Lua tosi kia Timoteo 2 - Tosi Tapu

Le tagata solia agatonu a Sesu-Kilisito

¹ Ko koe loa, ei laku fanau, fakamakeke a koe i le kalasia leia ia Sesu-Kilisito.

² Ti ko le nea leia na ke logo meiate au i mua o ni kau fakamaoki toka api, tuku a ia ki ni kau tagata agatonu, ala e mafai ia lona toe ako foki ki ni iki ake.

³ Mamae mo au, ofaipe se tagata solia malie a Sesu-Kilisito.

⁴ E leaise tagata solia leia e fakavisia ia a ia i nea o le mauli nei, mo kapau e loto a ia ke mata malie a ia ki leia na filifili ia a ia ki lana kau tau ;

⁵ ti e leaise fakapala le tagata fai manogi, mo kapau na leaise tau a ia o mulimuli ki lekula.

⁶ Ko le tagata gaoi kele leia e pakia e tonu ke uluaki tau ia a fua.

⁷ Ke ke matala ki le nea leia e kau pati ki ai, talie e soli atu loa e le Aliki kiate koe le atamai i nea fuli.

⁸ Ke ke manatu kia Sesu-Kilisito, ko le sakoga o Tavite, leia na toe tuuake mei le kau mate, o mulimuli ki laku Evaselio,

⁹ leia e kau mamae ai o kaku ki loku sai ofaipe se tagata agaveli. Kae e leaise sai le folafola a le Atua.

¹⁰ Koia e kau katakii ai a nea fuli o tupu ko le kau filifiliia, o tupu ke lotou maua foki le mauli leia ia Sesu-Kilisito, ti mo le kololia lee gato.

¹¹ E maoki le masau leinei : Kapau kua tou mate mo ia, e tou mauli loa mo ia ;

¹² kapau e tou kataki fualoa, e tou sau loa mo ia ; kapau e tou fakafiti kiate ia, e fakafiti loa a ia kia tatou ;

¹³ kapau e leaise tou agatonu, e agatonu a ia, talie e leaise mafai ke fakafiti a ia kiate ia totonu.

Tagata gaoi malie

¹⁴ Fakamanatu a nea ana, o fakatotonu kia latou i mua o le Atua, ke tiaki a fefele i kupu, ala e aoga fuai ki le maumaui o latou ala e fakalogologo.

¹⁵ Faiga ke ke tuu i mua o le Atua ofaipe se tagata kua fakamaoki, leia e leaise luma fua i lana gaoi, ti e vaevae totonu ia le folafola o le maoki.

¹⁶ Tiaki a masau vaiga mo fakamalama ; talie ko latou ala e fai ia a nea ana, e asilisili mamao loa mei le Atua,

¹⁷ ti e sosolo loa lalatou masau ofaipe se papala. Ia latou ana e kau ai Imeneo mo Filete,

¹⁸ ala kua sese mei le maoki, o pati kua sili le toe tuuake, ti kua la fulusi ia le tui a ni iki.

¹⁹ Kae e tuu mau aifuai le fakatafito makeke leia na teki e le Atua, ti mo folafola anei e fakamaoki ia a ia : E iloa e le Aliki latou ala a ana ; ti e mailoga leia e sua ia le suafa o le Aliki, ke mavae a ia mei le agaveli.

²⁰ Kae i se fale lasi, e leaise gato fai ki ni ipu aulo mo ni ipu siliva, kae e toe maua foki i ai ni ipu laakau mo ni ipu kele ; ko ni iki ko ni ipu mauiga, kae ko ni iki ko ni ipu masani.

²¹ Koia kapau e fakamea se tasi mei nea ana, e liliu loa a ia ko se ipu mauiga, mo maokioki, mo aoga ki lona pule, ti kua teuteu a ia ki gaoi malilie fuli.

²² Sola mei oli fakavale o le temi tupulaga, ti ke afa le maokioki, mo le tui, mo le alofa, mo le tokamalie mo latou ala e kalaga ki le Aliki i se loto mea.

²³ Tiaki a vesili fakavale mo lee aoga, o ke iloa e lotou fakatupu ia ni fefele.

²⁴ Talie e leaise tonu ke fefele le tagata fakasausau a le Aliki ; kae ke agamalie a ia ki tagata fuli, mo poto i le akonaki, ti mo kataki fualoa ;

²⁵ e tonu ke fakatonutonu e ia i le agamalu latou ala e agatuu, na saga e soli loa e le Atua kia latou le fakasemala ke lotou tui ai ki le maoki,

²⁶ ti ke lotou toe liliu loa ki lalatou fakakaukau malie, o lotou mavae loa mei masele a le Tiapolo, leia kua tapo ia latou o fakapopula ki lona finegalo.