Lua tosi o Koloniko 14 - Tosi Tapu

Asa, sau o Suta ; malo ia Selake, le Etiopia

¹ Na fai loa e Asa le nea leia e malie mo totonu i mua o le Eteleno, lona Atua.

² Na fakapuli loa e ia a aletale pagani mo ganea taualuga, ti na maumaui loa e ia a fakatata, ti na sele loa e ia a vao tapu.

³ Na fakatotonu loa e ia ki Suta ke afa le Eteleno, le Atua o ona tamana, ti ke fai le lao mo ana fakatotonu.

⁴ Na fakapuli loa e ia i kolo fuli o Suta a ganea taualuga mo fakatata na fakatapui ki le laa. Ti na malolo loa le puleaga i ona mua.

⁵ Na laga loa e ia ni kolo tau i Suta ; talie na tokamalie le fenua ti na leaise fai se tau kiate ia i le lolotoga o fetuu ana, talie na soli loa e le Eteleno kiate ia se malolo.

⁶ Na pati loa a ia kia Suta : Tou fakatuu a kolo anei ti tou takatakai latou ki ni paa, mo ni tule leo, mo ni matapa, ti mo ni ukamea fakamaumau. Koi tuu foki le fenua i otatou mua, talie na tou aga o afa le Eteleno, lotatou Atua, io, na tou afa a ia, ti na soli mai e ia kia tatou le malolo mei potu fuli. Koia na lotou laga loa ti na lotou manuia loa.

⁷ Na maua e Asa se solia ko ni tagata e tino lelau afe e tolu o Suta, na too ia le paletau mo le tao, ti mo ni tagata e tino lelau lua mo le tino valu afe o Pesamino, na too ia le paletau mo le gasau, ko kau tagata toa fuli.

⁸ Na saele loa Selake, le Etiopia, mo se solia ko ni tagata e miliona mo ni saliote e kau lelau tolu, ke taui a Asa, ti na kaku loa a ia ki Malesa.

⁹ Na saele loa a Asa ki ona mua, ti na lotou fakatuutuu tau loa i le vaivailiua o Sefata, ofi ki Malesa.

¹⁰ Na tagi loa Asa ki le Eteleno, lona Atua, o pati : Eteleno, ko koe toka tasi e mafai ke au o tokoi ki leia e gaegae mo leia e makeke : au o tokoi mai kia matou, Eteleno, lomatou Atua ! talie ko koe leia e motou fanaki ki ai, ti na motou au i lou suafa o taui le kakai api leinei. Eteleno, ko koe ko lomatou Atua : ke aua na malo le tagata iate koe !

¹¹ Na taai loa e le Eteleno le kau Etiopia i mua o Asa mo Suta, ti na sosola loa le kau Etiopia.

¹² Na tuli loa latou e Asa mo le kakai leia na nofo mo ia o kaku ki Kela, ti na mamate loa le kau Etiopia i le ala, o leaise toe sao fua se tasi, talie na maumaui latou e le Eteleno mo lana kau tau. Na maua loa e Asa mo lona kakai se koloa lasi i le tau lena ;

¹³ na lotou taai loa a kolo fuli i tafatafa o Kela, talie na vilo loa kia latou le i ki le Eteleno. Ti na tae loa e le kakai o Suta a koloa o kolo fuli ana, leia na kese ai lona lasi.

¹⁴ Na lotou maumaui foki a nofoaga o kau manu, ti na lotou ave loa ni kau ovi mo ni kau kamelo mauke ai. Ti na lotou toe liliu loa ki Selusalemi.