Lua tosi o Koloniko 11 - Tosi Tapu

Sau o Lopoamo

¹ I le kaku loa a Lopoamo ki Selusalemi, na fakatasii loa e ia le fale o Suta mo Pesamino, ko tagata e tino lelau tino valu afe, ke lotou taui Iselaele ke toe liliu mai o fakalogo kia Lopoamo.

² Kae na tuku loa le folafola a le Eteleno kia Semaesa, tagata a le Atua, o pati :

³ Masau kia Lopoamo, vosa o Salomone, sau o Suta ti mo Iselaele katoa i Suta mo Pesamino. Ti ke pati loa kia latou :

⁴ Ko leinei le folafola a le Eteleno : Aua na kotou pale ti aua na kotou taui okoutou fetaina ! Ke kotou tasi toe liliu ki lona fale, talie ko au leia na tupu mei ai le nea lena. Na lotou fakalogo loa ki folafola a le Eteleno, ti na lotou toe liliu loa ki lona fale, o lotou fakafiti ki le ano o taui Selopoamo.

⁵ Na nofo loa Lopoamo i Selusalemi, ti na laga loa e ia ni kolo tau i Suta.

⁶ Na laga loa e ia Peteleemi, mo Etami, mo Tekoa,

⁷ mo Pete-Tesuli, mo Soko, mo Atulami,

⁸ mo Kate, mo Malesa, mo Sife,

⁹ mo Atolaimi, mo Lakisi, mo Aseka,

¹⁰ mo Tesolea, mo Asaloni, mo Epelone, ala na tuu i Suta mo Pesamino, ti na fakaliliu loa e ia latou ko ni kolo tau.

¹¹ Na fakamakeke loa e ia latou, ti na fakanofo loa e ia i ai ni kovana, ti na fakatuu loa e ia i ai ni fale koloa ke tanaki ai a magiti, mo lolo, ti mo vino.

¹² Na tuku loa e ia i kolo taki tasi ana ni paletau mo ni tao, ti na fakaliliu loa e ia latou ke makeke ai. Na maua e ia a Suta mo Pesamino.

¹³ Ko le kau tagata faisakilifisio mo le kau Levi ala na nonofo i Iselaele katoa na tuku ia loa olatou fale kae lotou ano loa kiate ia.

¹⁴ Talie na tiaki loa e le kau Levi olatou kolo mo olatou kele kae lotou au loa ki Suta mo Selusalemi, talie na tapui kia latou e Selopoamo mo ona vosa le fai o lalatou gaoi fakapelepitelo.

¹⁵ Na fakanofo loa e Selopoamo ni tagata faisakilifisio ki ganea taualuga, ki koti tagata mo pipi muli ala na lotou fai.

¹⁶ Ko latou ala o faasiga fuli o Iselaele na afa ia le Eteleno, le Atua o Iselaele, na muli loa i le kau Levi ki Selusalemi ke lotou momoli ai ni sakilifisio ki le Eteleno, le Atua o olatou tamana.

¹⁷ Na lotou fakamakeke loa i ai le puleaga o Suta mo le pule a Lopoamo, vosa o Salomone, i le lolotoga o fetuu e tolu ; talie na lotou saele loa i fetuu e tolu i le ala o Tavite mo Salomone.

Famili o Lopoamo

¹⁸ Na avaga loa Lopoamo mo Maalate, taine o Selimote, vosa o Tavite mo Apikaile, taine o Eliape, vosa o Isaia.

¹⁹ Na fanaui loa e Maalate kiate ia ni vosa : ko Seuse, mo Semalia, ti mo Saame.

²⁰ Na toe avaga loa Lopoamo mo Maaka, taine o Apesalone, ti na fanaui loa e ia kiate ia a Apisa, mo Atai, mo Sisa, ti mo Selomite.

²¹ Na alofa loa Lopoamo kia Maaka, taine o Apesalone, o lasi ake i ana avaga fuli mo ana tinifu ; talie na maua loa e ia ni avaga e tino agafulu tupu valu mo ni fafine tinifu e tino ono, ti na tupu loa kiate ia ni vosa e tino lua tupu valu mo ni taineliki e tino ono.

²² Na tuku loa e Lopoamo le tuulaga o le vosa uluaki kia Apisa, tama o Maaka, ti na fakanofo loa e ia a ia ke pule ki ona fetaina, talie na loto a ia ke sau.

²³ Na fai fakapotopoto loa a ia, o fakamavetevete ona vosa fuli i le fenua katoa o Suta mo Pesamino, mo kolo tau fuli, ti na soli loa e ia kia latou ni magiti o lasi ai, ti na afa loa e ia kia latou ni avaga mauke ai.