Levitiko 10 - Tosi Tapu

Le afi kese na ave e Natape mo Apiu

¹ Ko vosa o Alone, ko Natape mo Apiu, na too ia loa ala ipu tanaki malala, o la tuku loa ki ai ni malala kaka, ti na la liligi loa i aluga se kaloni fakamanogi. Ti na la ave loa ki le Eteleno se afi kese, kae na leaise fakatotonu le nea lena kia laua e le Eteleno.

² Ti na mavae loa se afi mei mua o le Eteleno, o tutu laua : ti na la mamate loa i mua o le Eteleno.

³ Ti na pati loa Moisese kia Alone : ko le nea a ia leia na fakasa e le Eteleno i lana pati : E kau loto ke fakaapaapa ki loku maokioki latou ala e fakafeofi mai kiate au, ti ke lotou fakasa loku kololia i mua o le kakai katoa. Na fakalologo loa Alone.

⁴ Ti na kalagai loa e Moisese a Misaele mo Elesafani, ko vosa o Usiele, taina o le tamana o Alone, o pati kia laua : kolua au o ave okoulua fetaina ke mamao i le sagatualio, ki fafo o le nofolaga.

⁵ Ti na la ano loa o ave ola fetaina mo ola kofu tapu, ki fafo o le nofolaga, o mulimuli ki le pati a Moisese.

Tapu e tolu o uiga mo le putu

⁶ Ti na pati loa Moisese kia Alone, mo Eleasale, mo Itamale, vosa o Alone : aua na kotou fakatekateka okoutou fa ulu ; aua na kotou sae okoutou kofu ke fakamailoga ai le mate ; talie e kotou aumai loa le mate kia koutou ti mo le sausau o le Eteleno ki le kakai o Iselaele. Kotou tuku okoutou fetaina fuli ko fanau a Iselaele ke tagi kia latou ala kua tamate e le Eteleno ki le afi.

⁷ Kae ko koutou, ke aua na kotou mavae loa i le falela tapu, mo ka e leaise kotou loto ke kotou mamate ; talie e nofo ia koutou le lolo tapu o le Eteleno. Ti na lotou fai loa le nea leia na fakasa e Moisese.

Ko ni iki ake lekula

⁸ Na masau loa le Eteleno kia Alone, o pati :

⁹ Aua na ke inu loa se vino, pe ko se kava, e koe mo ou vosa, i mua o lakotou ulu ki le falela tapu, ti e leaise kotou mamate loa : e kotou tausi loa le lao lena, e koutou mo akoutou fanau i temi fuli.

¹⁰ Aua na kotou inu foki se kava mo ka e tonu ke kotou too ia se tonu ki se nea fakalotu pe ko se nea fakamalama, ki se nea kelekele pe ki se nea mea.

¹¹ Ti e toe fenaaki foki mo ka kotou ako ki fanau a Iselaele a lao ala na kau tuku kia koutou ia Moisese.

¹² Na pati loa Moisese kia Alone, mo ona vosa ko Eleasale mo Itamale, ala koi mauuli : kotou too loa le nea leia na toe i le moliga falina mo ka kua oki i le vaei kese le nea leia e tonu ke tutu e le afi i mua o le Eteleno, ti kotou fai loa ki ai ni pane sala fakatupu, ti kotou kai loa latou o ofi i le aletale ; talie ko se nea kai maokioki lasi a ia.

¹³ E kotou kai loa latou i se ganea tapu. Ko le vaega a ia e tuku kiate koe, Alone mo ou vosa, i moliga ala kua fai ki le Eteleno, o mulimuli ki fakatotonu ala na tuku mai e le Eteleno kiate au.

¹⁴ E kotou kai loa i se ganea mea, e koe mo ou vosa ti mo ou taineliki, le vakavakapu leia na liliaki ki fetuu mo fetuu ti mo le alaga mua atamai leia na siki ki aluga i mua o le Eteleno ; talie kua soli kia koutou a inati ana ko le totogi o le gaoi fakapelepitelo, i sakilifisio fakafetai fuli a fanau o Iselaele.

¹⁵ E aumai loa e le fanau a Iselaele kia koutou, o fakatasi mo le gako leia e tonu ke tutu e le afi, le alaga mua atamai leia e siki ki aluga ti mo le vakavakapu leia e liliaki ki fetuu mo fetuu ; e ke maua loa a nea ana, e koe mo ou vosa, talie ko le fakatotonu a le Eteleno ke tuku le vaega lena kia koutou, o lee gato.

¹⁶ Na afa loa e Moisese le koti tagata o le fakamolemole o le agasala a le kakai. Ti ko leinei kua tutu a ia. Ti na ita loa Moisese ki vosa o Alone, ko Eleasale mo Itamale, ala koi mauuli, ti na pati loa a ia kia laua :

¹⁷ Kolea na leaise kolua kai ai le kanomate o le sakilifisio lena i le ganea tapu, talie ko se nea kai tapu a ia ? Kua tuku a ia e le Eteleno kia kolua, o tupu ke kolua amo ia le agasala o le kakai, o tupu ke kolua fai kiate ia le fakamolemole o agasala i mua o le Eteleno.

¹⁸ Ko leinei, na leaise ave le toto o le manu ki le falela tapu ; e tonu ke kolua kai a ia i le sagatualio, o mulimuli ki le nea leia kua fakatotonu mai kiate au.

¹⁹ Na pati loa Alone kia Moisese : Ko leinei, kua lotou momoli i le aso leinei lalatou sakilifisio ki le fakamolemole mo lalatou failaulau i mua o le Eteleno. Pe feala i le aso nei, i le oki o le nea leia na soko mai kiate au, ke kau kai loa le kanomate o le koti o le fakamolemole ? Pe feala ke malie le nea lena ki mata o le Eteleno ?

²⁰ Na logo loa Moisese ki masau ana, ti na fakamaoki loa a ia ki ai.