Loma 4 - Tosi Tapu

Faitotonu i le tui : Apalaamo mo Tavite

¹ Kolea loa latatou pati kia Apalaamo lotatou tamana fakatino ? Kolea na maua e ia ?

² Kapau na fakamatatonu Apalaamo e ana gaoi, na mafai loa ke nekenekea a ia, kae i mua o le Atua na leaise fai e ia le nea lena.

³ Talie kolea le pati a le Tosi ? Na tui Apalaamo ki le Atua, ti na lau le nea a ia kiate ia ko se faitotonu.

⁴ Ka fai e se tagata se gaoi, e tali e ia se totogi ; e leaise lau le totogi lena kiate ia ofaipe se kalasia kae ofaipe se maua ;

⁵ kae ka tuku ata e se tagata, sala mo fai ia se gaoi, lana tui ki le Atua, leia e fakamatatonu ia le tagata agasala, e lau e le Atua lana tui ko se faitotonu kiate ia.

⁶ Ofaipe le fakasa foki e Tavite le manuia o le tagata leia e tuku ki ai e le Atua le faitotonu, sala gaoi :

⁷ Manuia latou ala kua fakamolemole alatou agaveli, Ti kua uufi alatou agasala !

⁸ Manuia le tagata leia e leaise lau e le Aliki lana agasala kiate ia !

⁹ Pe gato fai le manuia lena i le kau silikosisio, pe toe kau foki ki ai le kau lee silikosisio ? Talie e tou pati kua lau le tui a Apalaamo ko se faitotonu kiate ia.

¹⁰ Pe ko le temi fea na lau ai lana tui kiate ia ? Pe ko muli, pe ko mua o lona silikosisio ? Na leikiaise silikosisio a ia, kae koi lee silikosisio a ia.

¹¹ Ti na tali loa e ia le fakamailoga o le silikosisio, ofaipe se fakamaoki o le faitotonu leia na maua e ia i le tui kae koi lee silikosisio a ia, o tupu ke liliu a ia ko le tamana o le kau lee silikosisio fuli ala e tui, ti ke lau foki le faitotonu kia latou,

¹² ti ko le tamana foki a ia o le kau silikosisio, ala na leaise silikosisio fua, kae na toe saele foki i lakaaga o le tui o lotatou tamana ko Apalaamo i le temi leia na lee silikosisio ai a ia.

¹³ Talie na leaise fai le fakapapau ke tuku le tofiga o le malama nei kia Apalaamo pe ki lona sakoga, i le lao, kae i le faitotonu o le tui.

¹⁴ Talie kapau ko latou fai ala e fakalogo ki le lao e maua ia a koloa o le fakapapau, e leaise aoga loa le tui ti e leaise uiga o le fakapapau.

¹⁵ Talie e fakatupu e le lao le sausau o le Atua ; kae i le ganea e leaise maua ai se lao, e leaise maua ai foki se sala ki le lao.

¹⁶ Koia, e tou maua ai le tofiga o le fakapapau i le tui, o tupu ke tuu a ia ko se kalasia, ti ke tuu mau le fakapapau ki le sakoga katoa, o leaise gato fua ki le sakoga leia e fakalogo ki le lao, kae ki le sakoga foki leia e maua ia le tui a Apalaamo, lotatou tamana fakatasi, ofaipe lona tuu i le Tosi :

¹⁷ Kua kau fakanofo a koe ko le tamana o ni puleaga mauke ai. Ko ia ko lotatou tamana i mua o leia na tui a ia ki ai, le Atua, leia e soli ia le mauli ki le kau mate, ti e pati ki nea ala e leikiaise tupu pe ni nea kua tupu.

¹⁸ Ti na amanaki malie a ia, kae kua oki a amanaki fuli, na tui a ia ti kua liliu a ia ko le tamana o ni puleaga mauke ai, o mulimuli ki le nea leia na fakasa kiate ia : E fenaaki loa lou sakoga.

¹⁹ Ti na leaise toe gaegae a ia i le tui, na leaise tio a ia kua veli lona tino, talie kua ofi a ia ki le fetuu kau lelau, ti na leaise mafai ke faitoe a Sala.

²⁰ Na leaise toe lotolotolua a ia ki le fakapapau a le Atua, i le tui gataa ; kae na fakamakeke a ia e le tui, o fakakololia a ia ki le Atua,

²¹ ti mo iloa fakapapau e ia i lona loto ko le nea leia kua fakapapau e le Atua, e mafai foki e ia lona fakasoko.

²² Koia na lau ai le nea lena kiate ia ko se faitotonu.

²³ Kae e leaise tupu fua ko ia toka tasi leia na tosi ai, ko le nea lena kua lau kiate ia ;

²⁴ e tupu foki ko tatou, ala e toe lau loa ki ai le nea lena, tatou anei e tui ki leia kua toe fakatuuake ia mei le mate a Sesu lotatou Aliki,

²⁵ leia na tuku ke mate o tupu ko atatou agasala ti kua toe tuuake o tupu ko lotatou fakamatatonu.