Lua tosi kia Timoteo 3 - Tosi Tapu

Fakalialia o temi fakaoki

¹ Ke ke iloa, i aso fakaoki, e i ai loa ni temi faigataa.

² Talie e alofa loa a tagata kia latou fuai, o kaukau nea mo le paaga, mo fia sa, mo laukau, mo fatituu, mo patigataa ki matua, mo lee fakafetai, mo lee tausi lotu,

³ mo loto sala manavaalofa ki kaiga, mo lee taupau a fakapapau, mo fakatupu loi, mo oli veli, mo agamakeke, mo nukinuki ki le kakai malie,

⁴ mo fakapapau loi, mo loto oso, mo makita i le fia nealasi, mo alofa ki fiafia fakamalama o lasi ake i le Atua ;

⁵ e lotou maua a agaaga o le aga fakaatua, kae e lotou fakafiti ki le nea leia e fakatupu ia lona makeke. Ke ke fakamamao mei tagata ana.

⁶ E i ai ni iki ia latou e ului ia a fale, ti e lotou fakapopulai ni fafine valelea, mo mafaia i agasala, ti mo nofoi e olioli fakatino kesekese,

⁷ ti e lotou ako tuumau kae e leaise mafai fua ke lotou kaku ki le iloa o le maoki.

⁸ O tatau mo Sanese mo Sapelese ala na fakafesagai kia Moisese, e fakafesagai foki a tagata ana ki le maoki. Kua fakapouli olatou atamai, ti e leaise aoga lalatou tui.

⁹ Kae e leaise lotou tuputupua loa i le tui, talie e sa loa lolatou valea ki tagata fuli, ofai foki pe le valea o le sa tagata lena.

Fakamakeke o Timoteo

¹⁰ Kiate koe, na ke mulii totonu laku akonaki, mo le anoaga o loku mauli, mo aku fakatuutuu, mo laku tui, mo loku agamalu, mo loku alofa, mo loku kataki fualoa,

¹¹ mo oku fakavelivelii, ti mo oku mamae. Kua ke iloa a nea fuli ala na soko kiate au i Atiokia, mo Ikonia, mo Lisite, ti mo fakaveliveli ala na kau tali ia. Kae na saofaki au e le Aliki i nea fuli ana.

¹² Talie e fakavelivelii loa latou fuli ala e loto ke mauli i le aga fakaatua ia Sesu-Kilisito.

¹³ Kae ko tagata agaveli mo fakasala e asilisili veli loa mo asilisili sese loa, a latou totonu mo latou ala na lotou kakaai.

¹⁴ Kae ko koe, ke ke nofo mau i nea ala kua ke ako ia, ti kua ke iloa totonu e maoki, talie e ke iloa leia na ke ako mei ai :

¹⁵ Talie talu mei lou ikiiki, na ke iloa le Tosi tapu, leia e mafai ke fakapotoi ia a koe ki le saofaki i le tui kia Sesu-Kilisito.

¹⁶ E au le Tosi tapu katoa mei le tukumanava a le Atua, ti e aoga a ia ki le akonaki, mo le valoki, mo le fakatonutonu, mo le fakapotoi ki le maokioki,

¹⁷ o tupu ke katoa le tagata a le Atua, ti ke katoa lona teuteui ki gaoi malilie fuli.