Lua tosi kia Timoteo 4 - Tosi Tapu

¹ Koia e kau fakatotonu atu ai kiate koe i mua o le Atua, ti mo mua o Sesu-Kilisito, leia e tonu ke fakamaaui ia le kau mauli mo le kau mate, ti e kau kole atu a ia i le igoa o lana toe liliu mai mo lona puleaga,

² ke ke fakasa le folafola : too a faigamalie fuli, pe malie pe veli ; valoki, mo fakatonutonu, mo ekenaki, i le kataki fualoa katoa ti mo le akonaki.

³ Talie e soko mai loa se temi leia e leaise koi kataki loa e tagata le akonaki totonu ; kae, i lalatou maua le mageo ke logo ki ni nea malilie, e lotou fakatupu loa ni kau fai akonaki toka api o fakatatau ki olatou oli.

⁴ Ti e lotou fakamaliu loa olatou taliga mei le maoki, ti e lotou mafuli loa ki fanaga.

⁵ Kae ko koe, fakapotopoto i nea fuli, kataki a mamae, fai le gaoi a se evaselisita, fai ke katoa malie lau gaoi.

Logoi e Paulo o lona mate ; ana fakatuutuu fakaoki

⁶ Talie kiate au, kua tatae le lakaga ke momoli ai au ofaipe se lipasio (sakilifisio vino), ti kua ofi fua le lakaga o loku mavae.

⁷ Na kau tau le tau malie, na kau makape o kaku ki le fakaoki, na kau taupau le tui.

⁸ Ko leinei, kua taofi mai kiate au le pala o le faitotonu ; ko le Aliki, le tui fakamaau faitotonu, e soli ia loa a ia kiate au i le aso lena, ti e leaise gato fua kiate au, kae kia latou fuli foki ala e alofa loa ki lona toe liliu mai.

⁹ Faiga ke ke au vave kiate au,

¹⁰ talie kua tiaki au e Temasi ; kua alofa a ia ki le malama nei, ti kua ano a ia ki Tesalonika ; ko Kelesenesio ki Kalatia, mo Tito ki Talamasia.

¹¹ Ko Luka toka tasi e nofo mo au. Too Maleko o au mo koe, talie e aoga a ia kiate au i le gaoi.

¹² Ti kua kau kakau Tisike ki Efeso.

¹³ Ka ke au loa, aumai le taupulupulu leia na kau tuku i Toloasi i le fale o Kalepusi, ti mo tosi, tafito a takaiga tosi.

¹⁴ Ko Alesatelo, le tagata gaoi ukamea, na fai nea veli lasi kiate au. E liufaki loa e le Aliki kiate ia o fakatatau ki ana gaoi.

¹⁵ Ke ke tokaga foki mo koe kiate ia, talie na fakafesagai makeke ai a ia ki amatou folafola.

¹⁶ I loku uluaki fakamaau, na leaise tuu se tasi mo au, kae na lotou tiaki fuli au. Alofa ke aua na lau a ia kia latou.

¹⁷ Kae ko le Aliki leia na tuu mo au ti na fakamakeke ia au, o tupu ke kau fakasa le akonaki katoa ti ke logo ki ai le kau pagani fuli. Ti na fakamauli au mei le gutu o le laione.

¹⁸ Ti e saofaki loa au e le Aliki mei gaoi veveli fuli, ti e fakamauli loa e ia au, o fakaulu ki lona puleaga i le lagi. Kiate ia le kololia i sekulo mo sekulo ! Amene !

¹⁹ Alofa atu kia Pelesila mo Akilasi, ti mo le famili o Onesifole.

²⁰ Na nofo Elaseto i Kolinito, ti na kau tuku Tolofime kua masaki i Mile.

²¹ Faiga ke ke au i mua o le temi momoko. E fakaalofa atu kiate koe Eupulusi, mo Putenesi, mo Linusi, mo Kolotia, ti mo fetaina fuli.

²² Ke nofo le Aliki mo lou laumalie ! Ke nofo le kalasia mo koutou !