Lua tosi a Samuele 6 - Tosi Tapu

Ave o le aleka ki Selusalemi

¹ Na toe fakatasii loa e Tavite le kau tagata logologona o Iselaele, ko le tino tolu afe.

² Ti na tuu ake loa Tavite, o ano mo le kakai katoa leia na nofo mo ia mei Paale-Suta, ke paleaki mei ai le aleka o le Atua, leia e igoa ki le suafa o le Eteleno, le Atua o kau tau leia e agai i le vasa o selupino.

³ Na lotou fakaeke loa le aleka o le Atua ki se saliote foou, ti na lotou aumai loa a ia mei le fale o Apinatape i le mauga ; na taki le saliote foou e Usa mo Akeso, vosa o Apinatape.

⁴ Ti na lotou ave loa le aleka mei le fale o Apinatape i le mauga ; na saele a Usa i tafa o le aleka o le Atua, ti na ano a Akeso i mua o le aleka.

⁵ Na ta e Tavite mo le fale katoa o Iselaele i mua o le Eteleno a nea fai musika kesekese na fau ki le laakau ko le sipele, ni alepe, mo ni lute, mo ni nafa, mo ni pa, mo ni sitale.

⁶ I le temi na lotou kaku ai loa ki le faisaga o Nakone, na falo loa e Usa lona lima ki le aleka o le Atua, o taofi a ia, talie kua fakamatule a ia e pipi.

⁷ Na mu loa le sausau o le Eteleno kia Usa, ti na taai loa a ia e le Atua i le ganea lena o tupu ko lana sala. Na mate loa Usa i ai, ofi ki le aleka o le Atua.

⁸ Na ita loa Tavite o tupu ko le tautea felaaki e le Eteleno o Usa. Ti na tuku loa ki le ganea lena le igoa ko Pelesi-Usa o kaku mai ki le aso nei.

⁹ Na i loa Tavite ki le Eteleno i le aso lena, ti na pati loa a ia : E ulu feaki loa le aleka o le Eteleno ki loku fale ?

¹⁰ Na leaise loto loa a ia ke ulu le aleka o le Eteleno ki lona fale, i le kolo o Tavite, ti na kakau loa e ia ke ave a ia ki le fale o Opeto-Etome mei Kate.

¹¹ Na nofo loa le aleka o le Eteleno i masina e tolu i le fale o Opeto-Etome mei Kate, ti na tapuaki loa le Eteleno kia Opeto-Etome mo lona fale katoa.

¹² Na fakasa loa ki le sau ko Tavite : Kua tapuakii e le Eteleno le fale o Opeto-Etome mo ana nea fuli, o tupu ko le aleka o le Atua. Ti na ano loa Tavite, o avake le aleka o le Atua mei le fale o Opeto-Etome ki le kolo o Tavite, i loto malie o ni fakafiafia.

¹³ Ka fai loa e latou ala na amo ia le aleka o le Eteleno ni fa sake e ono, na momoli loa se pipi tagata mo se uviki pipi tagata peti.

¹⁴ Na mako loa Tavite i mua o le Eteleno i lona makeke katoa, ti na kofu e ia le efote tea.

¹⁵ Na ave loa e Tavite mo le fale katoa o Iselaele le aleka o le Eteleno i ni kalaga fakafiafia mo le tagi a fakatagi pupusi.

¹⁶ I le ulu a le aleka o le Eteleno ki le kolo o Tavite, na tio mai loa Mikale, taine o Saulo, mei le katupa, ti na tio loa a ia ki le sau ko Tavite e soposopo mo mako i mua o le Eteleno ; ti na nukinukii loa e ia a ia i lona loto.

¹⁷ Na teki loa le aleka o le Eteleno ki lona tuuaga i loto malie o le falela leia na fakatuu e Tavite ki le aleka ; ti na momoli loa e Tavite ki le Eteleno ni failaulau mo ni sakilifisio fakafetai.

¹⁸ I le oki o le momoli e Tavite o failaulau mo sakilifisio fakafetai, na tapuaki loa a ia ki le kakai i le suafa o le Eteleno o kau tau.

¹⁹ Ti na tufa loa e ia ki le kakai katoa, ki le kakai api o Iselaele, ki tagata mo fafine, ki le tagata taki toka tasi, se fa pane, mo se potu inati, mo se fa fagu vino. Ti na mavete loa le kakai katoa, o tasi ano ki lona kaiga.

²⁰ Na toe liliu loa Tavite mei ai ke tapuaki ki lona fale, ti na ulu ake loa ki fafo a Mikale, taine o Saulo, o fakafelavei kiate ia. Ti na pati loa a ia : Na gali ai mo le sau o Iselaele, i le aso nei, ke fakatelefua felaaki ki mata o fafine fakasausau o ana tagata fakasausau, ofaipe se fakatelefua a se tagata noa !

²¹ Na tali loa Tavite kia Mikale : Ko mua ala o le Eteleno, leia na filifili ia au ke mua i lou tamana mo lona fale katoa, leia na fakanofo ia au ke pule ki le kakai a le Eteleno, ki Iselaele, ko mua o le Eteleno leia na kau mako ai.

²² E kau loto foki ke kau toe fuluveli lasi ake i le nea lena, ti ke kau toe fakataulalo ake ki oku mata totonu ; kae ko fafine fakasausau ala kua ke pati ki ai, e lotou fakamauiga loa au.

²³ Koia na leaise maua loa e Mikale, taine o Saulo, sana fanau o kaku ki le aso o lona mate.