia a taulaatua fuli i le fenua katoa o Suta mo Pesamino ti mo kolo ala na too e ia i le mauga o Efalaimi, ti na fakafoou loa e ia le aletale o le Eteleno leia na tuu i mua o le fale o le Eteleno.

⁹ Na fakatasii loa e Asa a Suta katoa mo Pesamino, ti mo latou o Efalaimi, mo Manase, ti mo Simeone ala na nonofo mo latou, talie na au se kakai toka api o Iselaele kiate ia, i lalatou tio kua nofo mo ia le Eteleno, lona Atua.

¹⁰ Na lotou fakatasi mai loa ki Selusalemi i le tolu o masina o le kau agafulu tupu lima fetuu o le sau o Asa.

¹¹ I le aso lena na lotou momoli loa ki le Eteleno ni pipi e kau lelau fitu mo ni ovi e fitu afe.

¹² Na lotou fakapapau loa ke lotou afa le Eteleno, le Atua o olatou tamana, i lolatou loto katoa mo lolatou laumalie katoa ;

¹³ ti ko leia e leaise afa ia loa le Eteleno, le Atua o Iselaele, e tonu loa ke tamate a ia, pe ikiiki pe lasi, pe tagata pe fafine.

¹⁴ Na lotou fakapapau leo lasi loa ki le Eteleno, mo ni kalaga fakafiafia, mo ni pupusi o ni fakatagi pupusi mo ni talai manu, ke lotou agatonu loa ki le Eteleno ;

¹⁵ ti na fiafia loa Suta katoa i le fakapapau lena, talie na lotou fakapapau i lolatou loto katoa, ti na lotou afa le Eteleno i lolatou loto malie, ti kua lotou maua a ia, ti kua soli e le Eteleno kia latou se malolo mei potu fuli.

¹⁶ Na too foki e le sau ko Asa mei lona tinana ko Maaka, lona tuulaga fafine sau, o tupu na fai e ia se fakatata o Asetalate. Na maumaui loa e Asa lona taulaatua o momoliki ti na fakatotonu loa e ia ke tutu a ia i le liua o Setolone.

¹⁷ Kae na leaise puli loa a ganea taualuga i Iselaele, logo ai na pipiki katoa le loto o Asa ki le Eteleno i lona mauli katoa.

¹⁸ Na tuku loa e ia ki le fale o le Atua a nea ala na fakatapui e lona tamana mo ia totonu, le siliva, mo le aulo, ti mo ipu.

¹⁹ Na leaise toe soko loa se tau o kaku ki le fetuu kau tolu tupu lima o le sau o Asa.