Lua tosi o Koloniko 12 - Tosi Tapu

Tausi taulaatua o Lopoamo ; taui o Suta e le sau o Esipito

¹ I le temi na makeke ai Lopoamo i lona puleaga ti na makeke ai lona puleaga, na tiaki loa e ia le lao a le Eteleno, ti na tiaki loa e Iselaele katoa le lao a le Eteleno o mulimuli kiate ia.

² I le lima o fetuu o le sau ko Lopoamo, na au loa a Sisake, sau o Esipito, o taui Selusalemi, talie na lotou agasala ki le Eteleno.

³ Na pale mai loa le sau o Esipito mo se solia ko tagata e tino ono afe mo ni saliote e kau lelau lua afe ; na au loa a ia mei Esipito mo se kakai leia na leaise mafai ke lau, ko le kau Lipia, mo le kau Suki, ti mo le kau Etiopia.

⁴ Na too loa e ia a kolo tau o Suta ti na pale loa a ia o kaku ki Selusalemi.

⁵ Na ano loa Semaesa, le polofeta, kia Lopoamo mo pule o Suta ala na sosola ki Selusalemi i le fakafeofi mai a Sisake, ti na pati loa Semaesa kia latou : Ko leinei le folafola a le Eteleno : Kua koutou tiaki au ; koia kua kau tiaki ai koutou, ti kua kau tuku ai koutou ki lima o Sisake.

⁶ Na fakasemala loa le kau pule o Iselaele mo le sau, o pati : E faitotonu le Eteleno !

⁷ I le tio loa a le Eteleno kua lotou fakasemala, na tuku loa le folafola a le Eteleno kia Semaesa, o pati : Kua lotou fakasemala, koia e leaise kau maumaui ai loa latou, ti e leaise tuvai loa laku saofaki latou, ti e leaise vilo loa loku sausau ki Selusalemi i le lima o Sisake ;

⁸ Kae e lotou popula loa kia Sisake, ti e lotou iloa loa le kesekese o le tausi kiate au mo le tausi ki puleaga o la ake fenua.

⁹ Na pale loa Sisake, sau o Esipito, o taui Selusalemi. Na too loa e ia a koloa o le fale o le Eteleno, mo koloa o le fale o le sau, na too loa e ia a nea fuli. Na too loa e ia a paletau aulo ala na fai e Salomone.

¹⁰ Na fai loa e le sau ko Lopoamo ni paletau sila o fetogi ai latou, ti na tuku loa e ia latou ke taupau e ni pule o le kau leo, ala na leo i le uluaga o le fale o le sau.

¹¹ I temi fuli ala na ano ai le sau ki le fale o le Eteleno, na au le kau leo matapa o ave a paletau sila, ti ka oki ti na lotou toe ave latou ki lolatou tukuaga.

¹² O tupu na fakasemala Lopoamo, na taofi loa e le Eteleno lona ita, ti na leaise maumaui katoa loa e ia a ia. Ti na i ai foki ni nea malilie i Suta.

¹³ Na toe fakamakeke loa le sau ko Lopoamo i Selusalemi ti na toe liliu loa a ia ko le sau, ti na sau loa a ia i fetuu e kau fa tupu fitu i Selusalemi, le kolo leia na filifili e le Eteleno i faasiga fuli o Iselaele ke agai ai lona suafa. Na igoa lona tinana ko Naama, fafine Amone.

¹⁴ Na fai loa e ia le nea e veli, talie na leaise afa loa e ia le Eteleno i lona loto katoa.

¹⁵ Ko gaoi a Lopoamo, a uluaki mo fakamuli, pe leaise tosi latou i tosi a Semaesa, le polofeta, ti mo tosi a le polofeta ko Ito, i tosi sologa. Na tau tuumau loa Lopoamo mo Selopoamo.

¹⁶ Na mate loa Lopoamo ti na tanu loa a ia i le kolo o Tavite. Ti na sau loa Apisa, lona vosa, o fetogi a ia.