Gaoi 16 - Tosi Tapu

Filifili o Timoteo e Paulo

¹ Na kaku loa Paulo ki kolo o Telepe mo Lisite. Ti ko leinei, na i ai se tisipulo na igoa ko Timoteo, vosa o se fafine Sutea na tui, kae na tamana a ia ki se Keleka.

² Ti na fakamaoki malie kiate ia a fetaina i Lisite mo Ikone.

³ Ti na loto loa Paulo ke ave e ia a ia ; ti na too loa e ia Timoteo o silikosisio, o tupu ko le kau Sutea leia na nofo i ganea ana, talie na lotou iloa fuli e tamana Keleka a ia.

⁴ I lala fakalaka i atu kolo, na la fakasa ki fetaina a tonuaga ala na fai e le kau apositolo mo le kau fakamatuatua o Selusalemi, ke lotou fai ki ai.

⁵ Ti na asilisili makeke a Ekelesia i le tui, ti na lotou toe asilisili api i aso taki tasi.

Tio a Paulo i Toloasi

⁶ I lola taofi e le Laumalie Maokioki ke aua na la fakasa le folafola i Asia, na la ano loa ki Filisia mo le fenua ko Kalatia.

⁷ Kae i lala kaku o ofi ki Misia, na la faiga loa ke la ulu ki Pitinia ; kae na leaise fakataga loa a ia e le Laumalie o Sesu kia laua.

⁸ Ti na la tuku loa Misia, kae la ifo loa ki Toloasi.

⁹ I le pouli, na moe miti loa Paulo : Na sa ake loa kiate ia se tagata Masetonia, o fai ake kiate ia le kole leinei : Au ki Masetonia, o tokoi mai kia matou !

¹⁰ I le oki o le tio lena a Paulo, na motou afa aifai ke motou ano ki Masetonia, kua motou matuaki iloa papau loa i omatou loto kua kalagai matou e le Aliki ke motou fakasa i ai le logo malie.

Ulu o Paulo ki Eulopa, kaku ki Filipo

¹¹ Ti na motou sopo loa ki se vaka i Toloasi, o ano fakasako ki Samotalase, ti na motou kaku loa i leia ake a aso ki Neapolisi.

¹² Mei ai na motou ano loa ki Filipe, ko le uluaki kolo a ia o le fenua lena o Masetonia, ti ko se kolo na fakalogo ki Loma. Na motou nonofo loa i ni ga aso i le kolo lena.

¹³ I le aso o le sapato, na motou ano loa ki le tua kolo, ki se liua, talie na motou manatu ake loa na tuu i ai se ganea faikole. Na motou tonatona loa ki lalo, o masau ki fafine ala na fakatasi i ai.

Litia, uluaki fafine tafoki

¹⁴ Ko se tasi o latou, na igoa ko Litia, fafine fakatau kie kula mauiga mei le kolo ko Tiatile, na fakalogo. Ti na fakamavaa loa e le Aliki lona loto, o tupu ke tokaga a ia ki le nea leia na masau ki ai Paulo.

¹⁵ I le oki o lona papitema, a ia mo lona famili, na fai loa e ia kia matou le kole leinei : Kapau e kotou tio e kau tui maoki ki le Aliki, kotou ulu ki loku fale, o nonofo i ai. Ti na fakaafe loa e ia matou ke matou tali lana kole.

Pilisoni o Paulo mo Silasi

¹⁶ I lamatou ano ki le ganea faikole, na au loa o fakafetaulaki mai kia matou se taine fakasausau leia na nofo ai se temonio faikikite, ti na lasi ai a koloa na maua e ona pule iate ia, i lana faikikite loi.

¹⁷ Ti na muli loa a ia ia Paulo mo matou, o kalaga : Ko tagata anei ko ni tagata fakasausau a le Atua Taualuga, ti e lotou fakasa atu kia koutou le ala o le mauli.

¹⁸ Ti na fai loa e ia le nea lena i le lolotoga o ni aso mauke ai. I lona kaekae, na mafuli ake loa Paulo o pati ki le temonio : E kau fakatotonu atu kiate koe, i le suafa o Sesu-Kilisito, mavae meiate ia. Ti na mavae aifai le laumalie.

¹⁹ I le tio a le kau pule o le fafine fakasausau lena kua puli lolatou fanakiaga, na lotou too loa Paulo mo Silasi, o toso ki le lapalasi fakafenua, ki mua o le kau tui fakamaau.

²⁰ Ti na lotou ave loa laua ki mua o tui fakamaau Loma, o pati : Ko tagata anei e fakatupu maveuveu i lotatou kolo ;

²¹ ko ni Sutea laua, ala e fakasa ia ni agai fenua ala e leaise taga ke tou tui ki ai, pe ke tou fai, talie ko ni kau Loma tatou.

²² Ti na malaga loa le kakai kia latou ; ti na fakatotonu loa e le kau tui fakamaau ke too ola kofu, kae sasa laua ki ni laakau.

²³ I le oki o lola sasa fakaveliveli, na fakaulu loa laua ki le pilisoni, kae na fakatotonu loa ki le tagata leo pilisoni ke leo mau laua.

²⁴ I lana maua le fakatotonu lena, na tuku loa e ia laua ki se kogafale i loto oki o le fale pilisoni, ti na fakamaumau loa e ia ola vae ki ni potu laakau.

Tafoki o le pule o le fale pilisoni

²⁵ I le vaeluapo, na faikole mo sua fakavikiviki ki le Atua a Paulo mo Silasi, ti na logo le kau pilisoni kia laua.

²⁶ Ti fokifa kua to se mafuike lasi, o galulu ai a fakatafito o le fale pilisoni ; i le temi fai lena, na mavaa loa a matapa fuli, ti na motumotu loa a tini o le kau pilisoni katoa.

²⁷ Ti na ala ake loa le tagata leo, ti i lana tio kua mavaa a matapa o le fale pilisoni, na tosoi loa e ia lana seleta ke fakamate a ia, talie na manatu a ia kua sola le kau pilisoni.

²⁸ Kae na kalaga leo lasi loa Paulo kiate ia : Aua na ke fai fua kiate koe se nea veli, ko nei matou fuli i leinei.

²⁹ Ti na kole loa e le tagata leo ke aumai se malama, ti na oso loa a ia ki loto, o fakamapee ki le kele i mua o Paulo mo Silasi, kua lulu katoa lona kuaga.

³⁰ Ti na taki loa e ia laua ki fafo, o pati : Ei aliki, kolea e tonu ke kau fai ke kau mauli ai ?

³¹ Ti na pati loa Paulo mo Silasi : Tui ki le Aliki ko Sesu, ti e ke mauli loa, a koe mo lou famili.

³² Ti na la fakasa loa kiate ia le folafola a le Aliki, mo latou fuli ala na nonofo i lona fale.

³³ Ti na too loa e ia laua, i le ola fai lena o le pouli, ti na fufulu loa e ia ola lavea, ti na papitema aifai a ia, mo lona famili katoa.

³⁴ Ti na taki loa e ia laua ki lona fale, o tuku loa e ia se nea kai kia laua, mo fiafia a ia mo lona famili katoa, i lana kua tui ki le Atua, mo lona famili.

Mavae o Paulo mo Silasi i le pilisoni

³⁵ I le mafoa mai o le ao, na kakau loa e le kau tui fakamaau ni tagata solia ke ano o pati ki le tagata leo pilisoni : Tuku ke ano a tagata ana.

³⁶ Ti na fakasa loa e le tagata leo pilisoni a masau ana kia Paulo : Kua kave logo mai kiate au le kau tui fakamaau ke fakalauatea koulua ; koia kua kolua lauatea ai i le temi nei, kolua ano i le tokamalie.

³⁷ Kae na pati loa Paulo ki tagata solia : Kua lotou sasa maua i mua o le kakai, kae na leaise fakamaaui mua maua, maua ala ko tagata Loma, ti kua lotou tuku maua ki le pilisoni, ti ko leinei e lotou fakamavae fakafufu maua ! E leaise fai fenaaki loa ! Ke lotou au totonu o fakalauatea maua.

³⁸ Ti na ano loa a tagata solia o fakamatala a masau ana ki le kau tui fakamaau, ti na lotou i lasi ai i lalatou iloa ko tagata Loma laua.

³⁹ Ti na lotou au loa o fakakolekole laua, mo fakamavae laua i le pilisoni, ti mo kolekole kia laua ke la mavae i le kolo.

⁴⁰ I lala mavae i le pilisoni, na la ulu loa ki le fale o Litia, ti i le oki o lala felavei mo fetaina ti mo lala fakalotomakekei latou, na la ano loa.