Loma 14 - Tosi Tapu

Pelesepeto o le alofa

¹ Ke kotou fakatalitali leia e gaegae i le tui, ti ke aua na kotou fevisi i manatu.

² E tui se tasi e feala ke kai ki nea fuli, ti ko se tasi ake, leia e gaegae, e kai magiti ata.

³ Ke aua na fakanoai e leia e kai leia e leaise kai, ti ko leia e leaise kai ke aua na fakamaaui e ia leia e kai, talie kua fakatalitali a ia e le Atua.

⁴ Ko ai a koe, ke ke fakamaaui ia le tagata fakasausau a se tasi kese ? Kapau e tuu a ia i aluga, pe siga a ia ki lalo, a le pule fai le nea lena. Kae e tuu loa a ia i aluga, talie e maua e le Aliki le makeke ke fakatuu ake ai a ia.

⁵ E fakakesekese e se tasi a aso ; ti e pati se tasi, e lotou tatau fuli. Ke tasi maua e le tagata lana manatu totonu i lona loto katoa.

⁶ Ko leia e fakakesekese ia a aso, e fai fenaaki o tupu ko le Aliki. Ko leia e kai, e fai fenaaki o tupu ko le Aliki, talie e fakafetai a ia ki le Atua ; ko leia e leaise kai e fai fenaaki o tupu ko le Aliki, ti e fakafetai a ia ki le Atua.

⁷ Talie, e leaise tasi ia tatou e mauli kiate ia totonu, ti e leaise tasi e mate kiate ia totonu.

⁸ Talie kapau e tou mauli, e tou mauli ki le Aliki, ti kapau e tou mamate, e tou mamate ki le Aliki. Pe tou mauli pe tou mamate, e tou kau mo le Aliki,

⁹ talie na mate Kilisito ti na toe au a ia ki le mauli, o tupu ke liliu a ia ko le Aliki o le kau mate mo le kau mauuli.

¹⁰ Kae ko koe, kolea e ke fakamaaui ai lou taina ? Pe ko koe, kolea e ke vesia ai ki lou taina ? talie e tou tutuu fuli loa i mua o le fakamaauaga o le Atua.

¹¹ Talie e tuu i le Tosi : E kau mauli, e pati le Aliki, Epeluki loa tuli fuli i oku mua, Ti e fakakololia loa alelo fuli ki le Atua.

¹² Koia e fakamatala loa e le tagata taki tasi ki le Atua o uiga mo ia totonu.

Le lao mauiga : afa o le malie o le oloi

¹³ Koia aua na kotou fefakamaauaki ; kae ke kotou manatu ke aua na fai se nea ke fakatupu tukia pe fakatupu siga ki lokoutou taina.

¹⁴ E kau iloa ti e kau tui i le Aliki Sesu, e leaise nea fua e kelekele iate ia, ti koi kelekele se nea ki leia e tui e kelekele a ia.

¹⁵ Kae kapau e mamae lou taina o tupu ko se nea kai, e leaise koi ke saele i le alofa : Aua na ke fakatupu i lau nea kai le puli o leia na mate ki ai Kilisito.

¹⁶ E leaise tonu ke liliu le nea e malie kia koutou ko se nea ke fakatupu lauveli ki ni iki ake.

¹⁷ Talie ko le Puleaga o le Atua, e leaise ko le kai pe ko le inu, kae ko le maokioki, mo le tokamalie, ti mo le fiafia i le Laumalie Maokioki.

¹⁸ Ko leia e tausi kia Kilisito o mulimuli ki nea ana, e malie ki le Atua ti e fakamaoki ki ai a tagata.

¹⁹ Koia loa, ke tou afa a nea ala e aoga ki le tokamalie ti mo le faufau.

²⁰ Aua na ke maumaui le gaoi a le Atua o tupu ko se nea kai. E maoki ko nea fuli e mea, kae e veli ki le tagata, mo ka kai, ke liliu a ia ko se fatu fakatupu siga.

²¹ E malie ke aua na kai ki se inati, ke aua na inu ki se vino, ti ke tiaki le nea leia e fakatupu siga ki lou taina, pe fakatupu tukia, pe fakatupu gaegae.

Lao o le tokaga ki le kololia o le Atua

²² E ke maua le tui lena, taupau a ia ma au i mua o le Atua. Manuia leia e leaise fakalakasala ia a ia totonu i le nea leia e fakamaoki a ia ki ai !

²³ Kae ko leia e lotolotolua o uiga mo le nea leia e kai e ia, e fakamaaui a ia i ai, talie e leaise kai a ia i le tui. Talie e agasala a nea fuli ala e leaise au mei le loto maoki.