Loma 16 - Tosi Tapu

Fakaalofa a Paulo ki fetaina

¹ E kau kole atu ke kotou tokaga kia Fope, lotatou tuagaane, leia e tiakono i le Ekelesia o Senekele,

² o tupu ke kotou fakatalitali a ia i le Aliki, i se fakatalitali leia e gali mo le kau sagato, ti ke kotou tokoi kiate ia i nea ala e kotou aoga ai loa kiate ia, talie na tokoi a ia ki se toka api ti mo au totonu foki.

³ Avake oku alofa kia Pelesila mo Akilasi, ko oku kaukau gaoi ia Sesu-Kilisito,

⁴ na la soli ola mauli ke saofaki ai loku mauli ; e leaise ko au fua leia e loto fakafetai kia laua, kae ko Ekelesia fuli foki o le kau pagani.

⁵ Avake foki oku alofa ki le Ekelesia leia i lola kaiga. Avake oku alofa kia Epainete, ko loku alofaaga, leia ko le uluaki fua o Asia kia Kilisito.

⁶ Avake oku alofa kia Malia, leia na lasi ai lana gaoi kia koutou.

⁷ Avake oku alofa kia Atoloniko mo Suniasi, ko oku kaiga ti ko oku kaukau nea i le pilisoni, ala na alofainai lasi i le kau apositolo ti na uluaki tafoki iate au kia Kilisito.

⁸ Avake oku alofa kia Apiliato, loku alofaaga i le Aliki.

⁹ Avake oku alofa kia Ulupano, lomatou kaukau nea gaoi ia Kilisito, ti mo Setakisi, loku alofaaga.

¹⁰ Avake oku alofa kia Apelesi, leia kua mamae o tupu ko lana tui kia Kilisito. Avake oku alofa kia latou o le kaiga o Alisitopule.

¹¹ Avake oku alofa kia Elotione, loku kaiga. Avake oku alofa kia latou o le fale o Nalesise ala e nofo i le Aliki.

¹² Avake oku alofa kia Tilifena mo Tilifosa, ala ko fafine gaoi ki le Aliki. Avake oku alofa kia Pelesita le alofaaga leia na lasi ai lana gaoi ki le Aliki.

¹³ Avake oku alofa kia Lufusi le filifiliia i le Aliki, mo lona tinana leia ko loku tinana foki.

¹⁴ Avake oku alofa kia Asinikilito, Felekone, Elemesi, Patolopasi, Elemasi mo fetaina ala e nonofo mo latou.

¹⁵ Avake oku alofa kia Filoloke mo Sulia, mo Neleo mo lona taina, fenaaki kia Olepa mo le kau sagato fuli e nonofo mo latou.

¹⁶ Ke kotou fefakaalofaaki i se sogi maokioki. E fakaalofa atu kia koutou le Ekelesia fuli o Kilisito.

Tokaga kia latou e fakatupu ia ni mavaevae

¹⁷ E kau fakalotomakeke koutou, fetaina, ke kotou tokaga kia latou ala e fakatupu ia ni fakavaevaega mo ni nea fakatupu siga, o fakatupu veli ki le akonaki kua kotou tali. Kotou fakamamao meia latou ana.

¹⁸ Talie e leaise fakasausau a faasiga tagata ana kia Kilisito lotatou Aliki, kae e lotou fakasausau ki olotou manava totonu ; ti i ni masau malulu mo fakalapulapu, e lotou fakasese a loto o latou ala e faigaofie.

¹⁹ Kia koutou, kua iloa lakoutou fakalogo e tagata fuli. Koia e kau fiafia ai o uiga mo koutou, kae e kau loto ke kotou fakapotopoto i le nea e malie, ti ke kotou mea i le nea e veli.

²⁰ Kua vave loa le takatakafi e le Atua o le tokamalie a Satana i lalo o okoutou vae. Ke nofo mo koutou le kalasia o lotatou Aliki ko Sesu-Kilisito !

²¹ E fakaalofa atu kia koutou a Timoteo, loku kaukau nea i le gaoi, mo Lusiusi, mo Sasone ti mo Sosipatele, ko oku kaiga.

²² E kau fakaalofa atu kia koutou i le Aliki, a au Teletiusi leia na fai ia le tosi leinei.

²³ E fakaalofa atu kia koutou a Kaiusi leia na fakatalitali ia au, ti mo le Ekelesia katoa. E fakaalofa atu kia koutou Elaseto, le tagata taupau paaga o le kolo, ti mo le taina ko Kaletusi.

²⁴ Ke nofo le kalasia o lotatou Aliki ko Sesu-Kilisito mo koutou fuli ! Amene !

²⁵ Ki leia e mafai ke fakamakeke ia koutou o mulimuli ki laku Evaselio ti mo le akonaki o Sesu-Kilisito, o mulimuli ki le fakasa o le misitelio leia na munia mei le kamataaga o le malama nei,

²⁶ kae kua fakasa i le temi nei e tosi a le kau polofeta, o mulimuli ki le fakatuutuu a le Atua lee gato, ti kua fakasa ke iloa e puleaga fuli, o tupu ke lotou fakalogo ki le tui :

²⁷ Ke tuku ki le Atua, ko le poto e tasi, le kololia ia Sesu-Kilisito i sekulo mo sekulo ! Amene !