Lua tosi kia Timoteo 1 - Tosi Tapu

Fakaalofa

¹ Ko Paulo, apositolo a Sesu-Kilisito i le finegalo o le Atua, ke fakasa ia le fakapapau o le mauli leia ia Sesu-Kilisito,

² kia Timoteo, laku fanau alofaina : ko le kalasia, mo le manavaalofa, ti mo le tokamalie ke tuku atu kiate koe e le Atua ko le Tamana ti mo Sesu-Kilisito ko lotatou Aliki !

Fakamakeke kia Timoteo

³ E kau fakafetai ki le Atua, leia na tausi e oku tamana i mua, leia e kau tausi i se atamai mea, e kau manatui tuumau a koe i aku faikole i le po mo le ao ;

⁴ talie e kau manatui ou loimata, ti e kau oli mamae ke kau toe tio kiate koe o tupu ke kau apele i le fiafia,

⁵ talie e kau taupau foki le tausi alofa malie o le tui maoki leia iate koe, leia na uluaki nofo i lou tupuna ko Loisa ti mo lou tinana ko Eunise, leia, e kau iloa papau, e toe nofo foki iate koe.

⁶ Koia, e kau kole atu ai kiate koe, ke ke toe fakaula le nea alofa o le Atua, leia na ke tali i le teki o oku lima.

⁷ Talie e leaise soli mai e le Atua kia tatou le Laumalie ke tou manava ikiiki ai ; kae e fakaapele tatou e lona Laumalie ki le makeke, mo le alofa, ti mo le poto.

⁸ Koia ke aua na ke luma ki le fakamaoki ke tuku ki lotatou Aliki, pe kiate au ko lana tagata pilisoni. Kae ke ke mamae mo au o tupu ko le Evaselio, i le makeke o le Atua

⁹ leia kua fakamauli ia tatou, ti kua kalagai ia tatou ke tou liliu ko lona kakai maokioki, o leaise tupu ko atatou gaoi, kae o mulimuli ki lana fakatuutuu totonu, ti mo le kalasia leia kua soli mai kia tatou ia Sesu-Kilisito i mua o le kamataaga o sekulo.

¹⁰ Kua fakasa le kalasia lena i le temi nei i le sa mai o lotatou Fakamauli ko Sesu-Kilisito, leia kua fakagato ia le makeke o le mate ti kua fakasa ia ki le malama le mauli mo le lee mate i le Evaselio.

¹¹ Ko le Evaselio lena, kua fakanofo au ki ai ko le tagata fai akonaki, mo le apositolo leia e tonu ke ako ia le kau pagani.

¹² Ti ko le tupuaga lena o laku tali a mamae ana ; kae e leaise kau luma fua talie e kau iloa leia kua kau tui ki ai, ti e kau iloa papau e maua e ia le makeke ke taupau ia loku koloa o kaku ki le aso o le fakamaau.

¹³ Too mau i le tui mo le alofa leia ia Sesu-Kilisito, le faifaitaki o masau maoki ala na ke tali meiate au.

¹⁴ Taupau le koloa malie, i le Laumalie Maokioki leia e nofo ia tatou.

¹⁵ E ke iloa ko latou fuli ala i Asia kua lotou tiaki au, o kau i ai a Fisele mo Elemosene.

¹⁶ Ke liligi e le Aliki lona manavaalofa ki le fale o Onesifole, talie na fakapelepelei e ia loku loto o tua lasi, ti na leaise luma a ia ki oku tini ;

¹⁷ kae, i lana au ki Loma nei, na afa fakatavili e ia au, ti na maua e ia au.

¹⁸ Ke alofa le Aliki o tuku kiate ia lona manavaalofa i tafa o le Aliki i le aso lena. E ke iloa malie le lasi o nea fuli ala na fai e ia kiate au i Efeso.