Lua tosi o Koloniko 13 - Tosi Tapu

Apisa, sau o Suta ; malo i Iselaele

¹ I le kau agafulu tupu valu fetuu o le sau o Selopoamo, na sau loa Apisa i Suta.

² Na sau loa a ia i fetuu e tolu i Selusalemi. Na igoa lona tinana ko Mikasa, taine o Uliele mei Kipea. Na fetauaki loa Apisa mo Selopoamo.

³ Na kamata loa e Apisa le tau mo se solia o ni kau tagata makeke ko tino lelau e fa ; ti na fakatalitali loa a ia e Selopoamo ki se kau tau makeke ko ni tagata toa e tino lelau afe e valu.

⁴ Na tuu loa Apisa mei aluga o le mauga ko Tesemalaimi, leia na kau ki le mauga o Efalaimi, o pati : Kotou fakalogo mai kiate au, Selopoamo, ti mo Iselaele katoa !

⁵ Pe na leaise tonu ke kotou iloa kua soli e le Eteleno, le Atua o Iselaele, le puleaga o Iselaele kia Tavite o lee gato, kiate ia mo ona vosa, i se sai o le patai ?

⁶ Kae kua malaga ake loa Selopoamo, vosa o Nepate, tagata fakasausau a Salomone, vosa o Tavite, o agatuu ki lona pule.

⁷ Ti kua tanaki mai kiate ia ni tagata noa mo agaveveli, ti kua lotou makeke loa ia Lopoamo, vosa o Salomone ; talie na koi muli fua Lopoamo mo loto gaegae, koia na leaise mafai ai e ia ke tuu kia latou.

⁸ Ti ko leinei kua kotou masalo e kotou malo loa i le puleaga o le Eteleno, leia e tuku i lima o vosa o Tavite ; ti ko se kakai api koutou, ti e kotou maua a uviki pipi aulo ala na fai e Selopoamo ke kotou atua ki ai.

⁹ Pe na leaise kotou kapu ia a kau tagata faisakilifisio a le Eteleno, vosa o Alone, ti mo le kau Levi ? Pe na leaise kotou fakanofo ni tagata faisakilifisio kia koutou, ofaipe le kakai o la ake fenua ? Ka natu se tasi mo se uviki pipi tagata ti mo ni ovi e fitu, ke fakanofo a ia ko se tagata faisakilifisio, ti kotou fakanofo a ia ko se tagata faisakilifisio ki okoutou atua loi.

¹⁰ Kae kia matou, ko le Eteleno ko lomatou Atua, ti na leaise motou tiaki a ia, ti ko vosa o Alone ko tagata faisakilifisio ala e tausi ki le Eteleno, ti e fai e le kau Levi alatou gaoi.

¹¹ E motou momoli i usu fuli mo afiafi fuli a failaulau ki le Eteleno, e motou tutu le kaloni fakamanogi, e motou teki a pane taputapu ki le laupapa mea, ti e motou tutu i afiafi fuli le tekiaga malama aulo mo ona malama ; talie e motou tausi a fakatotonu a le Eteleno, lomatou Atua. Ti ko koutou, kua kotou tiaki a ia.

¹² Ko leinei, e nofo le Atua mo ana tagata faisakilifisio mo matou, e lotou takitaki matou, ti e motou maua a fakatagi pupusi ke pupusi o fakafesagai kia koutou. Fanau o Iselaele, aua na kotou tau ki le Eteleno, le Atua o okoutou tamana, talie e leaise kotou malo loa.

¹³ Kae na fakatuu loa e Selopoamo se potu o lana solia ke mumuni o au mei muli : koia na tutuu ai loa a ia mo ana kau solia i mua o Suta, leia na maua ia loa se solia mei ona muli.

¹⁴ Na tio loa Suta kua tonu ke tau i mua mo muli. Ti na lotou kalaga loa ki le Eteleno, ti na pupusi loa e le kau tagata faisakilifisio a fakatagi pupusi.

¹⁵ Ti na fakamapa loa e tagata o Suta se kalaga tau, ti na soko loa i le kalaga tau a tagata o Suta, na taai loa e le Eteleno a Selopoamo mo Iselaele katoa i mua o Apisa mo Suta.

¹⁶ Na sosola loa a fanau a Iselaele i mua o Suta, ti na tuku loa latou e le Atua ki ona lima.

¹⁷ Na taai loa latou e Apisa mo lona kakai ki se tamate lasi, o matea ai loa ni kau tagata tau o Iselaele e tino lelau afe lima.

¹⁸ Na gaegae loa a fanau a Iselaele i le temi lena, kae na malo loa a fanau a Suta, talie na lotou fanaki ki le Eteleno, le Atua o olatou tamana.

¹⁹ Na tuli loa e Apisa a Selopoamo ti na too loa e ia iate ia ni kolo, ko Petele mo ona kolo, mo Efelone mo ona kolo, ti mo Sekana mo ona kolo.

²⁰ Na leaise toe maua loa e Selopoamo se makeke i le temi o Apisa ; ti na taai loa a ia e le Eteleno, o mate ai loa a ia.

²¹ Kae na liliu loa Apisa o makeke ; na maua loa e ia ni avaga e tino agafulu tupu fa, ti na tupu loa kiate ia ni vosa e tino lua tupu lua mo ni taineliki e tino agafulu tupu ono.

²² Ko le toe o gaoi a Apisa, a nea ala na fai e ia mo nea ala na pati a ia ki ai, pe leaise tosi a ia i le tosi fakamatala a le polofeta ko Ito.

²³ Na mate loa Apisa ti na tanu loa a ia i le kolo o Tavite. Ti na sau loa Asa, lona vosa, o fetogi a ia. I lona temi, na fimalie loa le fenua i fetuu e kau agafulu.