Lua tosi o Koloniko 10 - Tosi Tapu

Vae lua o le puleaga : Lopoamo, sau o Suta ; Selopoamo, sau o Iselaele

¹ Na ano loa Lopoamo ki Siseme, talie na au Iselaele katoa ki Siseme ke fakanofo a ia ke sau.

² I le logo loa a Selopoamo, vosa o Nepate ki nea ana, na nofo a ia i Esipito, leia na sola a ia ki ai ke mamao mei le sau ko Salomone, ti na toe liliu mai loa a ia mei Esipito.

³ Na kakau loa ke afa mai a ia. Ti na au loa Selopoamo mo Iselaele katoa kia Lopoamo, o masau feneeki kiate ia :

⁴ Na fakamamafa e lou tamana lamatou amoga ; ko leinei, ke ke fakamaamaa lamatou amoga, ti e motou fakasausau loa kiate koe.

⁵ Na pati loa Lopoamo kia latou : Kotou ano ti kotou toe liliu mai mo ka oki aso e tolu. Ti na ano loa le kakai.

⁶ Ti na fakakaukau loa le sau ko Lopoamo mo le kau matua leia na gaoi mo lona tamana ko Salomone i lona mauli, ti na pati loa a ia kia latou : Kolea le tokoi e kotou fai mai kiate au ke tuku ki le kakai leinei ?

⁷ Ti na lotou tali loa : Kapau e ke alofa ki le kakai leinei, kapau e ke tali malie latou, ti kapau e ke masau malie kia latou, e lotou fakasausau loa kiate koe o lee gato.

⁸ Kae na leaise fakalogo loa a Lopoamo ki le tokoi a le kau matua, kae na afa tokoi loa a ia ki le kau tupulaga leia na lalasi fakatasi ake mo ia ti na nonofo mo ia.

⁹ Na pati loa a ia kia latou : Kolea lakoutou tokoi ki le kakai leinei e masau feneeki mai kiate au : Ke ke fakamaamaa le amoga leia na teki mai e lou tamana kia matou ?

¹⁰ Ti na tali loa le kau tupulaga, o pati : E ke masau feneeki loa ki le kakai lena na masau fenaaki atu kiate koe : Na fakaliliu e lou tamana lamatou amoga ke mamafa, ti ko koe, ke ke fakamaamaa a ia kia matou ! E ke masau loa kia latou o feneeki : E fualasi ake loku ga maikao tusi i le koga loto o loku tamana.

¹¹ Ko leinei, na teki e loku tamana se amoga mamafa kia koutou, ti ko au, e kau fakaliliu loa a ia ke toe mamafa ake ; na ta koutou e loku tamana ki le suipi, kae ko au, e kau ta loa koutou ki le laakau talatala.

¹² Na au loa Selopoamo mo le kakai katoa kia Lopoamo i le oki o aso e tolu, o mulimuli ki le pati a le sau : Kotou toe liliu mai kiate au mo ka oki aso e tolu.

¹³ Na tali fakamakeke loa le sau kia latou. Na tiaki loa e le sau ko Lopoamo le tokoi a le kau matua,

¹⁴ kae na masau loa a ia kia latou o mulimuli ki le tokoi a le kau tupulaga : Na teki e loku tamana kia koutou se amoga mamafa, ti ko au, e kau teki loa kia koutou se amoga leia e toe mamafa ake ; na ta koutou e loku tamana ki le suipi, ti ko au, e kau ta loa koutou ki le laakau talatala.

¹⁵ Koia na leaise fakalogo loa le sau ki le kakai ; talie na takitaki le nea lena e le Atua, ke fakasoko ai le folafola leia na fakasa e le Eteleno i le polofeta ko Akisa mei Silo, o uiga mo Selopoamo, vosa o Nepate.

¹⁶ I le tio loa a Iselaele katoa na leaise fakalogo le sau kia latou, na tali loa le kakai ki le sau : Kolea le nea koi motou pipiki ai mo Tavite ? E leaise nea fua koi motou fakatasi ai mo le vosa lena o Isaia ! Iselaele ! kotou tasi ano ki lona falela ! I le lakaga nei, ke ke tokaga la ki lou puleaga, vosa o Tavite ! Ti na tasi ano loa Iselaele katoa ki lona falela.

¹⁷ Na sau loa Lopoamo ki fanau a Iselaele ala na nonofo i Suta toka tasi.

¹⁸ Koia na kakau ai loa e le sau ko Lopoamo a Atolame, leia na tokaga ki tukusau, ki le kau Iselaele o le potu noleto. Kae na tuki fatui loa a ia e fanau a Iselaele o mate. Ti na sopo fakatavili loa le sau ko Lopoamo ki se saliote, o sola ki Selusalemi.

¹⁹ Na mavae loa Iselaele i ai mei le fale o Tavite o kaku mai ki le aso nei.